آيت معراج کی ایمانی وعرفانی تفسیر

آيت معراج کی ایمانی وعرفانی تفسیر از:ٍٍزبدۃ  المحدثین حضرت ابو الحسنات سید عبد اللہ شاہ نقشبندی مجددی قادری  محدث دکن علیہ الرحمۃ والرضوان                                              ہمارے آقائے نامدار حضرت محمد رسول اللہ صلی اللہ علیہ وسلم کو علم الیقین اور عین الیقین تو حاصل ہوگیا تھا اللہ تعالی کو منظور ہوا کہ حق الیقین بھی ہوجائے اس لئے ہمارے حضرت صلی اللہ علیہ وسلم اپنے جسم مطہر کے ساتھ عالم برزخ سے اور آسمانوں سے ہوتے ہوئے عرش پر پہنچے ، اپنے سرکی آنکھوں سے سب کچھ دیکھ کر اور جنت اور دوزخ کو ملاحظہ فرمایا، جس سے آپ کو حق الیقین بھی حاصل ہوگیا ، آئے اب ہم آپ کومعراج کے اجمال کی تفصیل سناتے ہیں سنئے:۔ آيت معراج کی تفسیر: سُبْحَانَ الَّذِي أَسْرَى بِعَبْدِهِ لَيْلًا مِنَ الْمَسْجِدِ الْحَرَامِ إِلَى الْمَسْجِدِ الْأَقْصَى الَّذِي بَارَكْنَا حَوْلَهُ لِنُرِيَهُ مِنْ آَيَاتِنَا إِنَّهُ هُوَ السَّمِيعُ الْبَصِيرُ- ترجمہ:وہ پاک ذات ہے جو اپنے بندہ کو  شب کیوقت مسجد حرام سے مسجد اقصیٰ تک جس کے گردا گردہم نے برکتیں کر رکھی ہیں لے گیا ‘ تا کہ ہم ان کواپنے کچھ عجائبات دکھلائیں ،بے شک اللہ تعالی بڑے سننے والے ‘ بڑے دیکھنے والے ہیں-(سورۂ بنی اسرائیل 1)      واقعہ معراج پر جو شبہے کئے جاتے ہیں ان شبہوں کے جواب کے لئے معراج شریف کے واقعہ کو’’ سبحٰن الذی‘‘سے شروع کیا گیا ہے ۔(اور)سبحان کے معنی( یہ ہیں کہ)خدائے تعالیٰ کی ذات ہر ایک قسم کے نقصان سے پاک ہے ‘ اور عاجز و کمزور بے قدرت ہونے سے بھی پاک ہے ‘‘۔معراج کے واقعہ کو لفظ ’’ سُبحان ‘‘ سے شروع کرنے سے یہ غرض ہے کہ جب معراج کے عجیب و غریب واقعہ کا جاہل و نادان ‘ کمزور عقل والے ‘ روحانیت سے دُور رہنے والے ضرور انکار کریں گے اور طرح طرح کے شبہے پیش کریں گے تو یہ شبہے معراج کے واقعہ پر ہی منحصر نہیں رہتے بلکہ خدائے تعالیٰ کے قدرت تک پہنچتے ہیں ‘ گویا خدائے تعالیٰ میں قدرت نہیں کہ معراج کراسکے ‘ اس لئے ا ﷲ تعالیٰ ان شبہوں کو دُور کرنے کے لئے واقعہ معراج بیان کرنے سے پہلے ارشاد فرماتا ہے کہ :’’سبحان الذی ‘‘معراج کس نے کرائی ؟ وہی قدرت والا خدا تو ہے جو ہر ایک طرح کی عاجزی اور کمزوری سے پاک ہے ‘ تو پھر تم کو معراج کے واقعہ میں کیوں شبہ ہے؟       باری تعالیٰ کا لفظ ’’ سبحٰن ‘‘ فرمانے کا فائدہ تو معلوم ہو چکا ہے ،(اب)لفظ ’’ اسرٰی ‘‘ سے بھی تمام شبہات دُور ہو گئے کے خود نبی صلی ا ﷲ علیہ وسلم تشریف نہیں لے گئے بلکہ خدائے تعالیٰ خود لے گیا ۔ اسری اور اذہب میں فرق      اب یہ سوال پیدا ہوتا ہے کہ ’’ اسرٰی ‘‘ کی جگہ ’’ اذہب ‘‘ کیوں نہیں فرمایا حالانکہ دونوں کے معنی ایک ہی ہیں ۔ اس کے جواب کےلئے حضور صلی ا ﷲ علیہ وسلم کی معراج کے ساتھ حضرت یونس علیہ السلام کی معراج کا تقابل کیجئے ‘ جب آپ کو ان دونوں یعنی لفظ ’’ اسرٰی ‘‘ کہنے اور لفظ ‘‘ اذہب ‘‘ نہ کہنے کا فرق معلوم ہوگا :۔ معراجِ حضرت یونس علیہ السلام      یونس علیہ السلام نے اپنے قوم کو عذاب الہیٰ سے ڈرایا اور فرمایا کہ ایمان لے آؤ، ورنہ اتنی مدّت میں عذاب الہیٰ نازل ہوگا ‘ جب وہ مدّت قریب آئی تو آپ اس خیال سے کہ یہاں عذاب نازل ہوگا ‘ وہاں سے چل پڑے ‘ مگر حق تعالیٰ سے صریح اذن نہیں لیا ۔      یہاں یہ قصّہ ہوا کہ جب عذاب کے تاریخ کی آمد ہوئی شروع ہوئی اور آثارِ عذاب دیکھ کر یہ لوگ گھبرائے اور ایمان پر آمادہ ہوئے اور یونس علیہ السلام کی تلاش کرنے لگے کہ ان کے ہاتھ پر ایمان لاویں ‘ یہ نہ ملے تو انہوں نے کہا: اگر یونس علیہ السلام نہیں ہیں تو کیا ہوا ان پر اور ا ﷲ تعالیٰ پر ایمان لانا تو ممکن ہے ‘ چناچہ ایمان لائے اور عذاب ٹل گیا ‘ یونس علیہ السلام لوگوں سے اس بستی کا حال پوچھتے رہتے تھے، جب کسی سے عذاب کی خبر نہ سنی ‘ اور پورا واقعہ معلوم نہ ہوا تو آپ کو خیال ہوا کہ اب اگر واپس بستی میں جاؤں گا تو و ہ لوگ جھٹلائیں گے کہ تمہارے قول کے موافق عذاب نہ آیا ‘ اس شرمندگی کی وجہ سے واپس نہ ہوئے بلکہ جہاں قیام فرما تھے وہاں سے آگے بڑہتے چلے گئے ‘ راستہ میں دریا پڑا ‘ اور آپ کشتی میں سوار ہو گئے ‘ اثناء راہ میں وہ کشتی  چلتے چلتے چکر کھانے لگی ‘ ملاح نے کہا :معلوم ہوتا ہے کہ اس کشتی میں کوئی غلام اپنے آقا سے بھاگا ہوا سوار ہے ‘ اس وقت یونس علیہ السلام نے فرمایاکہ ہاں بھائی میں اپنے آقا سے بدوں اجازت بھاگ آیا ہوں، مجھے اس دریا میں ڈال دو ‘ لوگوں نے آپ کی صورت سے نیکی اور بزرگی کے آثار دیکھ کر اس کلام میں شبہ کیا ‘ بالآخر قرعہ اندازی ہوئی ‘ جس میں یونس علیہ السلام کا نام نکلا ‘ پس لوگوں نے آپ کو دریا میں ڈال دیا، وہاں ایک بڑی مچھلی تھی اس نے بحکم حق آپ کو نگل لیا اور قعر دریا میں لے پہنچی ‘ چالیس دن اس کے پیٹ میں رہے مگر ہضم نہ ہوئے ‘ ا ﷲ تعالیٰ نے ان کی ہر طرح حفاظت فرمائی ’’ وہیں معراج ہوئی ‘‘۔      حضرت ابراہیم علیہ وسلم جب آگ میں ڈالے گئے ‘ آپ کو وہیں معراج ہوئی ۔      یونس علیہ السلام کا چالیں دن مچھلی کے پیٹ میں بغیر ہوا کے زندہ رہنا ۔      ابراہیم علیہ السلام کا آگ میں زندہ رہنا ’’ کیا یہ عقل کے موافق ہے ؟ ‘‘۔      ایسے ہی ہمارے حضور صلی اللہ علیہ والہ وسلم  کی معراج گو عقل میں نہ آئے مگر جو کچھ ہوا ‘ خدا ئے تعالیٰ کے قدرت سے ہوا ۔      ایک یونس علیہ السلام کا جانا ہے اور ایک ہمارے حضور صلی اللہ علیہ والہ وسلم  کا جانا کہ عشاء پڑھ کر استراحت فرمائی ہے ‘ حضرت جبرائیل علیہ السلام آکر جگاتے ہیں ‘ حضور صلی اللہ علیہ والہ وسلم ! چلئے خدا بلاتا ہے ۔      دوسرے’’ معراجیں ‘‘ خوشی سے جانا نہیں تھا ‘ حضور صلی ا ﷲ علیہ وسلم کی ’’ معراج‘‘ خوشی کا جانا تھا ‘ سیر و تفریح کا جانا تھا ‘ اس لئے اوروں کو ’’ اذھب ‘‘ کہا گیا ‘ حضور صلی ا ﷲ علیہ وسلم کو ’’ اسرٰی ‘‘ کہا گیا جو سیرپر دلالت کرتا ہے ۔      معراج جسمانی کا ثبوت قرآن کریم کی آیت سے      حضور کے بہت سے نام تھے کوئی نام نہ لے کر ’’بعبدہ‘‘ کیوں فرمایا ؟      ایک وجہ تو ’’بعبدہ ‘‘ کہنے سے یہ ہے کہ جسم کے ساتھ معراج ہونے کو بتایاجائے کیوں کہ ’’ عبد ‘‘ روح معہ جسم کو کہتے ہیں ‘ صرف روح کو عبد نہیں کہتے ۔  دوسری وجہ یہ ہے کہ حضرت عیسیٰ علیہ السلام صرف آسمان پر ا ٹھالئے گئے تو نصاریٰ ان کو ابن ا ﷲ کہنے لگے ،اسی طرح کہیں امت محمدیہ حضور صلی ا ﷲ علیہ وسلم کو آسمان بلکہ عرش پر جانے کے سبب سے "خدا یا ابن خدا" نہ کہہ دیں ‘ اس لئے پہلے ہی سے ’’ بعبدہ ‘‘کہہ کر یہ موقع ہی نہیں آنے دیا گیا۔      اس سے معلوم ہوا کہ اس امت پر کس قدر خدائے تعالیٰ کی محبت و شفقت ہے ۔      ’’ اسرٰی ‘‘ میں خود لیل (رات ) کا مفہوم شامل ہے پھر ’’ لیلاً ‘‘ اس لئے لایا گیا کہ ’’ لیلاً ‘‘ کی تنوین جو تقلیل کے لئے ہے اس سے یہ بتلایا جائے کہ تمام رات نہیں بلکہ رات کے تھوڑے سے حصہ میں واقعہ معراج ہوا ۔   معراج  کے لئے رات کا انتخاب کیوں؟      معراج دن میں ہونا چاہیئے تھی رات میں کیوں ہوئی ؟ اس کی وجہ یہ ہے کہ خدا ئے تعالےٰ نے دو جوہر پیدا کئے ‘ ایک ’’سیاہ ‘‘ دوسرا ’’ منور ‘‘۔ منور سے تمام نور نکال لیا ‘ اس کا بنایا دن ‘ باقی سے دوزخ ۔      اور سیاہ جوہر سے تمام سیاہی نکال لی ‘ اس سے بنائی رات ‘ باقی جو نور ہی نور رہ گیا ‘ اس سے بنائی ’’ جنت ‘‘ اس لئے جنت میں رات نہیں ۔ اور دوزخ میں دن نہیں ۔      دن دوزخ کا ‘ رات جنت کا جز ہے ۔اسی لئے دن میں دوزخ کی طرح پریشانیاں اور افکارات ۔اور رات میں جنت کی طرح اطمینان اور سکون ہے ۔ دن دوزخ کے جوہر سے بنا ہے اس لئے خدمت خلق کے لئے ہے ۔رات جنت کے جوہر بنی ہے اس لئے خدمت ’’ خالق ‘‘ کے لئے ۔ ’’ظاہری معشوق ‘‘ کا وصال بھی رات ہی میں ،’’حقیقی معشوق ‘‘ کا وصال بھی رات ہی میں ۔        ہر پچھلی رات کو آسمانِ دنیا پر ا ﷲ تعالیٰ کے بر آمد ہونے کی خبر دی گئی ہے ‘ دن کے کسی حصّے میں بر آمد ہونے کی خبر نہیں سنائی گئی   - شبِ قدر جو ہزار ماہ سے افضل ہے وہ بھی رات ہی میں ۔انبیاء کی معراج بھی رات ہی میں ہوئی ۔  یہ وجوہات تھے کہ دن میں معراج نہ ہوئی – مسجد اقصی تشریف لیجانے کی حکمت (اللہ تعالی کا ارشاد ہے) ’’ من المسجد الحرام الی المسجدالاقصی الذی برکنا حولہ ‘‘ترجمہ:          مسجد حرام سے مسجد اقصی تک لے گیا ،جس کے گرد اگرد ہم نے برکتیں کر رکھی ہیں ۔(سورۂ بنی اسرائيل 1)      عرش پر لے جانا مقصود تھا تو مکہ معظمہ ہی سے سیدھے عرش پر لے گئے ہوتے ‘ بیت المقدس لے جاکر پھر وہاں سے عرش پر لیجانے میں کیا حکمت تھی ۔ پہلی حکمت:اس کی ایک وجہ تو یہ ہے کہ بیت القدس ہر وقت دعا کرتا تھا کہ الہیٰ ! تمام پیغمبروں سے میں مشرف ہوچکا ‘ اب میرے دل میں کوئی آرزو باقی نہیں ہے ‘ اگر ہے تو یہ ہے کہ حضرت محمد صلی ا ﷲ علیہ وسلم کے قدم مُبارک دیکھوں ‘ ان کی ملاقات کے شوق کی آگ بے حد بھڑک رہی ہے ‘ بیت المقدس کی آرزو پوری کرنے کے لئے بیت المقدس لے جایا گیا۔ دوسری حکمت:دوسری وجہ بیت المقدس لے جانے کی یہ ہے کہ جب آپ معراج سے واپس ہوئے، کفار نے انکار کیا ‘ حضرت ابو بکر صدیق رضی اﷲ عنہ کے پاس دوڑے ہوئے گئے اور کہا: لیجئے آپ کے دوست نے ایک عجیب و غریب خبر اڑائی ہے ‘ حضرت ابوبکر صدیق رضی اﷲ تعالیٰ عنہ نے فرمایا وہ کیا ؟ کفار نے سارا واقعہ بیان کیا ‘ آپ نے فرمایا بالکل سچ ہے ‘ جب ہی سے آپ کا لقب صدیق ہوا ۔      عمر بھر میں حضرت صلی ا ﷲ علیہ وسلم کبھی بیت المقدس نہیں گئے تھے، کفار نے امتحاناً ایک ایک بات وہاں کی پوچھنا شروع کی ‘ حضرت صلی اللہ علیہ والہ وسلم  نے ایک ایک جگہ پھر کر تو دیکھا نہیں تھا ‘ اس لئے خدائے تعالیٰ نے آپ کے سامنے سے تمام حجابات اٹھا دئے ‘ پورا بیت المقدس سامنے ہو گیا ‘ کفار جو بات دریافت کرتے وہ فوراً بتادیتے ‘ جو سعید تھے انہوں نے تو آپ کے معراج کی تصدیق کرلی-  اس طرح بیت المقدس جانا بھی معراج کی دلیل ہو گیا ‘ ورنہ معراج ہونے پر آپ کیا دلیل پیش کرتے؟ کفار نے آسمان تو دیکھا نہیں تھا جو آسمانی واقعات دلیل بنتے ‘ اس لئے پہلے آپ کو بیت المقدس لے جایا گیا ‘ پھر عرش – عالم بالا کی سیر کروانے کی حکمت  صرف بیت المقدس لے جانا مقصود نہیں تھا ‘ اس لئے فرمایا ’’ لنریہ من ایتنا ‘‘ ( تاکہ ہم ان کو کچھ عجائبات دکھلائیں)       جب زمین اور آسمان پیدا ہوئے تو زمین سے آسمان نے کہا :مجھے خدائے تعالیٰ نے وہ بلندی دی ہے جو تجھے نصیب نہیں ’’والسماء رفعہا -زمین نے کہا:جیسی تیری صفت ا ﷲ تعالیٰ نے رفع سے بیان فرمائی ہے ویسے ہی میری صفت بھی ’’ بسط ‘‘ سے کی ہے ’’ واﷲ جعل لکم الارض بساطا ‘‘( ا ﷲ تعالیٰ زمین کو تمہارے لئے فرش بنایا )      آسمان نے کہا :جب ’’ آب نسیاں ‘‘ مجھ کو عطا ہوتا ہے تو میں اس کو رکھتا نہیں بلکہ بخش دیتا ہوں ۔      زمین نے کہا :جب تو اپنی سخاوت کی تعریف کرتا ہے تو میں اپنے ’ ’ حلم ‘‘ کی تعریف کروں گی ‘ جس قدر بھی بوجھ مجھ پر ڈالا جائے میں اس کو سہہ لیتی ہوں ۔      آسمان نے کہا :مجھ میں ’’ انوار‘‘ ہیں ۔      زمین نے کہا مجھ میں ’’ اسرار ‘‘ ہیں، جس کو وقتاً فوقتاً ظاہر کرتی رہتی ہوں -      آسمان نے کہا: میں آفتاب اور مہتاب سے منور  ہوں ‘ اور تاروں سے جگمگاتا رہتا ہوں ‘ شہاب ثاقب مجھ میں ہے جس سے شیطان پر رجم ہوتی رہتی ہے ۔      زمین نے کہا :تجھے کیا خبر نہیں کہ مجھ میں رنگ برنگ کے باغ و بہار ہیں اور خوشنما د رخت ‘ کہیں لالہ زار ہے تو کہیں گلاب کا چمن ‘ اور طرح طرح کے پھول ‘ جن کا رنگ علحٰدہ علحٰدہ ‘ بو علحٰدہ علحٰدہ‘ کہیں پھول پر بلبل چہچہارہا ہے تو کہیں قمر یاں راگ گا رہی ہیں ‘ یہ لطف ‘ یہ بہار ‘ بھلا تیرے یہاں کہاں ۔      زمین سے یہ باتیں آسمان نے سن کر طیش میں آکر کہا: تو پرندوں کے آواز پر کیا فخر کرتی ہے ‘ اری زمین سن! مجھ میں فرشتے بستے ہیں جو رات دن خدائے تعالیٰ کی عبادت کرتے رہتے ہیں ‘ ہمیشہ خدا کا ذکر مجھ میں ہوتا رہتا ہے ‘ فرشتوں کی یاد الہیٰ کی گونج کے سامنے بھلا تیرے پرندوں کی آوازیں کچھ چیز ہیں ؟ تجھ میں گل و گلزار ہیں تو مجھ میں انوار کے باغ ہیں ‘ تجھ میں جیسے طرح طرح کے پھول ہیں ‘ ویسے ہی مجھ میں طرح طرح کے تارے جن کی شکل علحٰدہ اور اثر علحٰدہ ‘ جب رات کے اندھیرے میں مجھ پر تارے نکل آتے ہیں تو کچھ ایسی بہار معلوم ہوتی ہے کہ تیرے سارے باغ اس پر سے تصدق کرنے کے قابل رہ جاتے ہیں ‘ میرا عالم عالم ملکوت ہے ‘ تیرا عالم اے زمین عالم نا سوت ‘ مجھ پر ارواح بستی ہیں ‘ تجھ پر اجسام ‘ ارواح کے سامنے اجسام کوئی چیز نہیں ‘ عرش مجھ پر ہے ‘ کرسی مجھ پر ہے ‘ جبرائیل و میکائیل علیہما السلام کی جگہ میں ہوں ‘ اسرافیل علیہ السلام کا ٹھکانا میں ہی ہوں ‘ لوح و قلم مجھ میں ہیں ‘ بیت المعمور مجھ میں ہے ۔ آسمان کی یہ تقریر سن کر زمین شرمندہ ہو گئی ‘ اسی شرمندگی میںِ ہزاروں سال گذر گئے ‘ جب رسول ا ﷲ صلی ا ﷲ علیہ وسلم پیدا ہوئے تو زمین خوش ہو کر فخر سے کہنے لگی: ارے وہ آسمان ! مجھ میں ’’خاتم النبیین ‘‘ محمد صلی ا ﷲ علیہ وسلم پیدا ہوئے ‘ اب بتا تجھ کو مجھ پر کس بات کی فضلیت ہے اور کس چیز پر فخر ہے ؟      یہ وہ پیغمبر ہیں کہ اٹھارہ ہزار عالم ان ہی کے وجود کا طفیلی ہے ‘ عالمِ ملکوت کے مقرب فرشتے ان ہی سے فیض لینے والے ہیں ۔      جسم مطہر اسی خاک کا ہے ،وطن و ٹھکانا بھی یہی خاک ہے -      آسمان کو کوئی جواب نہ بن پڑا ‘ مغلوب ہو کر کچھ جواب نہ دے سکا ۔ سال ہا سال تک یہی حالت رہی ‘ آسمان ‘ ا ﷲ کی درگاہ میں دعا کرنے لگا کہ اے ا ﷲ ! ایک مرتبہ اپنے محبوب صلی اللہ علیہ والہ وسلم  کو میرے اوپر لا تاکہ مجھے بھی فخر حاصل ہو ۔ ا ﷲ تعالیٰ نے زمین اور آسمان دونوں کا مرتبہ برابر کرنے کے لئے آسمان پر آپ کو معراج عطا فرمائی۔ دوسری حکمت : آسمان پر کروڑ ہا فرشتے ایسے تھے جو کسی طرح زمین پر نہیں آسکتے تھے مگر رسول ا ﷲ صلی ا ﷲ علیہ وسلم کے دیدار کے بیحد مشتاق تھے ‘ وہ فرشتے ہر روز ا ﷲ تعالےٰ سے دُعا کیا کرتے تھے : الہیٰ! ہمیں بھی تیرے نبی آخر الزماں  صلی اللہ علیہ والہ وسلم کی ملاقات سے مشرف فرما ‘‘ ا ﷲ تعالیٰ نے انکی دُعا قبول فرمائی ‘ حضرت صلی ا ﷲ علیہ و سلم کو عرش تک بلاکر فرشتوں کو آپ کی ملاقات سے مشرف فرمادیا ۔      اس سے جو شرف صحابیت کا حضرت صدیق اکبر رضی ا ﷲ تعالیٰ عنہ کو حاصل تھا ‘ وہی ’’ ساتوں آسمان کے فرشتوں کو حاصل ہوا ‘‘۔ تیسری حکمت: جب ا ﷲ تعالیٰ نے موسیٰ علیہ السلام کو فرعون کے طرف بھیجنا چاہا تو آپ کو معجز ہ دینے کے لئے فرمایا موسیٰ تمہارے ہاتھ کی لکڑی ( عصا ) زمین پر ڈالدو ‘ حضرت موسیٰ علیہ السلام نے اپنا عصا زمین پرڈال دیا ‘ وہ عصا بہت بڑا اژدہا ہو گیا ‘موسیٰ علیہ السلام خود اس سے ڈر کر بھاگے، حکم ہوا :موسیٰ ’’ خذ ھا ولا تخف ‘‘اجی موسیٰ اس کو پکڑو ‘ ڈرو نہیں ‘ موسیٰ علیہ السلام نے اس کو پکڑ لیا ‘ ڈر نکل گیا ‘ پھر جب فرعون کےسامنے عصا کو سانپ بنائے تو ڈرے نہیں ‘ اگر یہ مشق نہیں کرائی جاتی تو فرعون کے سامنے خود ڈر کر بھاگتے تو معجزہ قائم نہیں رہ سکتا تھا ۔      اسی طرح حضرت رسول ا ﷲ صلی ا ﷲ علیہ وسلم کو معراج میں بلا کر آسمانوں کی سیر کرائی گئی ‘ وہاں کے عجائب و غرائب دکھائے گئے ‘ جنت و دوزخ بتائی گئی ‘ ثواب و عذاب کے مناظر آپ کے سامنے ظاہر کئے گئے ۔جب قیامت ہوگی تو سب کو نیا معلوم ہوگا ‘ ہیبت و دہشت ایسی ہوگی کہ نفسی نفسی کہیں گے ‘ چوں کہ رسول اکرم صلی ا ﷲ علیہ وسلم کا تو یہ دیکھا ہوا ہوگا ، اس لئے آپ کو نہ ہیبت ہوگی نہ دہشت ‘ اس لئے آپ "امتی امتی" فرماتے رہیں گے ‘ اطمینان سے عاصیوں کی شفاعت فرمائیں گے ۔ آسمانوں پر بلائے جانے کا یہ بھی ایک راز تھا ۔ چوتھی حکمت: جب زلیخا کی بدنامی ہونے لگی ‘ مصرکی عورتیں طعنہ دینے لگیں تو زلیخا نے ان سب عورتوں کو دعوت دیکر بلایا ‘ ہاتھ میں میوہ اور چھری دی ’ یوسف علیہ السلام کو ان کے سامنے لائی ‘ عورتوں نے یوسف علیہ السلام کو دیکھتے ہی بجائے میوہ کے ہاتھ کاٹ لئے اور اپنی غلطی کا اقرار کیا اور کہا ’’ حَاشَ لِلَّهِ مَا هَذَا بَشَرًا إِنْ هَذَا إِلَّا مَلَكٌ كَرِيمٌ  ‘‘( حاشا ﷲ یہ انسان نہیں ہیں یہ تو بزرگ فرشتہ ہیں )۔      ایسا ہی تخلیق انسان کے وقت فرشتوں نے کہا ’’ اتجعل فیہا من یفسد فیہا و یسفک الدماء ‘‘ ( کہ آپ ایسا انسان پیدا کرتے ہیں جو زمین میں فساد کرتے رہے گا اور آپس میں خون بہائے گا ) تو جواب دیا گیا ’’ انی اعلم مالا تعلمون ‘‘ ( تو ا ﷲ تعالیٰ نے فرمایا کہ اس کی حکمت میں جانتا ہوں تم کو اس کی خبر نہیں)      اس سے اشارہ حضرت محمد صلی ا ﷲ علیہ وسلم کے طرف تھا کہ ان ہی مفسدوں کے نسل سے اور ان ہی تباہ کاروں کے اولاد سے دیکھو کیسا افضل البشر پیدا کرتا ہوں -      اس وقت تو صرف اشارہ کر کے ڈال دیا ‘ پھر معراج میں حضرت کو آسمانوں پر بلا کر سب فرشتوں کو دکھایا تو مصر کی عورتوں کے طرح سب فرشتے دنگ رہ گئے اور اپنی غلطی کا اقرار کر لیا ۔      معراج میں بہت سی حکمتیں ہیں جن میں تھوڑی سی اوپر گذر چکیں ‘ منجملہ ان حکمتوں کے ایک حکمت ’’ لنر یہ من ایتنا ‘‘(تا کہ ہم اپنے بندہ کو کچھ عجائبات قدرت دکھلائیں) ہے - واقعہ معراج:واقعہ یہ ہوا کہ ایک دن حضرت رسول ا ﷲ صلی ا ﷲ علیہ وسلم کا ایک جگہ پر گذر ہوا ‘ وہاں ابو جہل بیٹھا ہوا تھا ‘آپ کو دیکھ کر اٹھا اور اپنے مکان میں بلا کر لے گیا اور اس کوٹھری میں لے گیا ‘ جس میں سونا ‘ روپیہ ‘ ریشم وغیرہ بھرا ہوا تھا ‘ ابو جہل نے یہ چیزیں دکھا کر کہا :اے محمد ( صلی ا ﷲ علیہ وسلم) کیا تم ان تمام چیزوں کو چھوڑ کر فقر و فاقہ اختیار کرتے ہو اور دنیا سے بے رغبتی رکھتے ہو ؟      اس پر خدائے تعالیٰ نے حضرت  (صلی ا ﷲ علیہ وسلم )کے طرف وحی کی کہ " اے محمد ( صلی ا ﷲ علیہ وسلم )! ابو جہل نے تمہیں اپنے گھر میں لیجا کر وہ چیزیں دکھائیں جو اس میں موجود تھیں ‘ میں آج کی رات آپ کو آسمانوں کی سیر کراتا ہوں اور اپنے گھر میں داخل کر کے وہ چیزیں دکھا تا ہوں جو اس میں موجود ہیں ‘ تا کہ آپ کو معلوم ہوجائے کہ ابو جہل کے گھر کو میرے گھر سے کچھ مناسبت بھی ہے ؟ اس کا گھر فانی اور میرا ملک باقی - فانی ‘ باقی کے سامنے پاسنگ برابر بھی نہیں ہو سکتا ۔       اس لئے فرمایا "ہم اپنے بندہ کو مکہ شریف سے بیت المقدس راتوں رات لے گئے ’’ لنریہ من ایتنا ‘‘ تا کہ ہم اپنے بندہ کو کچھ عجائبات قدرت دکھلائیں ’’ انہ ہو السمیع البصیر‘‘ تو عجیب لطف دے رہا ہے ۔ اس معراج کی عجیب سیر میں ’’ بصیر ‘‘ ا ﷲ تعالیٰ دیکھ رہا تھا نگہبان تھا ‘ ایسا ہے جیسے مسافر کو کہنا ’’ ا ﷲ نگہبان ‘‘۔ پھر معراج سے واپسی کے بعد منکروں کے بیہودہ سوالات اور شبہوں کا جواب " ہو السمیع"ہم سن رہے ہیں ‘ سے اس طرف اشارہ ہے کہ ان کو اس کی سزا بھگتنی پڑے گی ۔ (ماخوذ از معراج نامہ) <a href="../../../../">www.ziaislamic.com</a>

Mufti Maulana Syed Zia Uddin Naqshbandi Quadri

Shaik-ul-Fiqh - Jamia Nizamia

Mufti Maulana Syed Zia Uddin Naqshbandi Quadri

Shaik-ul-Fiqh - Jamia Nizamia

News

آيت معراج کی ایمانی وعرفانی تفسیر

Mufti Maulana Syed Zia Uddin Naqshbandi Quadri

Shaik-ul-Fiqh - Jamia Nizamia

Mufti Maulana Syed Zia Uddin Naqshbandi Quadri

Shaik-ul-Fiqh - Jamia Nizamia

News

&#1570;&#1610;&#1578; &#1605;&#1593;&#1585;&#1575;&#1580; &#1705;&#1740; &#1575;&#1740;&#1605;&#1575;&#1606;&#1740; &#1608;&#1593;&#1585;&#1601;&#1575;&#1606;&#1740; &#1578;&#1601;&#1587;&#1740;&#1585;

آيت معراج کی ایمانی وعرفانی تفسیر