نومولود بچوں کا قتل'ایک سنگین جرم-لڑکی کی ولادت'باعث رحمت وبرکت

نومولود بچوں کا قتل'ایک سنگین جرم-لڑکی کی ولادت'باعث رحمت وبرکت AHIRCکے زير اہتمام لکچر،مولانا مفتی سید ضياء الدین نقشبندی دامت برکاتہم  کا خطاب      "نومولود بچوں پر ظلم'معاشرہ کی بدترین تصویر"عنوان پر لکچر دیتے ہوئے مولانا مفتی حافظ سید ضياء الدین نقشبندی دامت برکاتہم شیخ الفقہ جامعہ نظامیہ وبانی ابو الحسنات اسلامک ریسرچ سنٹر نےفرمایا کہ آئے دن میڈیا کے ذریعہ یہ دلخراش وافسوس ناک واقعات منظر عام پر آرہے ہیں کہ نومولود لڑکوں اور لڑکیوں کا ناحق قتل کیا جارہا ہے،اس طرح زمانۂ جاہلیت کے باطل نظریات وفاسد افکار کو اپنایا جارہا ہے،نومولود بچوں کا قتل ایک سنگین جرم  اور بدترین گناہ ہے،ایک طرف تو نو مولود بچوں کے قتل کا المیہ ہے تو دوسری طرف اسقاط حمل کے واقعات کثرت سے پیش آرہے ہیں-         آپ  نے اس کے مختلف اسباب و وجوہ بیان کرتے ہوئے فرمایا کہ بعض افراد غربت وتنگدستی کے خوف سے یہ بہیمانہ اقدام کررہے ہیں اور بعض افراد اپنے ناجائز تعلقات کو چھپانے اور دنیا کے طعن وتشنیع سے بچنے کے لئے اس بدترین عمل کے مرتکب ہورہے ہیں- دنیا کی ذلت ورسوائی سے بچنے کے لئے تو یہ اقدام کیا جاتاہے  نتیجۃ ایسے افراد کو آخرت میں شدید ذلت ورسوائی کا سامنا کرنا پڑے گا اور انہیں سخت عذاب میں مبتلا کیا جائے گا،ان سخت دل لوگوں کو جہنم میں ڈال دیا جائے گا- دنیا میں جب کوئی شخص کسی کا قتل کرتا ہے تو اس کے خاندان والے اس کی جانب سے مقدمہ دائرکرتے ہیں،لیکن یہاں قاتل کوئی اور نہيں بلکہ اس کے ماں باپ اور خاندان والے ہیں،اس بے سہارا وبے گناہ مقتول جس کی کوئی حمایت کرنے والا نہيں،اللہ تعالی اس سے سوال کرے گا کہ بتا تجھے کس جرم کے سبب قتل کیا  گیا؟ سورۂ تکویر میں اللہ تعالی کا ارشاد ہے: وَإِذَا الْمَوْءُودَةُ سُئِلَتْ  بِأَيِّ ذَنْبٍ قُتِلَتْ - ترجمہ:اورجب زندہ دفن کی ہوئی لڑکی سے پوچھا جائے گا کہ وہ کس قصور پر قتل کی گئی-(سورۃ التکویر-8/9) آپ نے فرمایا کہ  چار ماہ کے بعد اسقاط حمل زندہ جان کو قتل کرنے کے برابر ہے،بلاعذر شرعی اسقاط حمل جائز نہيں،اگر کسی ماہر طبیب نے یہ فیصلہ کیا ہو کہ حمل ساقط نہ کروایا جائے تو بڑی جان کو خطرہ یقینی ہے تو ایسی صورت میں اسقاط حمل کی گنجائش ہے- حضرت مفتی صاحب نے فرمایا  کہ تمام اہل اسلام کا یہ عقیدہ ہے کہ اللہ تعالی ہی ساری مخلوق کا رازق ہے،ہر ایک کو رزق پہنچانا اس کے ذمۂ کرم پر ہے،لہذا معاشی بدحالی یا غربت کے خوف سے اولادکو قتل نہ کیا جائے،اللہ تعالی کا ارشاد ہے: وَلَا تَقْتُلُوا أَوْلَادَكُمْ مِنْ إِمْلَاقٍ نَحْنُ نَرْزُقُكُمْ وَإِيَّاهُمْ وَلَا تَقْرَبُوا الْفَوَاحِشَ مَا ظَهَرَ مِنْهَا وَمَا بَطَنَ وَلَا تَقْتُلُوا النَّفْسَ الَّتِي حَرَّمَ اللَّهُ إِلَّا بِالْحَقِّ ذَلِكُمْ وَصَّاكُمْ بِهِ لَعَلَّكُمْ تَعْقِلُونَ - ترجمہ:اور مفلسی کے سبب اپنی اولاد کو قتل نہ کرو!کیونکہ تم کو اور ان کو ہم ہی رزق عطا کرتے ہیں،اور بے حیائیوں کے قریب بھی نہ جاؤ!چاہے وہ ظاہری ہوں یا پوشیدہ اور جس جان کا قتل کرنا اللہ تعالی نے حرام کیا ہے اس کو قتل نہ کرو،مگر حق پر-ان باتوں کا اس نے تمہیں تاکیدی حکم دیا ہے تاکہ تم عقل والے بن جاؤ-(سورۃ الانعام-151) آپ نے ان حقائق کا اظہار AHIRCکے زیر اہتمام مسجد ابو الحسنات پھول باغ جہاں نما حیدرآباد انڈیا میں منعقدہ ہفتہ واری توسیعی لکچر میں فرمایا – آپ  نے سورۃ الانعام کی آیت نمبر 151 کے حوالہ سے فرمایا کہ اس آیت کریمہ کی ابتداء میں مفلسی کے خوف سے اولاد کو قتل کرنے سے منع کیا گیا اور پھر بے حیائيوں سے بچنے کا حکم دیا گیا،اس کے بعد پھر فرمایا گیا کہ ناحق کسی کا قتل نہ کیا جائے،اس آیت میں اس بات کی طرف اشارہ ہے کہ نہ ہی ناجائز تعلقات رکھے جائيں اور نہ  کے نتیجہ میں پیدا ہونے والی اولاد کا قتل  کیا جائے! مفتی صاحب قبلہ  نے فرمایا  کہ نومولود کسی پر بوجھ بن کر نہيں آتا بلکہ وہ اپنے ساتھ رزق لے کر آتا ہے،اولاد خواہ لڑکی ہو یا لڑکا اللہ تعالی کی نعمت ہے،اس نعمت کی قدر ان افراد سے پوچھیں جو بے اولاد ہيں-آج معاشرہ میں لڑکی کی پیدائش کو ناپسند تصور کیا جارہا ہے،اس کے وجود کو باعث عار سمجھا جارہا ہے،یہ تصور اسلام کی تعلیمات کے مغائر ہے،دین اسلام نے لڑکی کی ولادت کو باعث رحمت وبرکت قرار دیا ہے- معجم اوسط طبرانی اور کنز العمال میں حدیث شریف ہے: حضور اکرم صلی اللہ علیہ والہ وسلم نے ارشاد فرمایا:جب کسی شخص کو لڑکی پیدا ہوتی ہے تو اللہ تعالی فرشتوں کی ایک جماعت کو بھیجتاہے،وہ فرشتے تمام گھر والوں سے کہتے ہيں:اے گھر والو!تم پر سلام ہو!اس لڑکی کو فرشتے اپنے پروں سے ڈھانک لیتے ہیں اور اپنے نوارنی ہاتھوں کو اس کے سر پر پھیرتے ہیں،اور کہتے ہیں:ایک کمزور جان ہے جو کمزور جان سے نکلی ہے-اس کی نگہداشت کرنے والوں کی قیامت تک مدد کی جائے گی- جامع ترمذی میں حدیث پاک ہے:جس شخص کو لڑکیوں کے سلسلہ میں کسی طرح آزمایا جائے اور وہ اس پر صبر کرے تو وہ لڑکیاں اس شخص کے لئے دوزخ سے آڑ بن جاتی ہیں-(جامع ترمذی)- سلام ودعا پر جلسہ کا اختتام عمل میں آيا،مولانا حافظ سید احمد غوری استاذ جامعہ نظامیہ نے نظامت کے فرائض انجام دئے- <a href="../../../../">www.ziaislamic.com</a>

Mufti Maulana Syed Zia Uddin Naqshbandi Quadri

Shaik-ul-Fiqh - Jamia Nizamia

Mufti Maulana Syed Zia Uddin Naqshbandi Quadri

Shaik-ul-Fiqh - Jamia Nizamia

News

نومولود بچوں کا قتل'ایک سنگین جرم-لڑکی کی ولادت'باعث رحمت وبرکت