اسلامی اصولِ تربیت فطرت کے عین مطابق۔پاکیزہ ماحول میں بچوں کی نشونما لازمی‘حسن تربیت کا تقاضا

اسلام ایک آفاقی دین ہے،جس کی تعلیمات تمام طبقہائے انسانیت کی ہر زاویہ سے رہنمائی کرتی ہیں،اسلام میں تربیت اولاد کا باقاعدہ نظام مقرر ہے،اسلام کے بیان کردہ اصول تربیت فطرت کے عین موافق ہیں۔ اولاد کی تربیت‘والدین کی اہم ذمہ داری ہے،اگر وہ اس فریضہ کو بحسن وخوبی انجام دیں تو نہ صرف ان کے حق میں اجر وثواب کی بشارت ہے بلکہ اولاد ان کے لئے ذخیرۂ آخرت بھی ہیں اور سرمایۂ افتخار بھی۔ قرآن کریم میں اسی شخص کو کامیاب وبامراد قرار دیا گیا جسے جہنم سے دور کردیا گیا ہو اور جنت میں داخل کردیا گیا ہو۔(سورۃ آل عمران 185)   ایک مسلمان کے اندر یہ جذبہ ہو کہ وہ تنہا جنت میں نہ جائے بلکہ اوروں کو بھی جنت کا راستہ دکھائے،نہ صرف وہ دوزخ سے بچے بلکہ دوسروں کو بھی اس سے بچائے۔اس سلسلہ میں سب سے زیادہ جدوجہد اپنے گھروالوں اور متعلقین کے حق میں کی جائے۔ ان حقائق کا اظہار مولانا مفتی حافظ سید ضیاء الدین نقشبندی دامت برکاتہم شیخ الفقہ جامعہ نظامیہ وبانی AHIRCنے ابو الحسنات اسلامک ریسرچ سنٹر کے زیر اہتمام مسجد ابو الحسنات پھول باغ جہاں نما حیدرآباد میں منعقدہ ہفتہ واری توسیعی لکچر کے دوران کیا۔ سلسلۂ خطاب جاری رکھتے ہوئے مفتی صاحب قبلہ نے اولادکے حقوق سے متعلق حضرت فاروق اعظم رضی اللہ عنہ کے فرمان کی روشنی میں کہا کہ ’’اولاد کے لئے دیندار اور نیک سیرت ماں کا انتخاب کیا جائے‘‘۔ نکاح کے لئے دولت وحسن کے بجائے دینداری وحسن سیرت کو معیار بنایا جائے۔’’جب لڑکا پیدا ہوتو اس کا اچھا نام رکھا جائے اور اس کو قرآن کریم کی تعلیم دی جائے‘‘۔ مفتی صاحب قبلہ نےفرمایا کہ ماں باپ‘نیک ہوں یا بد؛ان کے اثرات اولاد پر مرتب ہوتے ہیں،اسی لئے والدین بھی اپنی زندگیوں کو پاکیزہ بنائیں،عام اوقات میں برائیوں اور بے حیائیوں سے بچناہی ہے لیکن ماں استقرارِ حمل کے بعد بطور خاص بے حیائی اور فحش مناظر سے بچے۔نماز،تلاوت قرآن،درود شریف اور ذکر کا اہتمام کرے۔ حمل کی مدت میں عورت کو ذہنی طور پر پریشان نہ کیا جائے۔ لڑکی تولد ہویا لڑکا‘سب اللہ تعالی کی نعمت ہیں،لڑکیوں پر لڑکوں کو ترجیح دینا اور لڑکی کی پیدائش پر ناخوش ہونا ‘درست نہیں۔اللہ تعالی کی ذات پر کامل بھروسہ ہو اور ہر حال میں اس کا شکر ادا کیا جائے۔اللہ تعالی مولود کی برکت سے رزق میں وسعت دیتا ہے۔جب بچہ پیدا ہوتو اس کے کان میں اذان کہی جائے،تحنیک کی جائے اور ساتویں دن اس کا اچھا نام رکھا جائے،عقیقہ کیا جائے اور اس کے بال نکالے جائیں۔ مفتی صاحب قبلہ نے فرمایا کہ ابتداءً ’’بچہ‘‘گفتگو تو نہیں کرتا لیکن ماحول میں جو کچھ ہوتا ہے وہ اس کے ذہن پر مرتسم ہوجاتا ہے،وہ آواز سنتا ہے،منظر دیکھتا ہے اور یادرکھ لیتا ہے اسی لئے چھوٹے بچوں کے سامنے گالی گلوج نہ کی جائے،گانا بجانا،فحش باتیں ان کے سامنے نہ ہوں۔گھر میں عبادتوں کا اہتمام ہو اور اسلامی ماحول پیدا کیاجائے؛تاکہ بچہ ایک پاکیزہ ماحول میں نشونما پاسکے۔ بچپن کا مرحلہ نرم ونازک ڈالی کی طرح ہوتا ہے،جس سمت اسے موڑ دیاجائے وہ جھک جاتی ہے،اسی لئے ضروری ہے کہ بچپن ہی سے انہیں صحیح تربیت کی جائے اور صالح فکر دی جائے۔جب بچہ بولنے کے قابل ہوتو اس سے اللہ تعالی کا مبارک نام کہلوایا جائے،بعد میں پورا کلمۂ طیبہ کہلوائیں۔  شریعت اسلامیہ نے دنیوی تعلیم کے حصول سے منع نہیں کیا ہے لیکن دنیوی تعلیم پر دینی تعلیم کو مقدم رکھا جائے۔اس دور کا المیہ یہ ہے کہ سرپرست نہ تو اولاد کو دینی تعلیم دے رہے ہیں نہ صحیح تربیت کررہے ہیں، عصری اسکولس وکالجس میں ان کی تعلیم ایسے افراد کے ہاتھوں پر ہوتی ہے جو ان کے دلوں میں اسلامی احکامات کے تئیں شکوک وشبہات پیدا کرتے ہیں،انہیں آزادانہ فکر کا حامل بنادیا جاتا ہے، نتیجۃً ان کے دل میں نہ دین کی عظمت رہتی ہے نہ مذہب کا تقدس۔  وقت کا تقاضہ کا ہے بڑے پیمانہ پر ایسے اسکولس قائم کئے جائیں جہاں دنیوی تعلیم کے ساتھ دینی تعلیم کا بہتر نظم ہو۔ دوران خطاب مولانا نےفرمایا کہ والدین‘اولاد کی تعلیم وتربیت پر مکمل توجہ کریں،والد اپنے لحاظ سے اور والدہ اپنے لحاظ سے ان کی تعلیم کا جائزہ لیتی رہے،ان کی نقل وحرکت پر نظر رکھے،اسکول کے لئے بچے گھروں سے نکلتے ہیں تو نظر رکھی جائے کہ واقعۃً وہ اسکول جارہے ہیں یا نہیں،ان کی تعلیم اور ترقی کے سلسلہ میں اساتذہ سے ربط رکھیں اور انہیں بری صحبتوں سے بچائیں۔ بچوں سے جارحانہ انداز میں گفتگو نہ کی جائے بلکہ عمدہ طریقہ سے،ان کی دل بستگی کرتے ہوئے انہیں نصیحت کریں۔مفتی صاحب قبلہ نے سنن ابو داود کے حوالہ سے کہا کہ حضور اکرم صلی اللہ علیہ وآلہ وسلم نے ارشاد فرمایا:تم اپنی اولاد کو نماز کا حکم دو!جبکہ ان کی عمرسات سال ہو اور اس میں کوتاہی پر انہیں سزادو!جبکہ ان کی عمر دس سال ہو اور ان کے بستروں کو علحدہ کردو!۔ تعلیم کے مرحلہ میں سب سے پہلے عقیدہ کی تعلیم دی جائے،اس کے بعد انہیں عبادات کا حکم دیں،حلال وحرام کے احکام اور حقوق اللہ اور حقوق العباد سے واقف کروائیں،بھلائی کو عام کرنے اور برائی سے روکنے کی ترغیب دیں،صبر وتوکل کی تعلیم دیں،اعلی اخلاق کا حامل بنائیں،بری خصلتوں سے محفوظ رکھیں،غرور وتکبر سے بچائیں اور تواضع وخاکساری،حسن ادب،حلم ووقار کے ساتھ رہنے اور طرز زندگی میانہ روی کے ساتھ رکھنے کی تلقین کریں۔ اس موقع پر آپ نے قرآنی آیات،احادیث وآثار سے تربیت اولاد کے بے مثال نمونے اور اصول بیان کئے۔ سلام ودعا پر محفل کا اختتام عمل میں آیا۔مولانا حافظ سید احمد غوری استاذ جامعہ نظامیہ نے نظامت کے فرائض انجام دئے۔ www.ziaislamic.com

Mufti Maulana Syed Zia Uddin Naqshbandi Quadri

Shaik-ul-Fiqh - Jamia Nizamia

Mufti Maulana Syed Zia Uddin Naqshbandi Quadri

Shaik-ul-Fiqh - Jamia Nizamia

News

اسلامی اصولِ تربیت فطرت کے عین مطابق۔پاکیزہ ماحول میں بچوں کی نشونما لازمی‘حسن تربیت کا تقاضا