چاند گہن قدرت الہی کی نشانی

زمین وآسمان اور ساری کائنات کا پیدا کر نے والا اللہ تعالی ہے،شمس وقمر اور دیگر تمام سیارگان نیزتمام نظامہائے عالم علوی وسفلی اسی کی قدرت بے مثال پر موقوف اور طاقت لازوال پر منحصر ہے،ہرسیارہ اپنے محور میں گھومتاہے کوئی اپنے محور سے تجاوزنہیں کرتا،اور نہ دوسرے کے برج میں داخل ہوتاہے چہ جائے کہ ایک سیارہ دوسرے سے ٹکرائے۔ اللہ تعالی کا ارشاد ہے : وَالشَّمْسُ تَجْرِي لِمُسْتَقَرٍّ لَهَا ذَلِكَ تَقْدِيرُ الْعَزِيزِ الْعَلِيمِ ۔ وَالْقَمَرَ قَدَّرْنَاهُ مَنَازِلَ حَتَّى عَادَ كَالْعُرْجُونِ الْقَدِيمِ ۔ لَا الشَّمْسُ يَنْبَغِي لَهَا أَنْ تُدْرِكَ الْقَمَرَ وَلَا اللَّيْلُ سَابِقُ النَّهَارِ وَكُلٌّ فِي فَلَكٍ يَسْبَحُونَ -      ترجمہ:اور سورج اپنی منزل کی طرف چلتا رہتاہے ،یہ غالب اور جاننے والے کا مقرر کردہ نظام  ہے اور ہم نے چاند کے لئے منزلیں مقررکی ہیں یہاں تک کہ وہ کھجور کی بوسیدہ شاخ کی طرح ہوجاتاہے ،نہ آفتاب کی یہ مجال ہے کہ چاند کو پاسکے اور نہ رات کوطاقت حاصل ہے کہ وہ دن سے آگے ہوجائے،اور سب کے سب سیارے اپنے اپنے مدار میں محو گردش ہیں ۔(سورۃ یس۔38تا40)   چاند گہن کے واقعات رونماہونے میں قدرت کا کمال آشکار ہورہاہے ۔ جیساکہ حضور پاک صلی اللہ علیہ والہ وسلم نے ارشاد فرمایا کہ چاند وسورج اللہ تعالی کی نشانیوں میں سے دونشانیاں ہیں ،یہ واقعات کاوقوع پذیرہونااس لئے ہے کہ جسم انسانی کے ایک ایک خلیہ پر اور خشک وتر کے ہرہر خطہ میں تحقیق وریسرچ کرنے والا انسان غور کرلے کہ جس قدرت والی ذات نے ان سیاروں، چاند وسورج کو ایک دوسرے کے محاذات میں کردیا ہے ،ایک دن آئے گا کہ وہی قادر مطلق ان چمکتے دمکتے سیاروں کو بے نور کردے گا ،ان پہاڑوں کو جواستقامت وثابت قدمی میں ضرب المثل ہیں ریزہ ریزہ کرکے ذرات بے مقدار میں تبدیل کردے گا۔   دوسری حکمت یہ ہے کہ اللہ تعالی سورج گہن اور چاند گہن کے ذریعہ بندوں کوآگاہ ومتنبہ فرماتا ہے ، جیسا کہ ارشاد حق تعالی ہے: وَمَا نُرْسِلُ بِالْآَيَاتِ إِلَّا تَخْوِيفًا- ترجمہ:اور ہم نشانیاں نہيں بھیجتے مگر ڈرانے کے لئے-(سورۂ بنی اسرائیل:59) یہ واقعات گویاایک قدرتی تنبیہ ہے کہ دنیا کی محبت رکھنے والے اوردین سے غفلت کرنے والے اپنے دلوں میں خوف وخشیت پیداکریں اور غفلت ومعصیت سے بازآجائیں ،زندگی کو قدرتی نظام والہی قانون کے مطابق گزاریں ، قادر مطلق کی اطاعت وفرمانبرداری کی طرف لوٹ آئیں ۔      اس سلسلہ میں ہمیں مختلف روایتیں ملتی ہیں ،مسند امام احمد اورمجمع الزوائد،ج2،کتاب الصلاۃ، باب الکسوف ،ص 445،کی ایک حدیث پاک ملاحظہ ہو: وعن محمود بن لبيد قال كسفت الشمس يوم مات ابراهيم بن رسول الله صلى الله عليه وسلم فقالوا كسفت الشمس لموت ابراهيم ابن رسول الله صلى الله عليه وسلم فقال رسول الله صلى الله عليه وسلم إن الشمس والقمر آيتان من آيات الله عزوجل ألا وإنهما لا يكسفان لموت أحد ولالحياته فإذا رأيتموهما كذلك فافزعوا إلى المساجد ثم قام فقرأ بعض الذاريات ثم ركع ثم اعتدل ثم سجد سجدتين ثم قام ففعل كما فعل في الاولى. رواه أحمد ورجاله رجال الصحيح.      ترجمہ:حضرت محمود بن لبید رضی اللہ عنہ سے روایت ہے انہوں نے فرمایا جس دن حضرت نبی اکرم صلی اللہ علیہ والہ وسلم کے شہزادہ حضرت ابراہیم رضی اللہ عنہ کا وصال ہوا سورج گہن لگ گیا تو لوگوں نے کہا حضرت رسول اللہ صلی اللہ علیہ وسلم کے شہزادہ حضرت ابراہیم رضی اللہ عنہ کے وصال کی وجہ سے سورج گہن ہوا تو حضرت رسول پاک صلی اللہ علیہ واٰلہ وسلم نے ارشاد فرمایا :یقینا سورج اور چاند اللہ تعالی کی نشانیوں میں سے دونشانیاں ہیں ،سنو!حقیقت یہ ہے کہ انہیں کسی کی موت یا زندگی کی وجہ سے گہن نہیں لگتا،جب تم ان دونوں کو اس طرح گہن میں بے نور دیکھوتو مسجدوں کی طرف متوجہ ہوجاؤ پھر حضور  اکرم صلی اللہ علیہ واٰلہ وسلم نمازکے لئے قیام فرما ہوئے اور آپ نے سورۂ ذریات کا کچھ حصہ تلاوت فرمایا پھر رکوع فرمایاپھر آپ رکوع سے اٹھ کر سیدھاکھڑے ہوئے پھر دوسجدے کئے پھر قیام فرمایا اور پہلی رکعت کی طرح دوسری رکعت ادافرمائی۔ (مجمع الزوائد،ج2،کتاب الصلاۃ، باب الکسوف ،ص 445،،مسند امام احمد، مسند الأنصار رضي الله عنهم، حدیث نمبر:22522) اس عظیم کائنات کا نظام کسی خلل اور رکاوٹ کے بغیر قائم رہنا،قدرت الہی کی بین دلیل ہے ،فسادوبگاڑکے بغیر لیل ونہا ر کا تغیر سیارات وثوابت کی حرکت برہان عظیم ہے ،اس میں اصحاب عقل ودانش ،ارباب فکر ونظرتو غورکرتے ہیں لیکن کائنات کا نظام ہمیشہ یکساں طور پر جاری رہنے کی وجہ سے ہر فکرکی رسائی اس دلیل عظیم تک نہیں ہوتی اس لئے اللہ تعالی کبھی کبھی اس نظام میں ایسا تغیر پیداکرتا ہے اور اپنی بے نظیر قدرت کااظہار فرماتا ہے کہ ہر آنکھ محو حیرت بن جاتی ہے،ہرنگاہ حیران وششدر ہوجاتی ہے اور ہر شخص انگشت بہ دندان دکھائی دیتا ہے۔      نظام قدرت کے انہی تغیرات اور تکوینی تبدیلیوں میں سورج گہن اور چاند گہن ہیں ،اس کے ذریعہ اللہ تعالی کی قدرت کااظہار ہوتاہے کہ کیسے خداکی زبردست قدرت سے بلا کسی فساد کے نظام کائینات چل رہاہے ،پھر وہ اس نظام میں ہر قسم کی تبدیلی پر قادر ہے اس کویہ بھی قدرت حاصل ہے کہ لمحہ بھر میں نظام کائینات کو درہم برہم کرکے نسیت نابود کردے -      چاندگہن کے وقت ذکر ودعا توبہ واستغفار کرنا چاہئیے!   صحیح بخاری شریف میں حدیث پاک ہے : عَنْ أَبِي مُوسَى قَالَ خسَفَتْ الشَّمْسُ ۔۔۔۔ وَقَالَ هَذِهِ الْآيَاتُ الَّتِي يُرْسِلُ اللَّهُ لَا تَكُونُ لِمَوْتِ أَحَدٍ وَلَا لِحَيَاتِهِ وَلَكِنْ يُخَوِّفُ اللَّهُ بِهِ عِبَادَهُ فَإِذَا رَأَيْتُمْ شَيْئًا مِنْ ذَلِكَ فَافْزَعُوا إِلَى ذِكْرِهِ وَدُعَائِهِ وَاسْتِغْفَارِهِ- ترجمہ:سیدنا ابو موسی اشعری رضی اللہ عنہ سے روایت ہے انہوں نے فرمایا جب سورج  گہن ہوا تو ۔۔۔۔۔حضور  اکرم صلی اللہ علیہ والہ وسلم نے ارشاد فرمایا: یہ کسوف شمس وقمر  قدرت الہی  کی نشانیاں ہیں انہیں اللہ تعالی ظاہر فرماتا ہے ،یہ واقعات کسی کی موت اور حیات کی وجہ  سے نہیں ہوتے لیکن اللہ تعالی ان کے ذریعہ اپنے بندوں کو ڈراتا ہے تو جب  تم ان میں سے کوئی نشانی دیکھو تو اللہ تعالی کے ذکر کی طرف متوجہ ہوجاؤ اور اس کویاد کرو، اس سے دعا مانگو،اور اپنے گناہوں پر بخشش ومغفرت طلب کرو!- (صحیح بخاری شریف، باب الذكر في الكسوف، حدیث نمبر:999) سورج گہن اور چاند گہن کی نماز کے مسائل کسوف سورج گہن کو کہتے ہیں اور خسوف چاند گہن کو‘حدیث شریف میں وارد ہے کہ ’’کسوف و خسوف کسی کی موت کے سبب سے نہیں ہوتے بلکہ یہ دونوں اللہ تعالیٰ کے قدرت کی نشانیاں ہیں‘ ان سے مقصود بندوں کو خوف دلانا ہے‘ جب تم ان کو دیکھو تو نماز پڑھو‘‘۔(صحیح بخاری شریف، باب الذكر في الكسوف، حدیث نمبر:999)       صحیح بخاری و مسلم کی ایک روایت میں حضرت ام المؤمنین سیدہ عائشہ صیدیقہ رضی اللہ عنہا سے مروی ہے آپ فرماتی ہیں کہ حضرت رسول اللہ صلی اللہ تعالیٰ علیہ والہ وسلم سورج گہن کی نماز سے فارغ ہوئے اور اس وقت کسوف شمس کا انجلاء ہوگیا تھا تو مسلمانوں کو مخاطب کرکے فرمایا: مسلمانو! سنو! چاند اور سورج خدا کی قدرت کی نشانیوں میں سے دو نشانیاں ہیں‘ یہ کسی (نیک) انسان کے مرنے یا کسی (بُرے) شخص کے پیدا ہونے سے گہن نہیں ہوتے‘ جب تم شمس و قمر کو گہن ہوتا ہوا دیکھو تو اللہ کی طرف رجوع کرو‘ اللہ کو یاد کرو (اور سبحان اللہ‘ الحمد للہ‘ لا الہ الا الہ اور اللہ اکبر ) کہا کرو‘ اور کسوف کی نماز پڑھا کرو اور خیرات کرو (کہ خیرات) رد بلا ہوتی ہے۔ (صحیح بخاری ، باب الصدقة فى الكسوف .حدیث نمبر: 1044-صحیح مسلم، باب صلاة الكسوف.حدیث نمبر: 2127 - زجاجۃ المصابیح‘ج:1،ص:418/419)   نماز کسوف کے احکام:  (1) نماز کسوف بالاجماع سنت ہے-  (2) نماز کسوف جماعت سے پڑھی جائے اور وہی امام پڑھائے جو جمعہ پڑھاتا ہے۔  اگر امام جمعہ موجود نہ ہو تو پھر سب لوگ علیحدہ علیحدہ پڑھ لیں (خواہ مسجد میں یا اپنے اپنے گھروں میں)۔  (3) نماز کسوف میں خطبہ نہیں ہے۔ (4) نماز کسوف کے لئے اذان و اقامت بھی نہیں-  اگر لوگوں کا جمع کرنا مقصود ہو تو ’’الصلوٰۃ جامعة‘‘ پکار دیا جائے۔  (5) افضل یہ ہے کہ نماز کسوف عیدگاہ یا جامع مسجد میں پڑھیں (اگرچہ دوسری جگہ بھی جائز ہے)۔  (6) نماز کسوف کی دو رکعتیں ہیں اور اس کے پڑھنے کا وہی طریقہ ہے جو اور نوافل کا ہے یعنی کسوف کی نماز بلا اذان و اقامت و بغیر خطبہ کے غیر اوقات مکروہہ میں پڑھیں اور ہر رکعت میں ایک ہی رکوع کریں۔  (7) نماز کسوف کا طوالت قرأت و ارکان سے ادا کرنا مسنون ہے‘ یعنی بڑی بڑی سورتیں پڑھیں (مثلاً پہلی رکعت میں سورہ بقرہ اور دوسری میں سورہ اٰل عمران) اور رکوع و سجود بہت دیر دیر تک کرے۔ (8) نماز کسوف میں قرأت جہر سے نہ کرے۔  (9) نماز کے بعد امام کو چاہئے کہ دعا میں مشغول ہوجائے (دعا کے لئے منبر پر نہ چڑھے)۔ بہتر یہ ہے کہ عصاء یا کمان پر سہارا دے کر کھڑا ہو اور لوگوں کی طرف منہ کرکے دعا مانگے اور مقتدی آمین آمین کہیں۔  (10) دعا میں اس وقت تک برابر مشغول رہیں جب تک کہ گہن موقوف اور آفتاب صاف نہ ہوجائے۔ (11) نماز میں تطویل اور دعا میں تخفیف کرنا یا دعا میں تطویل اور نماز میں تخفیف دونوں جائز ہیں‘ لیکن ایک میں تخفیف کرے تو دوسرے میں تطویل کرے۔  (12) اوقات مکروہہ میں نماز کسوف نہ پڑھی جائے بلکہ (اس وقت) صرف دعا و استغفار میں مشغول رہیں۔  (13) اگر حالت گہن میں کسی نماز کا وقت آجائے تو دعا ملتوی کرکے نماز پڑھ لیں‘ پھر دعا میں مشغول ہوں۔ اور اگر آفتاب (بحالت گہن) غروب ہوجائے تو دعا موقوف کردیں اور نماز مغرب میں مشغول ہوجائیں۔  (14) اگر آفتاب برابر آجائے تو دعا موقوف نہ کریں۔  (15) اگر نماز کسوف گہن کے وقت نہ پڑھی گئی تو پھر گہن کے بعد نہ پڑھیں۔  (16) اگر گہن اور جنازہ دونوں جمع ہوجائیں تو پہلے جنازہ کی نماز پڑھیں۔  (17) گہن کے وقت (مستحقین کو) صدقہ اور خیرات دینا بھی مستحب ہے۔   نماز خسوف کے احکام    (1) خسوف کی نماز مستحب ہے۔  (2) نماز خسوف کی بھی دو رکعتیں ہیں لیکن اس میں جماعت نہیں (خواہ امام جمعہ موجود ہو یا نہ ہو) نیز اس نماز کے لئے مسجد جانا بھی ضروری نہیں، علیحدہ علیحدہ اپنے اپنے گھروں میں پڑھ لیں۔ از:حضرت ضیاء ملت مولانا مفتی حافظ سید ضیاء الدین نقشبندی دامت برکاتہم العالیہ   شیخ الفقہ جامعہ نظامیہ بانی ابو الحسنات اسلامک ریسرچ سنٹر <a href="http://www.ziaislamic.com/">www.ziaislamic.com</a>

Mufti Maulana Syed Zia Uddin Naqshbandi Quadri

Shaik-ul-Fiqh - Jamia Nizamia

Mufti Maulana Syed Zia Uddin Naqshbandi Quadri

Shaik-ul-Fiqh - Jamia Nizamia

Burning Topics

چاند گہن قدرت الہی کی نشانی

Mufti Maulana Syed Zia Uddin Naqshbandi Quadri

Shaik-ul-Fiqh - Jamia Nizamia

Mufti Maulana Syed Zia Uddin Naqshbandi Quadri

Shaik-ul-Fiqh - Jamia Nizamia

Burning Topics

&#1670;&#1575;&#1606;&#1583; &#1711;&#1729;&#1606; &#1602;&#1583;&#1585;&#1578; &#1575;&#1604;&#1729;&#1740; &#1705;&#1740; &#1606;&#1588;&#1575;&#1606;&#1740;

چاند گہن قدرت الہی کی نشانی