جامع قرآن، صاحب جودو احسان حضرت عثمان بن عفان رضي اللہ تعالی عنہ

خلیفۂ سوم،صاحب جودوکرم،جامع قرآن ، کامل الحیاء والایمان، ذو النورین والبرہان، حضرت عثمان بن عفان رضي اللہ تعالی عنہ کو اللہ تعالی نے بے انتہاء عظمت وفضیلت سے نوازا،متعدد خصائص وامتیازات سے بہرہ مند فرمایا،اور آپ کو خصائل حمیدہ وصفات عالیہ سے متصف فرماکر مقامات عالیہ ودرجات سنیہ پر فائز فرمایا-      آپ کے مقامات عالیہ ودرجات رفیعہ اور بارگاہ نبوی میں مقبولیت کا اندازہ حضور اکرم صلی اللہ علیہ والہ وسلم کے ان ارشادات سے بخوبی ہوتا ہے جو آپ کےمتعلق وارد ہوئے ہیں-      اہل سنت وجماعت کا متفقہ عقیدہ ہے کہ حضرات خلفاء راشدین رضي اللہ تعالی عنہم کی جس طرح ترتیب ہے ان کے درجات وکمالات بھی اسی ترتیب سے ہيں-      حضرت عثمان غنی رضي اللہ تعالی عنہ کی حیات طیبہ کا ہر گوشہ اور آپ کی سیرت مبارکہ کے ہر زاویہ کا مطالعہ انسانی زندگی میں ایک حسین انقلاب کا موجب ہے- آپ کمال درجہ کی صفت حیاء سے متصف تھے،حضور نبی اکرم صلی اللہ علیہ والہ وسلم آپ کے مزاج وطبیعت کا خصوصی لحاظ فرمایا کرتے،صحیح مسلم شریف میں حدیث پاک ہے: عَنْ عَطَاءٍ وَسُلَيْمَانَ ابْنَىْ يَسَارٍ وَأَبِى سَلَمَةَ بْنِ عَبْدِ الرَّحْمَنِ أَنَّ عَائِشَةَ قَالَتْ كَانَ رَسُولُ اللَّهِ صلى الله عليه وسلم مُضْطَجِعًا فِى بَيْتِى كَاشِفًا عَنْ فَخِذَيْهِ أَوْ سَاقَيْهِ فَاسْتَأْذَنَ أَبُو بَكْرٍ فَأَذِنَ لَهُ وَهُوَ عَلَى تِلْكَ الْحَالِ فَتَحَدَّثَ ثُمَّ اسْتَأْذَنَ عُمَرُ فَأَذِنَ لَهُ وَهُوَ كَذَلِكَ فَتَحَدَّثَ ثُمَّ اسْتَأْذَنَ عُثْمَانُ فَجَلَسَ رَسُولُ اللَّهِ صلى الله عليه وسلم وَسَوَّى ثِيَابَهُ قَالَ مُحَمَّدٌ وَلاَ أَقُولُ ذَلِكَ فِى يَوْمٍ وَاحِدٍ - فَدَخَلَ فَتَحَدَّثَ فَلَمَّا خَرَجَ قَالَتْ عَائِشَةُ دَخَلَ أَبُو بَكْرٍ فَلَمْ تَهْتَشَّ لَهُ وَلَمْ تُبَالِهِ ثُمَّ دَخَلَ عُمَرُ فَلَمْ تَهْتَشَّ لَهُ وَلَمْ تُبَالِهِ ثُمَّ دَخَلَ عُثْمَانُ فَجَلَسْتَ وَسَوَّيْتَ ثِيَابَكَ فَقَالَ : أَلاَ أَسْتَحِى مِنْ رَجُلٍ تَسْتَحِى مِنْهُ الْمَلاَئِكَةُ.  ترجمہ:حضرت عطا بن یسار،حضرت سلیمان بن یساراور حضرت ابو سلمہ بن عبد الرحمن رضي اللہ تعالی عنہم سے روایت ہے کہ سیدہ  عائشہ صدیقہ رضی اللہ عنہا  نے ارشاد فرمایا:حضرت  رسول اللہ صلی اللہ علیہ والہ وسلم اپنے کاشانۂ اقدس میں استراحت فرماتھے،اورآپ کے زانوے اقدس  یا اپنی پنڈلی مبارک  سے زائد کپڑا ہٹا ہوا تھا ، حضرت ابوبکر رضي اللہ تعالی عنہ  نے اجازت طلب  کی،آپ نے  انہیں ا سی حالت میں اجازت عطافرمائي،حضرت ابو بکر رضي اللہ تعالی عنہ نے آپ کی خدمت میں معروضہ کیا، پھر حضرت عمر رضي اللہ تعالی عنہ نے اجازت طلب  کی،آپ نے  انہیں ا سی حالت میں اجازت عطافرمائي،حضرت عمر رضي اللہ تعالی عنہ نے آپ کی خدمت میں معروضہ کیا، پھرحضرت عثمان رضي اللہ تعالی عنہ  نے اجازت طلب کی  توحضرت رسول اللہ صلی اللہ علیہ والہ وسلم تشریف فرما ہوئے اور اپنے کپڑے درست فرمالئے،حضرت عثمان رضي اللہ تعالی عنہ حاضر ہوئے اور انہوں نے آپ کی خدمت میں معروضہ کیا، جب وہ چلے گئے تو سیدہ عائشہ  صدیقہ رضي اللہ تعالی عنہا نے عرض کیا :حضرت  ابوبکر رضي اللہ عنہ حاضر ہوئے، آپ نے ان کے لے نہ توحرکت  کی اور نہ ان کے لئے اہتمام کیا، پھر حضرت عمر رضي اللہ تعالی عنہ حاضر ہوئے ،آپ نے  ان کے لئے نہ توحرکت  کی اورنہ ان کے لئے اہتمام کیا، پھر حضرت  عثمان رضي اللہ تعالی عنہ حاضر ہوئے تو آپ تشریف فرما ہوئے اور اپنے کپڑے درست کئے؟حضور اکرم صلی اللہ علیہ والہ وسلم نے ارشاد  فرمایا: میں اس شخص سے حیاءکیوں نہ کروں جس سے فرشتے بھی حیاءکرتے ہیں –(صحیح مسلم،کتاب فضائل الصحابة،باب من فضائل عثمان بن عفان رضى الله عنه. حدیث نمبر:6362) صحیح مسلم کی ایک اور روایت میں ہے : إِنَّ عُثْمَانَ رَجُلٌ حَيِىٌّ وَإِنِّى خَشِيتُ إِنْ أَذِنْتُ لَهُ عَلَى تِلْكَ الْحَالِ أَنْ لاَ يَبْلُغَ إِلَىَّ فِى حَاجَتِهِ. ترجمہ:حضور اکرم صلی اللہ علیہ والہ وسلم نے ارشاد فرمایا: عثمان (رضي اللہ تعالی عنہ) حیادار ہیں، مجھے اندیشہ ہوا کہ اگر میں نے اسی حالت میں اجازت دے دی تو وہ میرے پاس اپنی ضرورت کو پیش نہ کرسکیں گئے ۔(صحیح مسلم،کتاب فضائل الصحابة،باب من فضائل عثمان بن عفان رضى الله عنه. حدیث نمبر:6363)      آپ کی صفت حیاء کے پیش نظر حضور اکرم صلی اللہ علیہ والہ وسلم نے آپ کے حق میں خصوصی دعاء فرمائی،جیساکہ کنز العمال میں حدیث پاک ہے: سألت ربي عز وجل ألا يوقفه الحساب فشفعني فيه. "أبو الحسن الجوهري في أماليه وابن عساكر-     ترجمہ:حضور اکرم صلی اللہ علیہ والہ وسلم نے ارشاد فرمایا:میں نے اللہ عزوجل سے معروضہ کیا  کہ قیامت کے دن عثمان کوحساب کے لئے کھڑا نہ کرے ،تو اللہ تعالی نے ان کے حق میں میری سفارش قبول فرمالی-(کنز العمال،حدیث نمبر:33095) خلافت اور جنت کی بشارت: یوں تو اللہ تعالی نے عمومی طور پر تمام صحابۂ کرام رضي اللہ تعالی عنہم سے جنت کا وعدہ فرمایا ہے ،جیساکہ ارشاد ہے: وَكُلًّا وَعَدَ اللَّهُ الْحُسْنَى -ترجمہ:اور اللہ تعالی نے تمام(صحابۂ کرام)سے جنت کا وعدہ فرمالیاہے-(سورۃ الحدید:10) حضرت عثمان غنی رضي اللہ تعالی عنہ جنت کی اس عمومی بشارت کے باوصف خصوصی بشارت سے بھی سرفراز فرمائے گئے-جیساکہ کنز العمال میں حدیث پاک ہے: عن أنس قال: جاء النبي صلى الله عليه وسلم فدخل إلى بستان فأتى آت فدق الباب، فقال: يا أنس! قم فافتح له الباب وبشره بالجنة والخلافة من بعدي، قلت: يا رسول الله! أعلمه؟ فقال: أعلمه، فخرجت فإذا أبو بكر، قلت له: أبشر بالجنة وأبشر بالخلافة من رسول الله صلى الله عليه وسلم، ثم جاء آت فدق الباب، فقال: يا أنس! قم فافتح له الباب وبشره بالجنة وبالخلافة من بعد أبي بكر قلت: يا رسول الله! أعلمه؟ فقال: أعلمه، فخرجت فإذا عمر، فقلت: أبشر بالجنة وأبشر بالخلافة من بعد أبي بكر، ثم جاء آت فدق الباب، فقال: يا أنس! قم فافتح له الباب وبشره بالجنة وبالخلافة من بعد عمر وأنه مقتول، فخرجت فإذا عثمان، قلت: أبشر بالجنة وبالخلافة من بعد عمر وأنك مقتول، فدخل على النبي صلى الله عليه وسلم فقال: يا رسول الله! والله ما تغنيت ولا تمنيت ولامسست ذكري بيميني منذ بايعتك بها، قال: هو ذاك يا عثمان."كر" ، ورواه "ع، كر" من طريق عبد الله بن إدريس عن المختار بن فلفل عن أنس.  ترجمہ:سیدنا انس بن مالک رضي اللہ عنہ سے روایت ہے ،آپ نے فرمایا کہ حضرت نبی اکرم صلی اللہ علیہ والہ وسلم جلوگر ہوئے اور ایک باغ میں تشریف لے گئے،ایک صاحب حاضر ہوئے اور دروازہ پر دستک دی،حضور اکرم صلی اللہ علیہ والہ وسلم نے ارشاد فرمایا:ائے انس!اٹھو،اور ان کے لئے دروازہ کھول دو،اور انہيں جنت کی اور میرے بعد خلافت کی بشارت سنادو،میں نے عرض کیا :یارسول اللہ صلی اللہ علیہ وآلہ وسلم!کیا میں انہیں یہ بات بتادوں؟آپ نے ارشاد فرمایا:ہاں انہيں بتلادو!جب میں باہر نکلا تو کیا دیکھتاہوں کہ حضرت ابو بکر رضي اللہ عنہ تشریف فرما ہیں،میں نے ان سے کہا:آپ کے لئے جنت کی خوشخبری ہے،اور حضور صلی اللہ علیہ والہ وسلم کی خلافت کی خوشخبری ہے۔پھرایک صاحب حاضر ہوئے اور دروازہ پر دستک دی،حضور اکرم صلی اللہ علیہ والہ وسلم نے ارشاد فرمایا:ائے انس!اٹھو،اور ان کے لئے دروازہ کھول دو،اور انہيں جنت کی اور ابو بکر کے بعد خلافت کی بشارت سنادو،میں نے عرض کیا :یارسول اللہ صلی اللہ علیہ وآلہ وسلم!کیا میں انہیں یہ بات بتادوں؟آپ نے ارشاد فرمایا:ہاں انہيں بتلادو!جب میں باہر نکلا تو کیا دیکھتاہوں کہ حضرت عمر رضي اللہ عنہ تشریف فرما ہیں،میں نے  کہا:آپ کے لئے جنت کی خوشخبری ہے،اور حضرت ابو بکر رضي اللہ عنہ کےبعد خلافت کی خوشخبری ہے۔     پھرایک صاحب حاضر ہوئے اور دروازہ پر دستک دی،حضور اکرم صلی اللہ علیہ والہ وسلم نے ارشاد فرمایا:ائے انس!اٹھو،اور ان کے لئے دروازہ کھول دو،اور انہيں جنت کی اور عمر بعد خلافت کی بشارت سنادو،اور یہ بھی بشارت سنادو کہ وہ شہید ہونے والے ہيں،جب میں باہر نکلا تو کیا دیکھتاہوں کہ حضرت عثمان رضي اللہ تعالی عنہ تشریف فرما ہیں،میں نے کہا:آپ کے لئے جنت کی خوشخبری ہے،اورحضرت عمر رضي اللہ تعالی عنہ کے بعد خلافت کی خوشخبری ہے،اور آپ شہید کئے جائیں گے-تو حضرت عثمان رضي اللہ تعالی عنہ حضرت نبی اکرم صلی اللہ علیہ والہ وسلم کی خدمت بابرکت میں حاضر ہوئے اور عرض کیا:یارسول اللہ صلی اللہ علیہ والہ وسلم!اللہ کی قسم!میں نے کبھی گانا نہیں گایا،اور نہ کبھی بے حیائی کا کام کیا،اور جس وقت سے میں نے اپنے سیدھے ہاتھ سے آپ کے دست حق پرست پر بیعت کی ہے کبھی اس سے اپنی شرمگاہ کو نہيں چھوا،حضور اکرم صلی اللہ علیہ والہ وسلم نے ارشاد فرمایا:ائے عثمان !یہی وجہ ہے کہ تمہیں یہ درجات ملے ہیں-(کنز العمال، فضائل ذو النورين عثمان بن عفان رضي الله عنه، حدیث نمبر:36267)  از:حضرت ضیاء ملت مولانا مفتی حافظ سید ضیاء الدین نقشبندی دامت برکاتہم العالیہ نائب شیخ الفقہ جامعہ نظامیہ بانی ابو الحسنات اسلامک ریسرچ سنٹر- <a href="../../../../">www.ziaislamic.com</a>

Mufti Maulana Syed Zia Uddin Naqshbandi Quadri

Shaik-ul-Fiqh - Jamia Nizamia

Mufti Maulana Syed Zia Uddin Naqshbandi Quadri

Shaik-ul-Fiqh - Jamia Nizamia

Scholarly Articles

جامع قرآن، صاحب جودو احسان حضرت عثمان بن عفان رضي اللہ تعالی عنہ