روزہ،فرضیت وافادیت

اللہ تعالی کا ارشاد ہے (سورۂ بقرہ پ2ع23 میں)

’’يٰاَ يُّهَا الَّذِیْنَ اٰمَنُوْا کُتِبَ عَلَیْکُمُ الصِّیَامُ کَمَا کُتِبَ عَلَی الَّذِیْنَ مِنْ قَبْلِکُمْ لَعَلَّکُمْ تَتَّقُوْنَoاَیَّامًا مَّعْدُودٰتٍ Ø· ‘‘

ترجمہ:اے ایمان والو!تم پر (رمضان کے)روزے فرض کئے گئے جس طرح تم سے پہلے (اور امتوں پر)فرض کئے گئے تھے تاکہ تم متقی بن جاؤ اور وہ گنتی کے چند دن ہیں۔(ان دنوں سے ماہ رمضان مرادہے)(معالم التنزیل، بیان القرآن۔12 )

اور اللہ تعالی کا ارشاد ہے (سورۂ بقرہ پ2 ع23میں)

’’شَهْرُ رَمَضَانَ الَّذِیْ اُنْزِلْ فِيْهِ الْقُرْاٰنُ هُدًی لِّلنَّاسِ ÙˆÙŽ بَیِّنٰتٍ مِّنَ الْهُدٰی وَالْفُرْقَانِ ج فَمَنْ شَهِدَ مِنْکُمُ الشَّهْرَ فَلْیَصُمْهُ Ø· ‘‘

ترجمہ:ماہ رمضان وہ (برکت والا مہینہ)ہے جس میں قرآن نازل ہوا، جو لوگوں کے واسطے ہدایت ہے اور جس میں ہدایت کی اور حق و باطل میں فرق کرنے کی کھلی نشانیاں ہیں، تو جو شخص اس مہینہ کو پالے اس کو ضرور اس میں روزہ رکھنا چاہئے۔

روزہ کی تعریف:

صوم(روزہ) کے معنی شریعت میں اپنے نفس کو کھانے، پینے اور جماع سے نیت کے ساتھ صبح صادق سے لے کر غروب آفتاب تک روکنے کے ہیں۔

روزہ کا حکم اور اس کے فوائد:

روزہ اسلام کا تیسرا رکن ہے، مدینہ منورہ میں ہجرت کے ڈیڑھ برس بعد رمضان کے روزے فرض ہوئے۔ اللہ تعالی نے کئی عظیم فائدوں کی وجہ سے روزہ کو فرض کیا ہے۔ منجملہ ان فوائد کے ایک تو نفس امارہ کی اصلاح ہے؛ کیوں کہ جب روزہ کی وجہ سے نفس کو بھوکا رکھا جاتا ہے تو تمام اعضاء جسمانی سیر رہتے ہیں۔ ہر عضو اپنی اپنی خواہشات سے رک جاتا ہے اور اللہ تعالی کی اطاعت پر مائل ہوجاتا ہے۔ مثلاً آنکھ دیکھنے کے گناہ سے، زبان بولنے کے گناہ سے اور کان سننے کے گناہ سے اور فرج(شرمگاہ) شہوت کے گناہ سے محفوظ رہتے ہیں، جس سے دل کی صفائی حاصل ہوتی ہے۔ اس کے برخلاف جب نفس،روزہ نہ رکھنے کی وجہ سے کھا پی کر سیر رہتا ہے تو سارے اعضاء بھوکے ہوجاتے ہیں اور گناہ کے کاموں پر مائل ہوجاتے ہیں، جس سے دل سیاہ ہونے لگتا ہے۔

روزہ،غمخواری کا جذبہ پیدا کرتا ہے

روزہ کا ایک فائدہ یہ بھی ہے کہ روزہ رکھنے سے روزہ دار میں غربا پر شفقت اور مہربانی کرنے کی صفت پیدا ہوتی ہے، اس لئے کہ روزہ دار روزہ کی حالت میں بھوک کی جو تکلیف محسوس کرتا ہے تو اس کا یہ احساس روزہ نہ رکھنے کی حالت میں عام دنوں میں بھی باقی رہتا ہے، اس احساس کی وجہ سے وہ غریبوں سے اچھا سلوک کرتا ہے، جس کا اجر اس کو اللہ تعالی کے پاس مل جاتا ہے۔

روزہ کا ایک اور فائدہ یہ بھی ہے کہ روزہ دار کو روزہ کی وجہ سے فقراء کے حال سے موافقت پیدا ہوجاتی ہے، فقراء تو اکثر بھوکے ہی رہتے ہیں اور بھوک کی تکلیف برداشت کرتے ہیں اور روزہ دار روزہ رکھ کر بھوک کی تکلیف کو برداشت کرکے فقراء کے حال سے مشابہت پیدا کرلیتا ہے اور اس سے اللہ تعالی کے پاس اس کا درجہ بلند ہوتا ہے چنانچہ حضرت بشر حافی رحمۃ اللہ علیہ کی خدمت میں ایک شخص سخت سردی کے موسم میں حاضر ہوا۔ اس نے دیکھا کہ آپ کے کپڑے کھونٹی پر لٹکے ہوئے ہیں اورآپ سردی سے کانپ رہے ہیں، اُس نے دریافت کیا کہ آپ نے ایسی سردی میں اپنے کپڑے کیوں اتار دیئے ہیں؟ تو حضرت بشر رحمۃ اللہ علیہ نے جواب دیا بھائی!فقراء بہت ہیں اور میں ان کو کپڑے نہیں دے سکتا ہوں تو اس لئے میں کپڑے اتار کر سردی کو برداشت کررہا ہوں تاکہ ان کی اس تکلیف میں شریک ہوجاؤں ۔(مرقاۃ المفاتیح،کتاب الصوم)۔

ملخص از:نور المصابیح،ج2

 

www.ziaisamic.com