ترک جماعت کی مذمت،وعیدیں

جماعت کے ساتھ نماز ادا کرنا سنت مؤکدہ ہے، اسکا تارک گنہ گار اور سنت نبوی علی صاحبھا الصلاة والسلام سے منہ موڑنے والاہے، ترک جماعت ایسا بدترین عمل ہے جس سے دنیا میں ذلت ورسوائی اور آخرت میں محرومی مقدر بن جاتی ہے،بلا عذر شرعی جماعت چھوڑنے سے نماز میں مختلف قسم کا نقصان پیدا ہوتا ہے، نماز کا ثواب کم ہوجاتاہے، خشوع وخصوع کا دامن چھوٹ جاتا اور نماز میں خطاؤں کی کثرت ہوتی ہے اور بحالت نماز ذہن وفکر پر وساوس شیطانی کا حملہ ہوتا ہے، ان عیوب کی بناء پر دربار الہی سے بندہ کی نماز رد کردی جاتی ہے جیسا کہ حدیث شریف میں ہے :عن ابن عباس قال قال رسول اللہ صلی اللہ علیہ والہ وسلم من سمع النداء فلم یمنعہ من اتباعہ عذر قالوا وما العذر قال خوف او مرض لم تقبل منہ الصلاة التی صلی۔ ترجمہ ؛ حضرت عبد اللہ بن عباس رضي اللہ تعالی عنھما سے روایت ہے، فرمایا ؛ سیدنا رسول اللہ صلی اللہ علیہ والہ وسلم نے ارشاد فرمایا ؛ جو شخص اذان سنے اور اسکے بعد مسجد کی طرف جانے سے کوئی عذر نہ روکے تو جو نماز اس نے مسجد کے سوا دوسری جگہ پڑھی اسکو قبول نہیں کیا جائیگا۔ عرض کیا گیا ؛ عذر کیا ہے؟ تو حضور صلی اللہ علیہ والہ وسلم نے ارشاد فرمایا ؛ جان کا خوف یا مرض بڑھنے کا اندیشہ عذر شرعی ہے۔﴿ابوا داود،ابواب فی التشدید فی ترک الجماعة،حدیث:551 ﴾ کسی خوشحال،مالدار،ناز ونعمتوں میں پرورش پانے والے انسان پر کوئی بلاء ومصیبت نہ بھی آئے تو اسکی بد بختی اور حسرت ومحرومی کیلئے اتنا ہی کافی ہے کہ وہ اذان سنتا بھی ہے اور نماز کی ادائیگی کیلئے نہیں جاتا،جیسا کہ سیدنا رسول اللہ صلی اللہ علیہ والہ وسلم نے ارشاد فرمایا:حسب المومن من الشتاء والخیبة ان یسمع المؤذن یثوب بالصلاة فلا یجیبہ ترجمہ ؛ مومن کی بدبختی اور ناکامی کیلئے اتنا کافی ہے کہ وہ موذن کو نماز کی دعوت دیتے ہوئے سنتا ہے مگر اسکا جواب نہیں دیتا یعنی نماز باجماعت کیلئے تیاری نہیں کرتا۔﴿المعجم الکبیرللطبرانی،حدیث:16805﴾ جماعت چھوڑنے کی وجہہ سے تارک جماعت تو رحمتوں سے محروم رہتا ہے ساتھ ہی ساتھ اسکا وبال سارے علاقہ کو اپنی لپیٹ میں لیتا ہے، جب کسی قریہ و علاقہ میں تین دن جماعت ترک کی جاتی ہے تو وہاں شیطان کا سایہ ہوجاتا ہے اور اسکے باشندے مضر اثرات کا شکار بن جاتے ہیں، چنانچہ حضرت ابو درداء رضي اللہ تعالی عنہ سے روایت ہے فرمایا میں نےسیدنا رسول اللہ صلی اللہ علیہ والہ وسلم کو فرماتے سنا :ما من ثلاثة فی قریة ولا بدو لا تقام فیھم الصلاة الا قد استحوذ علیھم الشیطان فعلیکم بالجماعة ترجمہ ؛ جس کسی قریہ یا گاؤں میں تین دن تک نماز قائم نہ کی جائے تو وہاں کے باشندوں پر شیطان غالب آجاتاہے پس تم پر جماعت کو لازم کرلو۔﴿ابو داؤد،فی التشدید فی ترک الجماعة ، حدیث:ۛ547،نسائی، التشدید فی ترک الجماعة ،حدیث:ۛ855﴾ جماعت کی فضیلت واہمیت کو یہ حدیث شریف بخوبی واضح کر تی ہے،حضور اکرم صلی اللہ علیہ والہ وسلم نے ارشادفرمایا :ولو یعلم ھذا المتخلف عن الصلاة فی الجماعة مالھذا الماشی الیھا لٲ تاھا ولو حبوا علی یدیہ ورجلیہ ترجمہ ؛  با جماعت نماز ادا کرنے سے پیچھے رہنے والا یہ شخص اگر جان لیتا کہ جماعت میں شریک ہونے کے ارادہ سے نماز کی طرف چلنے والے کا اجر وثواب کیا ہے تو وہ شخص بھی چلنے کی قوت نہ رہے تو ہاتھ اور پاؤں کے بل آئیگا۔﴿المعجم الکبیرللطبرانی، حدیث:7806﴾  کچھ جرائم وکبائر ایسےہیں جنکی سزا اسلام میں ایسی مقرر کی گئی کہ جس سے سخت جرائم کا خاتمہ ہوجاتاہے ، جیسے چوری کی سزا ہاتھ کاٹنا،شراب پینے اور تہمت لگانے کی سزا کوڑے مارنا،زنا کی سزا سرعام پتھروں سے مارنا،مگر کسی جرم کی سزا آگ میں جلانے کی نہیں بتائی گئی،بلکہ بطور تعزیر آگ سے سزا دینے یا نقصان دہ جانوروں کو جلانے سے منع کیا گیا،مگر سراپا رحمت حبیب پاک صلی اللہ علیہ والہ وسلم نے بلا عذر جماعت چھوڑنے والوں کو ان الفاظ میں تنبیہ فرمائی لینتھین رجال عن ترک الجماعة او لاحر قن بیوتھم{سنن ابن ماجہ، باب التغلیظ فی التخلف عن الجماعة،حدیث:ۛ844}جماعت چھوڑنے سے لوگوں کو یا تو ضرور باز آنا چاہئے یا میں انکے گھروں کو جلادوں۔

Mufti Maulana Syed Zia Uddin Naqshbandi Quadri

Shaik-ul-Fiqh - Jamia Nizamia

Mufti Maulana Syed Zia Uddin Naqshbandi Quadri

Shaik-ul-Fiqh - Jamia Nizamia

Scholarly Articles

ترک جماعت کی مذمت،وعیدیں

Mufti Maulana Syed Zia Uddin Naqshbandi Quadri

Shaik-ul-Fiqh - Jamia Nizamia

Mufti Maulana Syed Zia Uddin Naqshbandi Quadri

Shaik-ul-Fiqh - Jamia Nizamia

Scholarly Articles

&#1578;&#1585;&#1705; &#1580;&#1605;&#1575;&#1593;&#1578; &#1705;&#1740; &#1605;&#1584;&#1605;&#1578;&#1548;&#1608;&#1593;&#1740;&#1583;&#1740;&#1722;

ترک جماعت کی مذمت،وعیدیں