حضرت صدیق اکبر رضی اللہ تعالیٰ عنہ' حیات طیبہ کے تابندہ نقوش

حضرت صدیق اکبر رضی اللہ تعالیٰ عنہ' حیات طیبہ کے تابندہ نقوش         اللہ سبحانہ وتعالیٰ نے حضرات انبیاء کرام ورسل عظام کو شان نبوت ورسالت کے ساتھ دنیا میں جلوہ گرفرمایا اورانہیں ساری کائنات میں سب سے افضل واعلی بنایا، ان نفوس قدسیہ کے بعد فضیلت واولویت میں حضرات صحابۂ کرام رضی اللہ عنہم سر فہر ست ہیں، کیونکہ انہیں رب العالمین نے خاتم الانبیاء اما م المرسلین صلی اللہ علیہ والہ وسلم کی صحبت بافیض سے مشرف فرمایا، انہیں بحالت ایمان سرور کونین صلی اللہ علیہ والہ وسلم کے دیدار کا سنہرا موقع عنایت فرمایا۔          مسند فردوس دیلمی میں روایت ہے،حضرت نبی اکرم صلی اللہ علیہ والہ وسلم نے ارشاد فرمایا:بیشک اللہ تعالی نے تمام بندوں پر نظر انتخاب ڈالی اور میرے صحابہ سے بڑھ کر پاکیزہ دل کسی کو نہ پایا تو ان کو منتخب کیا اور میرا صحابی بنادیا۔ اب وہ جسے اچھا سمجھیں وہ اللہ تعالی کے پاس بھی اچھا ہے اور وہ جسے بُرا سمجھیں وہ اللہ کے پاس بھی بُرا ہے ۔ (مسند فردوس دیلمی )          اہل سنت وجماعت کا متفقہ عقیدہ ہے کہ تمام صحابۂ کرام میں حضرت صدیق اکبر رضی اللہ عنہ سب سے افضل ہیں، آپ کے فضائل وکمالات بے شمارہیں، قرآن مجید کی متعدد آیات مبارکہ آپ کی شان میں نازل ہوئیں،ارشاد باری تعالی ہے: وَالَّذِي جَاءَ بِالصِّدْقِ وَصَدَّقَ بِهِ أُولَئِكَ هُمُ الْمُتَّقُونَ - ترجمہ:اورجونبی سچی بات لیکر آئے اور جس نے ان کی تصدیق کی،وہی لوگ پرہیزگار ہیں۔ (سورۃ الزمر:33)         امام فخرالدین رازی رحمۃاللہ علیہ فرماتے ہیں:تصدیق کرنے والوں سے مراد ایک ہی ہستی ہیں، جو سچی بات لے کر آئے وہ سیدنامحمد صلی اللہ علیہ وسلم ہیں اور جس نے آپ کی تصدیق کی وہ حضرت صدیق اکبر رضی اللہ تعالی عنہ ہیں۔اور یہ روایت حضرت علی مرتضی رضی اللہ تعالی عنہ اور مفسرین کرام رحمہم اللہ کی ایک بڑی جماعت  سے منقول ہے۔  (التفسیر الکبیر،الدر المنثور، روح البیان، سورۃالزمر۔ 33)        اسی طرح مختلف مواقع پر حضور اکرم صلی اللہ علیہ والہ وسلم نے آپ کی فضیلت کا اظہار فرمایا، اللہ تبارک وتعالیٰ اور اس کے حبیب صلی اللہ علیہ والہ وسلم سے اتھاہ وارفتگی اور اٹوٹ وابستگی کی بنیاد پر حضرات صحابۂ کرام رضی اللہ تعالیٰ عنہم اپنے درمیان حضرت صدیق اکبر رضی اللہ تعالیٰ عنہ کو ہر اعتبار سے افضل ومقدم اور اولی وبہترجانتے اور مانتے تھے۔   ولادت باسعادت          حضرت صدیق اکبر رضی اللہ تعالیٰ عنہ کی ولادت باسعادت واقعہ فیل کے تقریبا دوسال چار ماہ بعد ہوئی۔ (الاکمال فی اسماء الرجال)         نام مبارک اور القاب شریفہ        حضرت صدیق اکبر رضی اللہ تعالیٰ عنہ کا نام نامی حضرت عبداللہ بن عثمان رضی اللہ تعالیٰ عنہما ہے ، آپ کے والد ماجد کا اسم گرامی حضرت ابوقحافہ عثمان بن عامر رضی اللہ عنہ ہے اور آپ کی والدۂ ماجدہ کا نام مبارک حضرت ام الخیر سلمی رضی اللہ عنہا ہے۔        آپ کے القاب مبارکہ میں صدیق بہت مشہور ہے، اس لقب سے آپ کو اس لئے یاد کیا جاتا ہے کہ آپ نے سب سے پہلے معجزۂ معراج کی برملا تصدیق کی، جیساکہ مستدرک علی الصحیحین  اور تاریخ الخلفاء میں روایت ہے: حضرت عائشہ صدیقہ رضی اللہ تعالی عنہا سے مروی ہے کہ شب معراج کے دوسرے دن مشرکین مکہ حضرت ابوبکر کے پاس آئے اور کہا ، اپنے صاحب کی اب بھی تصدیق کروگے ؟ ، انہوں نے دعوٰی کیا ہے"راتوں رات بیت المقدس کی سیر کرآئے ہیں"ابوبکر صدیق نے کہا:"بیشک آپ نے سچ فرمایا ہے ، میں تو صبح وشام اس سے بھی اہم آسمانی امور کی تصدیق کرتا ہوں"۔  اس واقعہ سے آپ کا لقب صدیق مشہور ہوگیا-(تاریخ الخلفاء ص،11)          اس واقعہ کے جلو میں حضرت صدیق اکبر رضي اللہ تعالی عنہ نے امت کو یہ پیغام دیا کہ نبی برحق صلی اللہ علیہ والہ وسلم مخبر صادق ہيں ،یہ ایک روشن حقیقت ہے کہ واقعہ معراج اپنے تئیں متعدد امتیازات ومعجزات کو شامل کئے ہوئے ہے-        سفر معراج کی حقیقتوں کا اقرار تو کجا اس سے بھی زيادہ تعجب خیز امور کی تصدیق کیا کرتا ہوں،آپ نے بغیر کسی تاویل کا سہارا لئے معجزۂ معراج کی تصدیق فرمادی-        دور حاضر میں امت مسلمہ کو آپ کی اس تابناک فکر سے اپنے عقیدہ وایمان کو روشن کرنے کی ضرورت ہے-        اسی طرح آپ کا ایک لقب ’’عتیق‘‘ بھی مشہور ہے ،جس کے معنی ’’آزاد‘‘ کے ہیں، حضرت ابوالحسنات سید عبد اللہ شاہ صاحب نقشبندی مجددی قادری محدث دکن علیہ الرحمہ نے جامع ترمذی کے حوالہ سے زجاجۃ المصابیح میں آپ کا لقب عتیق ہونے کی وجہ تسمیہ سے متعلق ایک روایت نقل فرمائی:ام المومنین سید تنا عائشہ صدیقہ رضي اللہ تعالی عنہا سے روایت ہے کہ حضرت  ابوبکر صدیق رضی اللہ تعالیٰ عنہ ،حضرت رسول اکرم صلی اللہ علیہ والہ وسلم کی خدمت اقدس میں حاضر ہوئے تو حضور پاک صلی اللہ علیہ والہ وسلم نے ارشاد فرمایا :تم من جانب اللہ ناردوزخ سے آزادہو، ِ فَیَوْمَئِذٍ سُمِّیَ عَتِیقًا۔ اسی دن سے آپ کو عتیق کہا جانے لگا ۔ (زجاجۃ المصابیح ، کتاب المناقب ، ج5،ص248۔  جامع الترمذی، ابواب المناقب ، باب مناقب ابی بکر الصدیق رضی اللہ عنہ ، حدیث نمبر: 3612)   صدیق اکبر رضی اللہ تعالیٰ عنہ کی استقامت          جب حضرت ابوبکر صدیق رضی اللہ تعالیٰ عنہ ایمان لے آئے تو کفار مکہ مظالم ڈھانے لگے ، آپ کو مصائب ومشکلات میں ڈالا جانے لگا ، تبلیغ اسلام کے سلسلہ میں رکاوٹیں کھڑی کی جانے لگیں، اورآپ کو عبادتوں سے روکا گیا ، حضرت صدیق اکبر رضی اللہ تعالیٰ عنہ اپنے دولت خانہ میں عبادت وریاضت کیا کرتے او رتلاوت کلام مجید فرمایا کرتے ، کفار یہ بھی برداشت نہ کرسکے ، آپ کو ستایا اور تکلیفیں دیں ، ستم کی انتہاء ہوگئی، اسی وجہ سے آپ نے مکہ مکرمہ چھوڑنے کا ارادہ کرلیا اور حبشہ کی طرف ہجرت کے ارادہ سے تشریف لے جانے لگے ، حضرت ام المومنین سیدتنا عائشہ صدیقہ رضی اللہ تعالیٰ عنہا فرماتی ہیں: جب راستہ میں ابن دغنہ جو ایک مشہور قبیلہ قارہ کا سردار تھا ، آپ سے ملا اور دریافت کیا کہ کہاں کا ارادہ ہے؟ آپ نے تفصیل بیان کی تو وہ کہنے لگا : بے شک آپ تو ناداروں کو کماکر دیتے ہیں ، صلہ رحمی کرتے ہیں،کمزوروں کا بوجھ اٹھاتے ہیں ،مہمان نوازی کرتے ہیں اور حق کی راہ میں آنے والی مصیبتوں کے موقع پر مددکرتے ہیں ۔          یہ کہہ کر اس نے آپ کو واپس چلنے کے لئے کہا کہ آپ جیسے لوگوں کو تو مکہ مکرمہ میں رہنا چاہئے ، چلئے میں آپ کو امان دیتا ہوں او رمکہ مکرمہ پہنچ کر اس نے اعلان کردیا کہ آج سے میں ابوبکر کی حفاظت کا ذمہ دار ہوں ، لیکن بعد میں حق کی راہ میں ایسی رکاوٹیں آنے لگیں کہ ابن دغنہ نے آپ کی حفاظت کا وعدہ توڑدیا۔ (صحیح البخاری ، کتاب الکفالۃ ، باب جوارابی بکر فی عہدالنبی وعقدہ ، حدیث نمبر: 2297)          ابن دغنہ نے جن صفات سے آپ کو یاد کیا ان تمام صفات کا تعلق حضور پاک صلی اللہ علیہ والہ وسلم کے پاکیزہ عادات واطوار سے تھا، حضور پاک صلی اللہ علیہ والہ وسلم نے نزول وحی کے آغاز کے بعد جب حضرت خدیجہ رضی اللہ تعالیٰ عنہا کو تفصیل بتائی تو آپ نے دستگیر بیکساں صلی اللہ علیہ والہ وسلم  کو انہی صفات کا تذکرہ کرکے تسلی دی تھی ، چارہ ساز درمنداں کی خدمت میں مسلسل حضوری اور صحبت بافیض سے مشرف ہونے کی وجہ یہ تمام خصائل حضرت صدیق اکبر رضی اللہ عنہ کی شخصیت میں رچ بس گئے۔  قوم کا ملجاوماوی        انسانی رواداری کا کوئی گوشہ ایسا نہ تھا جس میں حضرت صدیق اکبر رضي اللہ تعالی عنہ نے اپنا نمایاں کردار ادا نہ کیا ہو،رشتہ داری ،صلہ رحمی اور مہمان نوازی میں لوگ کسی حد تک تو کامیاب رہتے ہیں لیکن اپنی محنت کے ثمرات کو غیروں کے استفادہ کے لئے پیش کرنا،نادار وناتوانوں کی دادرسی کرنا بغیر کسی ذاتی منفعت کے اوروں کا بوجھ اٹھانا ،اور ہر کس وناکس کی مدد وتعاون کے لئے ہر آن کمر بستہ رہنا، دنیا،یہ تمام خوبیاں حضرت صدیق اکبر رضي اللہ تعالی عنہ کی شخصیت میں بدرجہ اتم واکمل موجود تھیں،انسانی اقدار کو مد  نظر رکھتے ہوئے آپ کی زندگی کا مطالعہ کیا جائے تو یہ بات روز  روشن کی طرح واشگاف ہوتی ہے کہ آپ کی ساری زندگی فروغ انسانی وسائل (Human Resource development) اور سماجی صلاح وفلاح کے لئے گزری-        یہ ایسے امور ہیں جو معاشرہ کی صلاح اور انسانیت کی رفاہ کے لئے انجام دئے جاتے ہیں،قوم کے مظالم سہنے کے باوجود آپ نے اپنے معمولات میں کوئی فرق آنے نہ دیا،آپ کی شخصیت کے ان تابندہ نقوش کو جب اعداء دین نے دیکھا تو قلبی طور پر تو آپ کی دلنواز اداؤں پر ناز برداری کرنے لگے،لیکن شومئ قسمت کہ ان کی زبانوں نے اس فخر واعزاز کے اظہار کی اجازت نہ دی،بالآخر ابن دغنہ کی قائدانہ نظریں ان خوبیوں کا اعتراف کئے بغیر نہ رہ سکیں،وہ کہنے لگا: إِنَّ مِثْلَكَ لاَ يَخْرُجُ وَلاَ يُخْرَجُ- ترجمہ :ایسی باعظمت شخصیت کو نہ کہیں جانا چاہئے نہ ہی انہیں کوئی نکالنے کا ناقص ارادہ کرے- اہل مکہ  عقیدہ وایمان میں تو ضرور کور باطن تھے لیکن حضرت صدیق اکبر رضي اللہ تعالی عنہ کے وجود کو قوم کی بہبود اور افتخار کا باعث سمجھتے تھے،پھر جب آپ سے امان اٹھالی گئی تب بھی خدمت خلق کا سلسلہ جاری رہا اور آپ کے جذبۂ حق کے حوصلہ میں کسی قسم کی کمی نہيں پائی گئی،آپ بلا توقف تبلیغ اسلام کے سلسلہ سے جڑے رہے-        حضرت صدیق اکبر رضی اللہ عنہ کے بے شمار فضائل ہیں،اسلام قبول کرنے سے پہلے آپ نے نہایت پاکیزہ زندگی بسر کی ،آپ قوم کے باوقار فرد کی حیثیت سے جانے جاتے تھے،آپ کو عالم  عرب میں  سماج کا ذمہ دار  اور معاشرہ کی ارتقاء کا علمبردار سمجھا جاتا تھا،قبائل عرب آپ کی فکری صلاحیتوں اور درست آراء سے استفادہ کیا کرتے تھے،سرداران قریش آپ کی عظمتوں کا اعتراف کیا کرتے اور اپنے اہم معاملات  میں آپ سے قیمتی مشورے  لیا کرتے تھے ، حضرت امام نووی رحمۃ اللہ علیہ فرماتے ہیں: حضرت ابوبکر صدیق رضی اللہ تعالیٰ عنہ کا شمار سرداران قریش سے تھا، آپ انہیں مشورے دینے والوں میں تھے، ان میں آپ کی شخصیت نہایت محبوب تھی اور آپ ان کے معاملات کو بہتر طور پر جاننے والے تھے ۔ راہ خدا میں انفاق        آپ کی مساعی جمیلہ اور کاوشوں کے ذریعہ کئی افراد مشرف بہ اسلام ہوئے،راہ خدا میں آپ اپنا مال بے دریغ خرچ فرمایاکرتے،ایک موقع پر چالیس ہزار اشرفیاں راہ خدا میں اس طرح خرچ فرمائیں کہ دن میں دس ہزار ،رات میں دس ہزار،پوشیدہ طورپر دس ہزار ، اور لوگوں کو ترغیب دلانے کی خاطر علانیہ طورپر دس ہزار ، آپ کا یہ عمل بارگاہ الہی میں اس قدر مقبول ہوا کہ اللہ تعالی نے آپ کی مدح وتوصیف میں آیت کریمہ نازل فرمائی،ارشادباری تعالی ہے:   الَّذِینَ یُنْفِقُونَ أَمْوَالَہُمْ بِاللَّیْلِ وَالنَّہَارِ سِرًّا وَعَلَانِیَۃً فَلَہُمْ أَجْرُہُمْ عِنْدَ رَبِّہِمْ وَلَا خَوْفٌ عَلَیْہِمْ وَلَا ہُمْ یَحْزَنُونَ   ترجمہ:وہ لوگ جو اپنے مال کو رات اور دن میں، پوشیدہ اور علانیہ طورپر خرچ کرتے ہیں تو ان کے لئے ان کے رب کے پاس ان کااجر ہے،ان پر نہ کوئی خوف ہے اورنہ وہ رنجیدہ ہوں گے-   (سورۃ البقرۃ274)          امیہ بن خلف نے جب حضرت بلال رضی اللہ تعالی عنہ پر مظالم کی انتہاء کردی تو حضرت صدیق اکبر رضی اللہ تعالی عنہ نے آدھا سیر سونے کے بدلہ آپ کو خرید کرآزاد کیا، حضرت صدیق اکبر رضی اللہ تعالی عنہ کے والدنے "جو ابھی مشرف بہ اسلام نہیں ہوئے تھے"کہا کہ اسقدر کثیر صرفہ سے کمزورافراد کو آزاد کروانے کے بجائے کسی طاقتور شخص کو آزاد کرواؤ، تاکہ مصیبت کے وقت وہ ہمارا معاون و مددگار رہے، حضرت صدیق اکبر رضی اللہ تعالی عنہ نے جواب دیا کہ میں نے یہ عمل کسی دنیوی بدلہ کے لئے نہیں بلکہ اللہ تعالی کی رضا وخوشنودی کے حصول کے لئے کیاہے،آپ کے خلوص نیت اور عمل کی پاکیزگی کاتذکرہ اللہ تعالی نے قرآن کریم میں اس طرح فرمایا: وَسَیُجَنَّبُہَا الْأَتْقَی  الَّذِی یُؤْتِی مَالَہُ یَتَزَکَّی  وَمَا لِأَحَدٍ عِنْدَہُ مِنْ نِعْمَۃٍ تُجْزَی  إِلَّا ابْتِغَاءَ وَجْہِ رَبِّہِ الْأَعْلَی  وَلَسَوْفَ یَرْضَی ۔  ترجمہ:اور یقینا اسے (جہنم)سے دوررکھا جائے گاجو سب سے بڑاپرہیزگارہے،جو اپنا مال خرچ کرتا ہے تاکہ پاک ہو،اور کسی کا اس پر احسان نہیں جس کا بدلہ دیاجائے،وہ صرف اپنے رب کی رضا چاہتا ہے جوسب سے بلند ہے اوربے شک وہ راضی ہوگا۔   (سورۃ اللیل 17/21)   میدان عمل کے پیشرو شہ سوار          رضاء الہی کے حصول کی خاطر  حضرت صدیق اکبر رضی اللہ تعالیٰ عنہ کا ہمیشہ یہی معاملہ رہا ،جہاں آپ نے رفاہ عام اور فلاح عوام کے لئے مساعی جمیلہ انجام دیں اپنی شخصی زندگی میں بھی آپ نے کوئی نیکی کرنے میں غفلت نہ کی، بلکہ ہمیشہ اسے انجام دینے میں سبقت فرمایا کرتے، یہی وجہ ہے کہ آپ ابوبکر کی کنیت سے مشہور ہوگئے ہے، دراصل ’’بکر‘‘ کے معنی ابتداء وآغاز کے ہیں اور ابوبکر کے معنی پہل کرنے والے‘ اوّلیت رکھنے والے کے ہوتے ہیں، اسم بامسمی آپ نیکی کے ہر کام میں پہل فرماتے، اور ہر کار خیر کو بخوبی انجام دیا کرتے، چنانچہ صحیح مسلم شریف میں حدیث پاک ہے:  حضرت ابوہریرہ رضی اللہ تعالیٰ عنہ سے روایت ہے ،انہوں نے کہا، حضرت رسول اللہ صلی اللہ علیہ والہ وسلم نے ارشاد فرمایا: تم میں وہ کون شخص ہے جس نے آج روزہ رکھا؟ حضرت ابوبکر صدیق رضی اللہ عنہ نے عرض کیا: میں !حضور پاک علیہ الصلوٰۃ والسلام نے ارشاد فرمایا:تم میں وہ کون شخص ہے جس نے آج جنازہ کو کندھا دیا ؟ حضرت ابوبکر صدیق رضی اللہ تعالیٰ عنہ نے عرض کیا: میں! حضور پاک علیہ الصلوٰۃ والسلام نے ارشاد فرمایا :  تم میں وہ کون شخص ہے جس نے آج مسکین کو کھانا کھلایا؟ حضرت ابوبکر صدیق رضی اللہ تعالیٰ عنہ نے عرض کیا: میں!حضور پاک علیہ الصلوٰۃ والسلام نے ارشاد فرمایا : تم میں آج کس نے مریض کی عیادت کی؟ حضرت ابوبکر صدیق رضی اللہ تعالیٰ عنہ نے عرض کیا: میں!تو حضرت رسول اللہ صلی اللہ علیہ والہ وسلم نے ارشاد فرمایا :یہ (خصلتیں ) جس کسی میں جمع ہوجائیں وہ جنت میں داخل ہوگا ۔ (صحیح مسلم کتاب فضائل الصحابۃ باب من فضائل ابی بکر الصدیق ، حدیث نمبر: 6333)   ایثار وقربانی          حضرت صدیق اکبر رضی اللہ تعالی عنہ کی جامع الکمالات شخصیت جس طرح میدان عمل میں پیش پیش و مقدم رہی اسی طرح صحابہ کرام کے درمیان دیگر احوال وکیفیات میں آپ کی کوئی نظیر ومثال نہیں، آپ نے اللہ تعالیٰ اور اس کے حبیب صلی اللہ علیہ والہ وسلم سے اپنے جذبۂ عقیدت کا جس طرح اظہار کیا ؛ اسے بجالانااور اس پر عمل کرنا تو درکنار اسے اپنے وہم و گمان میں بھی نہیں لایا جاسکتا، حضرت فاروق اعظم رضی اللہ تعالیٰ عنہ فرماتے ہیں کہ میں حضرت صدیق اکبر رضی اللہ عنہ سے کسی معاملہ میں سبقت نہیں کرسکتا ،چنانچہ صحاح ستہ میں حدیث پاک ہے ، حضرت عمر فاروق رضی اللہ تعالیٰ عنہ روایت فرماتے ہیں: حضرت رسول اکرم صلی اللہ علیہ والہ وسلم نے ہمیں صدقہ کرنے کا حکم فرمایا ، اتفاق ایسا ہو ا کہ اس وقت میرے پاس کافی مال تھا ، میں سوچنے لگا کہ آج میں حضرت ابوبکر صدیق رضی اللہ تعالیٰ عنہ سے سبقت کر جاؤنگا، اس ارادہ سے میں نے اپناآدھا مال بارگاہ رسالت میں پیش کیا اور حضرت ابوبکر صدیق رضی اللہ تعالیٰ عنہ نے اپنے پاس جو کچھ تھا وہ سب بارگاہ نبوی میں پیش کردیا ، چنانچہ حضور پاک صلی اللہ علیہ والہ وسلم نے ارشاد فرمایا کہ اے عمر! گھر والوں کے لئے کیاچھوڑآئے ہو؟ تو میں نے عرض کیا :آدھا مال چھوڑ آیا ہوں ،پھر حضورپاک صلی اللہ علیہ والہ وسلم نے حضرت ابوبکر صدیق رضی اللہ تعالیٰ عنہ سے ارشاد فرمایا :آپ اپنے گھر والوں کے لئے کیا چھوڑآئے ہو؟ تو حضرت صدیق اکبر رضی اللہ تعالیٰ عنہ نے عرض کیا :  أَبْقَیْتُ لَہُمُ اللَّہَ وَرَسُولَہُ قُلْتُ وَاللَّہِ لاَ أَسْبِقُہُ إِلَی شَیْءٍ أَبَدًا - میں ان کے لئے اللہ تعالیٰ او راس کے رسول صلی اللہ علیہ والہ وسلم کو چھوڑآیا ہوں ، حضرت فاروق اعظم رضی اللہ تعالیٰ عنہ فرماتے ہیں :میں کہنے لگا ، خدا کی قسم !میں ان سے کسی چیز میں آگے نہیں بڑھ سکتا ۔ (جامع الترمذی ، کتاب المناقب، باب فی مناقب ابی بکر وعمر ، حدیث نمبر: 4038، سنن ابی داود ، کتاب الزکوٰۃ ، باب فی الرخصۃ فی ذلک ۔ ۔ ۔ حدیث نمبر: 1680المستدرک علی الصحیحین،کتاب الزکوۃ ، حدیث نمبر: 1457)          حضرت صدیق اکبر رضی اللہ تعالیٰ عنہ نے نہ صرف اپنے جذبۂ عقیدت کا اظہار کیا ،بلکہ امت کو یہ پیغام دیا اور اس بات کا اعلان کردیا کہ گھر میں مال ودولت ختم ہوجائے توکوئی بات نہیں ،ہم دربار رسول کے دربان ہیں ،ہماری دیکھ بھال ونگرانی، حبیب خدا صلی اللہ علیہ والہ وسلم کی نظرعنایت اورکرم نوازی پر ہے ، دنیوی مال ودولت ہو یا اشیاء خورد ونوش سب کچھ اسی داتاکی مملکت سے ملتا ہے   ؂   پروانہ کو چراغ ہے ‘بلبل کو پھول بس   صدیق کے لئے ہے خدا کا رسول بس         چنانچہ آپ نے حضور پاک علیہ الصلوٰۃ والسلام سے عرض کیا کہ سارا مال آپ کی خدمت میں حاضر ہے اور گھر میں اللہ تعالیٰ اور اس کے حبیب صلی اللہ علیہ والہ وسلم کو چھوڑ کر آیا ہوں ، جب حضرت فاروق اعظم رضی اللہ تعالیٰ عنہ نے آپ کی یہ عقیدت  دیکھی تو کہدیا کہ میں کسی معاملہ میں آپ سے آگے نہیں بڑھ سکتا۔ توشۂ آخرت کے لئے دعوت فکر         حضرات شیخین رضي اللہ تعالی عنہما کا یہ کردار امت مسلمہ کی افکار وکردار کو آگہی بخش رہا ہے کہ مسابقت کی دوڑ میں تو ہر کوئی کامیابی کا امیدوار رہتا ہے ،فکر یہی رہتی ہے کہ کسی طرح ترقی کے منازل طئے ہوجائیں،اس انداز کو محض دنیوی ارتقاء تک محدود نہ رکھا جائے  بلکہ اس کے ذریعہ آخرت کے لئے زادراہ بھی تیار کرلیا جائے،اسی توشۂ آخرت کی خاطر حضرت صدیق اکبر رضی اللہ تعالی عنہ نے گھر بار،سبزہ زار،باغ وبہاراوراپنی ساری پونجی اور دولت کا انبار، دو عالم کے مختار صلی اللہ علیہ والہ وسلم کے قدموں میں نثار کردیا- بارگاہ رسالت سے اٹوٹ وابستگی اور حسن ادب        اللہ تعالیٰ اور حبیب کریم صلی اللہ علیہ والہ وسلم سے عقیدت کے معاملہ میں حضرت صدیق اکبر رضی اللہ تعالیٰ عنہ کو امتیازی شان حاصل تھی ، حضور پاک صلی اللہ علیہ والہ وسلم سے آپ کی مضبوط وابستگی اورکامل عقیدت کا اندازہ اس حدیث پاک سے بھی لگایا جاسکتا ہے جو صحیح بخاری شریف میں مروی ہے : واقعہ یوں ہو ا کہ حضوراکرم صلی اللہ علیہ والہ وسلم صلح کے ایک معاملہ میں قبیلہ بنی عمر و بن عوف کے پاس تشریف لے گئے ، اس دوران نماز کا وقت آگیا ، مؤذن رسول صلی اللہ علیہ وسلم حضرت صدیق اکبررضی اللہ عنہ کے پاس آئے اور امامت کرنے کی درخواست  کی ،چنانچہ اقامت کہی گئی او ر آپ امامت کرنے لگے ،اسی اثنا میں رسول پاک صلی اللہ علیہ والہ وسلم تشریف فرماہوئے،حضرت صدیق اکبر رضي اللہ تعالی عنہ  کی نماز کا یہ حال ہوتا کہ کسی طرف متوجہ نہیں ہوتے ، صحابۂ کرام آپ کو حضور پاک صلی اللہ علیہ والہ وسلم کی آمد کا احساس دلانے لگے ، بالآخر آپ متوجہ ہوئے تو دیکھا کہ امام الانبیاء صلی اللہ علیہ وسلم تشریف فرماہوچکے ہیں ، فورًا مصلے سے پیچھے ہٹے اورصف میں شامل ہوگئے ، حضور پاک صلی اللہ علیہ والہ وسلم نے آپ کو امامت کا حکم بھی فرمایا! لیکن آپ پیچھے ہٹ گئے ، پھرامام الانبیاء صلی اللہ علیہ والہ وسلم نے امامت فرمائی ، نماز مکمل ہونے کے بعد حضور پاک صلی اللہ علیہ والہ وسلم نے ارشاد فرمایا : اے ابوبکر ! میرے حکم دینے کے باوجود تمہیں اپنی جگہ قائم رہنے سے کس چیز نے روکا؟ تو حضرت ابوبکر رضی اللہ عنہ نے عرض کیا:ابوقحافہ کے بیٹے کی کیا مجال کہ حضرت رسول اللہ صلی اللہ علیہ والہ وسلم کے آگے نماز اداکرسکے۔ (صحیح البخاری ، کتاب الاذان ، با ب من دخل لیؤم الناس، حدیث نمبر: 684)        صدیق اکبر رضی اللہ عنہ نے نماز میں نہ صرف حضور اکرم صلی اللہ علیہ والہ وسلم  کا خیال لایا بلکہ عین حالت نماز میں حبیب کریم صلی اللہ علیہ وسلم کا دیدار کیا، ادب بجالایا ، پیچھے ہٹ گئے ، او رپوچھنے پر عرض کیا کہ بات کچھ اور نہیں تھی ، میرے ادب نے گوارا نہ کیا کہ امام الانبیاء کے آگے نماز پڑھ سکوں، نہ ہی رحمۃللعالمین صلی اللہ علیہ وآلہ وسلم نے آپ کے اس عمل پرنکیر فرمائی اور نہ آپ کے اس جذبۂ عقیدت کوناپسندکیاگویا حضرت صدیق اکبر رضی اللہ تعالی عنہ نے عملی طور پر امت کو یہ پیغام دیا کہ عبادتوں میں ذات رسالت سے  کمال عقیدت  اور عنصرادب کو شامل رکھنا ہی قبولیت عمل کی دلیل اور خوشنودئ الہی کا باعث ہے۔   خوشنودئ الہی ورضائے مصطفوی کی خاطر آپ نے جو قربانیاں پیش فرمائیں،رب العالمین نے انہیں اپنی بارگاہ میں شرف قبولیت بخشی اور آپ کے حق میں اپنی خصوصی رضامندی کا اعلان فرمایا،چنانچہ تفسیر قرطبی میں حضرت عبد اللہ بن عمر رضی اللہ عنہما سے روایت مذکور ہے : حضرت سیدناصدیق اکبر رضی اللہ عنہ نے اپناسارا مال ومتاع راہ خدا میں خرچ کرنے کے بعد ایک پیوندزدہ عباء پہن کر حاضربارگا ہ ہوئے جس میں گنڈیوں کی جگہ کانٹے لگے ہوئے تھے ، اسی لمحہ طائر سدرہ جبریل امین پیغام ِخداوندی لے کر حاضر ہوئے اور عرض کیا:یارسول اللہ صلی اللہ  علیہ وسلم !اللہ تعالی صدیق اکبر کو سلام فرماتاہے ،آپ اُن سے دریافت کریں کہ وہ اس فقر کی حالت میں اپنے رب سے راضی ہیں یا نہیں؟حضور  اکرم صلی اللہ علیہ والہ  وسلم نے جب حضرت صدیق سے فرمایا تو آپ بے اختیارروپڑے اور کہنے لگے میں اپنے رب سے ناراض کیسے ہوسکتا ہوں؟ بے شک میں اپنے رب سے راضی ہوں ،اس کو تین بار دہراتے رہے ۔حضرت جبریل نے عرض کیا :حضور! بیشک اللہ تعالی فرماتاہے ؛میں اُن سے راضی ہوچکا ہوں جس طرح وہ مجھ سے راضی ہیں، اور اللہ کے حکم سے تمام حاملین عرش بھی وہی لباس پہنے ہوئے ہیں جوآپ  کے صدیق نے پہنا ۔ (تفسیر قرطبی ،سورۃ الحدید ، آیت نمبر 10)   خیر البشر بعد از انبیاء          عقائد ، عبادات او رمعاملات ،حضرت صدیق اکبر رضی اللہ عنہ کی شخصیت کے جس گوشہ پر نظر ڈالی جائے،اور جس پہلو کو دیکھا جائے آپ فضل وکمال کی بلندیوں پر فائز ہیں اوریہ بات بھی مسلم ہے کہ تمام صحابۂ کرام آپ کے فضائل وکمالات کے معترف تھے اور آپ کی عظمت کا اظہار بھی فرمایا کرتے تھے ،چنانچہ اس سے متعلق مولائے کائنات حضرت علی مرتضی کرم اللہ وجہہ کا ارشادمبارک ہے: حضرت ابو جحیفہ رضی اللہ عنہ سے روایت ہے،انہوں نے فرمایا:میں نے حضرت علی کرم اللہ وجہہ کوفرماتے ہوئے سنا: حضرت نبی کریم صلی اللہ علیہ وسلم کے بعداس امت میں سب سے بہتر حضرت ابوبکر صدیق رضی اللہ عنہ ہیں۔   (مسند الامام احمد،مسند علی بن ابی طالب رضی اللہ عنہ ،حدیث نمبر:845۔مصنف بن ابی شیبۃ،ج7،ص475)        چنانچہ جب حضور اکرم صلی اللہ علیہ والہ وسلم کے وصال باکمال کی کیفیات شروع ہوئیں تو آپ نے حضرت صدیق اکبر رضی اللہ عنہ کو مسجد نبوی میں امامت کا حکم فرمایا ،اس وقت آپ نے سترہ(17)نمازوں کی امامت فرمائی۔   خلافت صدیقی پر تمام صحابہ کرام کا اتفاق        وصال نبوی کے بعد جب خلافت کا مسئلہ درپیش ہوا تو مہاجرین وانصا ر تمام صحابہ کرام نے متفقہ طور پر حضرت صدیق اکبر رضی اللہ تعالیٰ عنہ کو خلیفۃ المسلمین منتخب کیا اور آپ کے دست مبارک پر بیعت کی ۔          اس تفصیل کوعلامہ یوسف  بن اسمعیل نبہانی علیہ الرحمہ نے حضرت غوث اعظم رضی اللہ عنہ کے حوالہ سے یوں نقل کیا کہ حضرت عمر فاروق رضی اللہ عنہ نے فرمایا:تم میں وہ کون ہے، جو یہ چاہتا ہے کہ حضرت صدیق اکبر رضی اللہ عنہ کو اس مقام سے ہٹادے ، جس پر انہیں حضرت رسول کریم صلی اللہ علیہ وسلم نے فائز فرمایا؟ توتمام صحابہ کرام نے کہا : اللہ معاف کرے! ہم میں کوئی اس بات کوگوارا نہیں کرسکتا۔          حضرت غوث اعظم رضی اللہ عنہ بیان فرماتے ہیں:مہاجرین کے ساتھ انصار صحابہ کرام نے بھی آپ کی خلافت پر اتفاق کیا اور سبھوں نے بیعت کی ، جن میں حضرت علی رضی اللہ عنہ اور حضرت زبیررضی اللہ عنہ سرفہر ست ہیں ۔          اور قابل اعتبار روایات میں یہ بات بھی آئی ہے کہ حضرت صدیق اکبر رضی اللہ عنہ بیعت لینے کے بعد تین دن تک مسلسل لوگوں سے ملاقات کرنے لگے اور ان سے کہتے کہ لوگو! کیا تم نے بیعت کرلی ہے؟ اگر اس میں کوئی رکاوٹ ہوتووہ بیعت سے دستبردار ہوجائے!،تو صحابہ کرام میں سب سے پہلے حضرت مولائے کائنات سید نا علی مرتضی کرم اللہ وجہہ کہنے لگے:نہ ہم بیعت توڑیں گے او رنہ کبھی اس کا مطالبہ کریں گے، کون آ پ کو نظر انداز کرسکتا ہے جبکہ حضرت رسول اللہ صلی اللہ علیہ وسلم نے آپ کو مقدم کیا ہے ۔        جنگ جمل کے بعد حضرت عبداللہ بن الکواء نے حضرت علی مرتضی کرم اللہ وجہ سے دریافت کیا کہ خلافت سے متعلق کیا آپ کو حضور پاک علیہ الصلوٰۃ والسلام نے کچھ فرمایا تھا؟ تو آپ نے ارشا د فرمایا :ہم نے خلافت کے معاملہ میں غور وفکر کیا ، یہ بات آشکار ہوئی کہ نماز اسلام کا  اہم ستون ہے ،( جس کی امامت کے وہ حقدار ٹہرے) گویا اللہ تعالی اوراس کے پیارے رسول صلی اللہ علیہ وسلم نے دین کے معاملہ میں ان سے اپنی رضامندی کا اظہار فرمایا،لہذا ہم نے دنیوی معاملات کے لئے انہیں قبول کرلیا اور خلافت کا معاملہ ان کے سپرد کردیا۔(الاسالیب البدیعۃمع شواہدالحق ، ص356) خلافت صدیقی ، تقویتِ اسلام کا ذریعہ        یہ ایک مسلمہ حقیقت ہے  کہ بنیاد جتنی مضبوط ہوتی ہے عمارت کا قیام وپختگی بھی ویسی ہی پائيدار ہوتی ہے ، حق تعالیٰ نے اس دین کو ہمیشہ باقی رکھنے کا وعدہ فرمایااور اس کی بنیادوں کو بے حد مستحکم فرمایا اور خلافت صدیقی کی بنیاد کو اپنے اور اپنے حبیب صلی اللہ علیہ وسلم کے منشا کے مطابق قائم فرمایاکیونکہ نبوت کے بعد سب سے اعلی مرتبہ" خلافت براصول نبوت "ہے ، اور انبیاء کرام علیہم السلام کے بعدسب سے افضل حضرت ابوبکر صدیق رضی اللہ تعالیٰ عنہ کی ذات ہے، لہذا نبوت کے بعد سب سے اعلی مرتبہ کے لئے بعد ازانبیاء سب سے اعلی ذات کا انتخاب کیا گیا ۔        حضرت ابوبکر صدیق رضی اللہ تعالیٰ عنہ کی خلافت، اولین خلافت اور دین اسلام کی اساس وبنیادپرقائم رہی ، آپ نے خلافت کے جو اصول بنائے اور دستور تیار فرمایا ،اسی پر دین اسلام کی اشاعت کا دار ومدار ہے ، جیسا کہ حضرت ابوہریرہ رضی اللہ تعالیٰ عنہ فرماتے ہیں :اس ذات کی قسم جس کے سوا کوئی معبود نہیں! حضرت ابوبکر صدیق رضی اللہ عنہ اگر خلیفہ نہ بنائے جاتے تو اللہ تعالیٰ کی عبادت اس شان سے نہ کی جاتی، آپ نے ان کلمات کو تین مرتبہ کہا۔(جامع الاحادیث ، مسند ابی بکر ، حدیث نمبر: 27940۔ کنزالعمال ، فی خلافۃ الخلفاء ، حدیث نمبر: 14066۔تاریخ الخلفاء ،ص74فصل فیما وقع من خلافتہ )   عہد صدیقی اورفتنوں کی سرکوبی         سیدنا ابوبکر صدیق رضی اللہ عنہ نے اپنی خلافت کی مختصر مدت(دوسال سات مہینوں )میں جو عظیم کارنامے انجام دئے ہیں ان کی نظیر نہیں ملتی،آپ کے  مسند خلافت پر رونق افروز ہوتے ہی کئی فتنے بھڑک اٹھے، ان میں تین فتنے بڑی قوت کے ساتھ ابھرآئے (1)فتنہ ارتداد(2)فتنۂ مانعین زکوٰۃ(3)فتنۂ مدعیان نبوت۔         اگران فتنوں کی آگ بروقت نہ بجھائی جاتی تو تمام عالم اسلام ا س کی لپیٹ میں آجاتا، خاص طور پر نبوت کے جھوٹے دعویداروں کا خاتمہ اور ان کا زور ختم کرنا اس وقت نہایت ضروری تھا، سیدناابوبکر صدیق رضی اللہ عنہ نے مسلمانان عالم پرعظیم احسان فرمایا کہ ان جھوٹے دعویداروں کے خاتمہ اور ان کی سرکوبی کے لئے فوجی افسر مقرر فرمائے اور انہیں مختلف علاقوں کی طرف روانہ فرمایا اور اعلانیہ مرحمت فرمایاکہ معرکہ سے پہلے باغیوں اور مرتدوں کو یہ سنادیا جائے کہ وہ راہ راست پر آجائیں تو ٹھیک ہے! ورنہ ان سے مقابلہ کیا جائے گا، آپ نے جو اعلانیہ پڑ ھ کر سنانے کا حکم فرمایا تھا اس کا کچھ حصہ سپرد قرطاس ہے:تم میں جو لوگ اسلام قبول کرنے کے بعد اللہ تعالیٰ سے فریب کرتے ہوئے ، جہالت کو اپناتے ہوئے، شیطان کی پیروی میں دین حق سے پھر گئے ،مجھے اس امر کی خبر پہنچ چکی ہے ، میں نے مہاجر ین وانصار اور تابعین ذی احسان کے لشکر کے ساتھ فلاں  کوبھیجا ہے اور انہیں یہ حکم دیا ہے کہ جب تک اسلام کی دعوت نہ دے، نہ کسی سے  لڑے اور نہ کسی کو قتل کرے،جو میر ے قاصد کی  دعوت پر لبیک کہے اور اقرار  کرے ،بے دینی سے بازآجائے اور نیک عمل کرے تووہ اس کے قول وعمل کو قبول کرے، اس کی مدد کرے اور جو انکار کرے اس سے بے دین ہونے کی وجہ سے مقابلہ کرے۔ (تاریخ الطبری ، ج2ص481)          اُس دور میں نبوت کا جھوٹا دعوی کرنے والوں میں ُمسیلمہ کذّاب ، اسود عنسی ، طلیحہ اسدی ، سجاح بنت حارث وغیرہ ہیں۔        سیدنا ابوبکر صدیق رضی اللہ عنہ نے منصوبہ بند طور پر ان کی سازشوں کو ناکام بنادیا اور مسلمانوں کوان کے دجل وفریب کے دلدل سے نجات دلائی،اس میں پھنسنے سے بچالیا اور ان کے عقیدۂ ختم نبوت کی حفاظت کا ساماں کردیا۔   اہل بیت کرام سے تعلق        سیدنا ابوبکر صدیق رضی اللہ عنہ اہل بیت کرام کی تعظیم وتکریم کے سلسلہ میں تمام اہل اسلام  کے لئے نمونہ ہیں، پرچم اسلام کے علمبردار ہوتے ہوئے آپ نے خانوادۂ نبوت کا جو احترام اپنے دل میں رکھا وہ اس واقعہ سے ظاہر ہے:حضرت ابن شہاب سے روایت ہے حضرات ابوبکر وعمر رضی اللہ عنہما اپنے دور خلافت میں جب بھی حضرت عباس رضی اللہ عنہ سے ملتے اگر سوار رہتے تو اتر جاتے اور سواری کو تھام کر حضرت عباس رضی اللہ عنہما کے ساتھ چلا کرتے یہاں تک کہ انہیں ان کے دولت خانہ تک پہنچاتے پھر ان سے رخصت ہوجاتے۔(جامع الاحادیث ، مسند عمر بن الخطاب ، حدیث نمبر: 30679۔ کنز العمال ، عباس بن المطلب ، حدیث نمبر: 37332)         حضرت صدیق اکبر رضی اللہ عنہ کا ایسا ہی تعلق دیگراہل بیت کرام سے تھا ، حضور پاک علیہ الصلوٰۃ والسلام کی نسبت سے آپ کے خانوادۂ عالیہ سے مکمل وابستگی رکھتے تھے ،جب آپ خلافت پر مامور ہوئے تو اہل بیت کرام سے آپ کا وہی تعلق باقی رہا بلکہ آپ نے ان کی طرف خصوصی توجہ فرمائی، جیسا کہ صحیح بخاری شریف وصحیح مسلم شریف میں روایت ہے کہ حضرت صدیق اکبر رضی اللہ عنہ نے ایک موقع پر خطبہ ارشاد فرمایا اور اہل بیت کرام سے اپنے تعلق کا یوں اظہار فرمایا:اس ذات کی قسم جس کے قبضہ قدرت میں میری جان ہے !یقینا حضرت رسول کریم صلی اللہ علیہ وسلم کی قرابتداری مجھے اس سے زیادہ محبوب ہے کہ میں اپنے رشتہ داروں سے صلہ حمی کروں۔(صحیح البخاری ، کتاب فضائل الصحابۃ ، باب مناقب قرابۃ رسول اللہ صلی اللہ علیہ وسلم ، حدیث نمبر:3712۔صحیح مسلم،کتاب الجہاد والسیر،باب قول النبی صلی اللہ علیہ وسلملانورث‘ما ترکنا فہو صدقۃ،حدیث نمبر:4679) وصال مبارک         سیدنا صدیق اکبر رضی اللہ عنہ دو سال سات ماہ مسند خلافت پرجلوہ فرمارہے۔ (تاریخ الخلفاء،ابو بکر الصدیق)        آپ کا وصال مبارک مغرب وعشاء کے درمیان 22 جمادی الاخری  13ھ شہر مدینہ منورہ میں ہوا ، اُ س وقت آپ کی عمر شریف ترسٹھ سال تھی ۔         آپ نے وصیت فرمائی تھی کہ آپ کے جنازہ کو دربار رسالت پر لانا اور سرکار دو عالم صلی اللہ علیہ وسلم سے اجازت طلب کرنا ،حکم ملے تو آپ کے روضہ مبارک میں دفن کرنا،ورنہ بقیع شریف میں دفن کردینا چنانچہ آپ کی وصیت کے مطابق آپ کو کفناکر دربار نبوی میں لے جایا گیا ، جیساکہ تفسیر رازی میں ہے : آپ کا مبارک جنازہ نبی اکرم صلی اللہ علیہ وسلم کے روضۂ اقدس کے سامنے رکھ کر عرض کیا گیا، یا رسول اللہ !یہ ابوبکر حاضر ہیں ،یکایک خود بخود دروازہ کھلا اور سبھوں نے اندر سے یہ آواز سنی کہ :حبیب کو حبیب کے پاس لے آؤ!(تفسیر کبیر،تفسیر نیشاپوری ،تفسیر رازی ،سورۃ الکہف ، آیت نمبر:9)         یہ سن کر حاضرین نے آپ کو حجرۂ مبارک کے اندر حضرت رسول اللہ صلی اللہ علیہ وسلم کے پہلومیں دفن کیا۔جیسے آپ نبی اکرم صلی اللہ علیہ وسلم کے یار غار رہے ،اسی طرح آ پ کو یار مزار ہونے کا شرف حاصل ہوا۔ اللہ تعالی ہمیں اسلام پر استقامت عطافرما، ہمارے دلوں کو عشق رسول عظمت صحابہ ومحبت اہل بیت سے معمور فرما اور ہم میں سے ہر ایک کو اپنی اپنی ذمہ داریاں بخوبی انجام دینے کی توفیق عطا فرما۔ تڑپنے پھڑکنے کی توفیق دے دل مرتضی‘ سوز صدیق دے   ٭٭٭ از:مولانا مفتی حافظ سید ضياء الدین نقشبندی  شیخ الفقہ جامعہ نظامیہ وبانی ابو الحسنات اسلامک ریسرچ سنٹر

Mufti Maulana Syed Zia Uddin Naqshbandi Quadri

Shaik-ul-Fiqh - Jamia Nizamia

Mufti Maulana Syed Zia Uddin Naqshbandi Quadri

Shaik-ul-Fiqh - Jamia Nizamia

Burning Topics

حضرت صدیق اکبر رضی اللہ تعالیٰ عنہ' حیات طیبہ کے تابندہ نقوش