تدریسی مقاصدعصر حاضر کے تناظر میں

تعلیم ہر بلندی کا زینہ اور ہر ترقی کا ذریعہ ہے‘ ہر دور میں  وہی قوم اور وہی جماعت کامیاب رہی جس نے اپنے آپ کو تعلیم سے وابستہ رکھا‘ ظاہری ترقی اور باطنی عروج علم ہی سے متعلق ہے۔تعلیم سے خود علم حاصل کرنے والا ترقی کرتا ہے اور معاشرہ کے لئے بھی ترقی کی راہیں  کھلتی ہیں ۔ تعلیم کے ذریعہ انسان ترقی و عروج کی منزلیں  طئے کرتاہوا اوجِ ثریا پر پہنچتا ہے‘ تعلیم کے ذریعہ ہر میدان میں  شہسواری کرتا ہے‘ ہوائی جہاز و راکٹ کی  ظاہری پرواز بھی تعلیم کے بغیر نہیں  ہوسکتی اور روحانی و حقیقی پرواز کے لئے بھی تعلیم ضروری ہے‘ تعلیم انبیاء کرام کی میراث اور ان کا پیغام ہے‘ تعلیم ایک ایسا انقلاب ہے جس کے ذریعہ افراد اور اقوام کی تقدیر سنورتی ہے‘ تعلیم کی وجہ سے تہذیب و تمدن کا وجود ہے‘ اس کے ذریعہ طبیعت شائستہ‘ جذبات پاکیزہ اور مزاج سنجیدہ ہوتا ہے‘ اُسی کے اثر سے ابلیسی قوتیں ، شیطانی طاقتیں  اور طاغوتی خیالات نیست ونابود ہوتے ہیں ۔<o:p></o:p> دین اسلام نے دینی اور عصری تمام قسم کے علوم حاصل کرنے کی حد درجہ تاکید فرمائی ہے، اسلام علم کی راہ میں  کسی ایک مقام پر رکے رہنے کی اجازت نہیں  دیتا بلکہ لمحہ بہ لمحہ اس میں  ازدیاد و اضافہ چاہنے کا حکم دیتا ہے۔ چنانچہ اللہ تعالی نے علم میں  اضافہ و ترقیٔ مزید کی دعا کرنے کا حکم فرمایا: وقل رب زدنی علما۔<o:p></o:p>  ترجمہ: اور آپ عرض کیجئے ائے میرے پروردگار!میرے علم میں  اضافہ فرما۔ (سورۃ طٰہٰ۔ 114)<o:p></o:p> <o:p></o:p>      دین اسلام میں  تعلیم کونہایت درجہ اہمیت دی گئی ہے،سب سے پہلی وحی علم حاصل کرنے کے متعلق نازل ہوئی،ارشادالٰہی ہے :<o:p></o:p> اقرأباسم ربک الذی خلق۔<o:p></o:p> ترجمہ : پڑھئے اپنے رب کے نام سے جس نے پیدا کیا۔ (سورۃ العلق ۔1)<o:p></o:p> <o:p></o:p>      اس آیت کریمہ میں  پڑھنے کا تو حکم ہے لیکن کیا پڑھا جائے اس کا متعین طور پر ذکر نہیں  فرمایا‘ اسی طرح پیدا کرنے کا تو ذکر ہے لیکن کس کو پیدا کیا  اس پہلی آیت میں  اس کی تصریح نہیں  فرمائی۔ نہ ’’اقرا‘‘ کا مفعول مذکور ہے اورنہ خلق کا مفعول مذکور ،اس اسلوب کلام سے اس حقیقت کی طرف اشارہ کرنا مقصود ہے کہ اللہ تعالیٰ ہی ارض و سماء ‘ شمس و قمر ‘ کواکب وانجم ،کل کائنات کا خالق ہے۔<o:p></o:p>  لہٰذا علم و قرأت تحقیق وریسرچ کا موضوع بھی کائنات پست و بالا کی ہر ہر شیء کو بنایا جائے گویا انسان کو یہ اشارہ دے دیا گیا کہ وہ طلب علم کی راہ میں  ہر موضوع پر دسترس حاصل کرنے کی سعی مسلسل کرتا رہے تاکہ معرفت خداوندی کی نعمت لازوال سے بہرہ مند ہوسکے‘ محض اشیاء و آثار میں  کھوکر خالق و مالک سے غافل نہ ہوجائے، بقول شاعر <o:p></o:p> <o:p></o:p> ڈھونڈنے والا ستاروں  کی گذر گاہوں  کا    اپنے افکار کی دنیا میں  سفر کر نہ سکا<o:p></o:p> <o:p></o:p> جس نے سورج کی شعاعوں  کو گرفتار کیا   زندگی کی شب تاریک سحر کر نہ سکا<o:p></o:p> <o:p></o:p> علوم دینیہ ہو کہ علوم عصریہ ہر ایک سے مقصود خدمت خلق کے ساتھ معرفت حق تعالی ہے، ارشادخداوندی ہے:<o:p></o:p> فاعلم انہ لاالٰہ الااللہ۔<o:p></o:p>  ترجمہ:پھرجان لوکہ اللہ کے سواکوئی معبودنہیں ۔ (سورۃ محمد۔19)<o:p></o:p> اللہ جل شانہ کا ارشادہے :<o:p></o:p> فلولانفرمن کل فرقۃ منہم طائفۃ لیتفقھوا فی الدین ولینذروا قومہم اذا رجعوا الیہم لعلہم یحذرون ۔<o:p></o:p> ترجمہ: ایسا کیوں  نہیں  ہوا کہ ان کی ہر بڑی جماعت سے ایک چھوٹی جماعت نکلتی تاکہ وہ دین میں  تفقہ (سوجھ بوجھ) حاصل کرتی اور اپنی قوم کو ڈراتی جب وہ اس کے پاس لوٹتی تاکہ وہ لوگ ڈرنے والے ہوجاتے۔(سورۃ التوبۃ۔122)<o:p></o:p>  مذکورہ آیت کریمہ کی تفسیرمیں  علامہ آلوسی رحمۃ اللہ علیہ فرماتے ہیں  :<o:p></o:p>  ’’ینبغی ان یکون غرض المعلم الارشادوالانذاروغرض المتعلم اکتساب الخشیۃ لا التبسط والاستکبار‘‘۔<o:p></o:p> ترجمہ:استادکا بنیادی مقصدیہ ہونا چاہئے کہ طالب علم کوہدایت ورہنمائی کا راستہ بتلائے بداعتقادیوں  اوربداعمالیوں  سے ڈرائے اورطالب علم کا کلیدی مقصدیہ ہوکہ ہمیشہ خداوندتعالی کا خوف اپنے دل میں رکھے،اس کا مقصودنہ سیروتفریح ہواورنہ بڑائی کا حصول۔ (روح المعانی ،سورۃ التوبۃ۔122)<o:p></o:p> <o:p></o:p>      تعلیم و تدریس کے کئی ایک مقاصد اورمتعدداغراض ہیں ، ہم یہاں  بیس(20)مقاصد بیان کریں  گے ان تمام مقاصدکوبنیادی طور پر دوحصوں  میں  تقسیم کیا جاسکتاہے ۔  <o:p></o:p> (1)تعمیرفرد  (2)تعمیرملت۔<o:p></o:p> تعمیر فرد کے تحت آٹھ (8)مقاصد اور تعمیر ملت کے ضمن میں  گیارہ (11)<o:p></o:p>  اس کے علاوہ ایک (1)مقصد جو تعمیرفرد وملت ہر دو کے لئے ام المقاصد کی حیثیت رکھتاہے اس طرح جملہ تدریس کے بیس (20)مقاصد اورپانچ(5) طریقہ ہائے کار بیان کر رہے ہیں ۔ وباللہ التوفیق۔<o:p></o:p> <o:p></o:p>     (1)رضائے الٰہی کا حصول:<o:p></o:p> تدریس کا اولین مقصداورانتہائی غرض یہی ہونی چاہئے کہ انسان دل کی سیپی میں  خوف خدا کا موتی سموئے ہوئے رضائے الٰہی کا طلب گاراورخوشنودیٔ یزدانی کا خواستگار رہے ،ارشاد الٰہی ہے :<o:p></o:p> انمایخشی اللہ من عبادہ العلماء ۔<o:p></o:p> ترجمہ:یقینااللہ تعالی سے اس کے بندوں  میں  علم والے ہی ڈرتے ہیں ۔ (سورۃ الفاطر۔28)<o:p></o:p> <o:p></o:p>      نہ وہ علم کے ذریعہ شہرت وعزت طلب کرے اور نہ نام ونمودکی خواہش رکھے ،نہ کوئی اورفاسد وکاسدمقصدپیش نظررکھے حضرت نبی اکرم صلی اللہ علیہ واٰلہ وسلم نے فاسداغراض کے لئے علم حاصل کرنے سے منع فرمایا،چنانچہ ترمذی ج 2 ،ص 94 میں  حدیث پاک ہے :<o:p></o:p> حدثنی ابن کعب بن مالک عن ابیہ قال سمعت رسول اللہ صلی اللہ علیہ وسلم یقول من طلب العلم لیجاری بہ العلماء اولیماری بہ السفہاء او یصرف بہ وجوہ الناس الیہ ادخلہ اللہ النار ۔<o:p></o:p>  ترجمہ:حضرت کعب بن مالک رضی اللہ عنہ سے روایت ہے اُنہوں  نے فرمایا میں  نے حضرت رسول اللہ صلی علیہ وسلم کو ارشاد فرماتے ہوئے سنا جس شخص نے اس غرض سے علم طلب کیا کہ اُس کے ذریعہ علماء کے ساتھ مناظرہ کرے یا جاہلوں  کے ساتھ جھگڑا کرے یا اپنے علم کے ذریعہ لوگوں  کو اپنی جانب متوجہ کرلے  تو ایسے شخص کو اللہ تعالیٰ دوزخ میں  داخل کرے گا۔<o:p></o:p>      رضائے الٰہی کے علاوہ جودیگرمقاصدبیان کئے جائیں  گے وہ اس کے ذیل اورفرع کی حیثیت رکھتے ہیں  اُن میں  سے بعض مقدم ہیں  اور بعض مؤخر‘ لیکن اصل الاصول یہی مقصد ہے اور سب کے لئے روح رواں  ہے۔<o:p></o:p> <o:p></o:p>     تعمیرفرد:<o:p></o:p>  تدریس کا ایک اہم مقصدیہ ہے کہ طلبہ کی خوابیدہ صلاحیتوں  کو بیدار کیا جائے اور پوشیدہ قابلیتوں  کو ابھارا جائے تاکہ ان کی شخصیت کی تعمیرہو،ہرطالب علم انفرادی طورپرایک مؤثروباوقار‘مہذب وباصلاحیت شخصیت کا حامل ہو،نظم وضبط اورڈسپلن قائم رکھے،صبروتحمل،ثبات واستقامت کا خوگر ہو، محاسن وخوبیوں  کا سرچشمہ ہو،غرور و تکبر،خودغرضی وخودستائی سے خالی ہو،نام ونمودوریاکاری سے عاری ہو۔<o:p></o:p>      تعمیر فرد کے تحت آٹھ مقاصد بیان کئے جاتے ہیں ‘ بعض مقاصد کا ایک دوسرے میں  تداخل ہوسکتا ہے‘ تاہم ہر پہلو کی اہمیت کے پیش نظر اُسے علحدہ ذکر کیا جارہا ہے۔<o:p></o:p> <o:p></o:p>        (1)اخلاقی ترقی:<o:p></o:p> اخلاق ایک ایسی قوت ہے جس کے ذریعہ آدمی اغیار کو احباب بناسکتا ہے‘ حضرت نبی اکرم صلی اللہ علیہ وسلم کا ارشاد مبارک ہے:<o:p></o:p>  انمابعثت معلما۔<o:p></o:p>  ترجمہ:یقینامیں  معلم بناکر بھیجاگیاہوں  ۔(سنن ابن ماجہ شریف ج 1‘ ص21‘ حدیث نمبر225)<o:p></o:p>      نیزحدیث شریف وارد ہے: <o:p></o:p> انما بعثت لاتمم مکارم الاخلاق۔<o:p></o:p>  ترجمہ: یقینا مجھے اس لئے بھیجا گیا کہ میں  اخلاق کی بزرگیوں  کو درجۂ کمال تک پہنچادوں ۔ (السنن الکبریٰ للبیھقی‘ کتاب الشھادات‘ حدیث نمبر 21301 )<o:p></o:p> <o:p></o:p>      حضورصلی اللہ علیہ واٰلہ وسلم نے مکارم اخلاق کی تعلیم کو تدریس کا اہم مقصد قرار دیا اور یہ واضح فرمادیا کہ تعلیم کے ذریعہ اخلاق کے اعلیٰ اقدار حاصل کئے جائیں ۔  تعلیم وتربیت ،تادیب وتدریس کا مقصدیہ ہے کہ طلبہ کواخلاقی محاسن سے آراستہ کیا جائے ،سچائی اور راستبازی ،شیریں  کلامی وخوش گفتاری ،حلم وبردباری،عفوودرگزر،حسن سلوک ورواداری ،عدل گستری ومنصف مزاجی ،عاجزی وخاکساری جیسے خصائل حمیدہ سے سنواراجائے،نیز دروغ گوئی ،دھوکہ دہی،حسدوکینہ، بغض وعداوت،غیبت وچغلخوری ،تشدد وسختی، تعصب وتنگ نظری ،بدسلوکی وبے حیائی ،ظلم واستبداداوردیگرتمام غیراخلاقی اوصاف سے پاک کیا جائے۔<o:p></o:p> ’’و  یزکیہم ویعلمہم الکتاب والحکمۃ۔‘‘<o:p></o:p>  اورحضور (صلی اللہ علیہ وسلم)ا ن کے دلوں  کو پاک کرتے ہیں  اور انہیں  کتاب وحکمت کا علم عطا فرماتے ہیں  ۔(سورۃ ال عمران۔164) اس ارشاد خداوندی سے یہی حقیقت مترشح ہوتی ہے کہ طالب علم کو صفات ذمیمہ سے پاک کر کے خصائل حمیدہ کا پیکر بنایاجائے۔<o:p></o:p> <o:p></o:p> اس دور میں  تعلیم ہے امراض ملت کی دوا        ہے خونِ فاسد کے لئے تعلیم مثل نیشتر <o:p></o:p> <o:p></o:p>      طلبہ‘ اعلیٰ اخلاقی اقدارکے حامل ہوں  ،ہرخوبی کے خوگرہوں  اورہربری صفت ومذموم عادت سے گریزاں  ہوں  ،طلبہ کوزیور علم سے اس لئے آراستہ نہیں  کیاجاتا کہ وہ اعلی سندیں  حاصل کریں  اورلوگ انہیں  تعلیم یافتہ کہیں  ،بلکہ تعلیم اورتدریس کا مقصدیہ ہے کہ دنیاان کی گفتاروکردار اور طریقۂ کار کودیکھ کراخلاق کا درس حاصل کرے ،وہ مخلوق خداکے لئے راہ اخلاق میں  سنگ میل بنیں  ،ان کا اخلاقی معیارسب کے لئے کسوٹی کی حیثیت رکھتاہو۔<o:p></o:p> <o:p></o:p> ہم کو بننا ہے نشان راہ منزل دوستو  <o:p></o:p> <o:p></o:p>   ہم اگر بھٹکیں  تو کتنے کارواں  کھوجائیں  گے<o:p></o:p> <o:p></o:p> (2) ذہنی وفکری ترقی :<o:p></o:p>  تدریسی مقاصدمیں  ایک بنیادی مقصدیہ ہے کہ طالب علم میں  فکرونظرکی صلاحیت ،فہم وفقہ کی قابلیت پروان چڑھتی رہے،طالب علم میں  اس قدراستعداد پیداہوجائے کہ وہ کسی بھی درپیش مسئلہ کواپنی صلاحیت وقابلیت کی بنیادپرحل کرسکے ،یہ اسی وقت ہوسکتاہے جبکہ استاذ ‘طالب علم کی فکرکواسکول کے ماحول کے اندر ہی محدود نہ کردے‘ بلکہ اسے وسیع ماحول میں  سمجھائے‘ مختلف طریقوں  سے مثالیں  دے،متعدداسالیب سے بات پیش کرے۔<o:p></o:p> <o:p></o:p> ستاروں  کے آگے جہاں  اوربھی ہیں   <o:p></o:p> <o:p></o:p>   ابھی عشق کے امتحاں  اور بھی ہیں  <o:p></o:p> <o:p></o:p>     (3)شعوروآگہی کی بیداری:<o:p></o:p> اچھے اعمال کا انجام اچھا اوربرے افعال کا نتیجہ براہوتاہے ،تدریس کا ایک مقصدیہ ہے کہ طالب علم میں  شعوروآگہی بیدارکی جائے کہ وہ خیروشرکی شناخت رکھ سکے،حق وباطل میں  تمیزکرے، موزوں  وناموزوں  کے درمیان فرق کرے،صحیح وسقیم کا امتیاز اورخبیث وطیب کی پہچان کرسکے، نیکی وبھلائی کوپہچانے اوراسے اختیارکرے ،بدی وبرائی کوسمجھے اوراس سے اجتناب کرے۔<o:p></o:p> <o:p></o:p>     (4)بلندہمتی واولوالعزمی :<o:p></o:p> تدریسی اغراض میں  ایک مقصد یہ ہوتا ہے کہ طالب علم‘ تعلیم کے ذریعہ محنت وکاوش کا عادی ہوجائے ،اپنے مقصدکے حصول کے دوران پیش آنے والے مصائب کا سامناکرے ،مشکلات کے وقت ہمت وحوصلہ بنائے رکھے،جس طرح وہ مشکل ترین تعلیمی مسئلہ کوحل کرنے کی کوشش کرتاہے ‘ کسی مسئلہ کی دشواری ، کسی بات کی پیچیدگی اس کے پاس حصول علم کے لئے مانع نہیں  ہوتی، اسی طرح ایک طالب اپنے دور طالب علمی کے ذریعہ زندگی کے نشیب وفرازسَرکرنا سیکھتاہے ،بڑی سے بڑی مشکل اسے اپنی بلندہمتی اوراولوالعزمی کے سامنے چھوٹی نظرآتی ہے ،خاردارجھاڑیاں  اورپتھریلے راستے اس کے سفرکے لئے رکاوٹ نہیں  بنتے، بالآخر وہ ہمت وعزم کا زادراہ لئے مشکل ترین راستے عبورکرتاہوامنزل مقصودتک پہنچ جاتاہے۔  ترقی کی ایک منزل پر پہنچ کر وہ اکتفاء نہیں  کرتا اور عروج کے ایک رتبہ کو پاکر قناعت نہیں  کرتا بلکہ اپنے ارادہ کی پختگی اور ہمت کی بلندی کے ذریعہ مزید عروج و ارتقاء کا اشتیاق رکھتا ہے اور جذبہ اولوالعزمی میں  سرشار رہ کر یکے بعد دیگرے ترقی کرتا چلا جاتا ہے۔<o:p></o:p> <o:p></o:p> نہیں  تیرا نشیمن قصر سلطانی کی گنبد پر       تو شاہیں  ہے بسیرا کر پہاڑوں  کی چٹانوں  میں <o:p></o:p> <o:p></o:p>     (5) قوت فیصلہ کا حصول:<o:p></o:p> طلبہ کے لئے جونصاب مقررکیاجاتاہے،وہ چندعلوم وفنون پرمشتمل ہوتاہے، اساتذہ ان علوم وفنون کی باریکیاں  بتلاتے ہیں ،ان میں  بعض مضامین اس قدردقیق ہوتے ہیں کہ اس کیلئے دقت نظر وباریک بینی درکارہوتی ہے ،اس کا مقصدیہ ہوتاہے کہ طلبہ دقیق مضامین سمجھنے اورباریک مسائل حل کرنے کے عادی ہوجائیں ، اس مشق اورممارست کی وجہ طلبہ پیش آئندہ مسائل میں  افراط یا تفریط کا شکارنہ ہوں  گے ،بلکہ اعتدال پسندی ومیانہ روی کے ساتھ اپنی قوت علمیہ سے درست فیصلہ کریں  گے چنانچہ وہ ذہنی صلاحیت سے کوئی بھی قدم اٹھائیں ‘ کوئی بھی فیصلہ کریں ‘ استاذکے بتائے ہوئے اصول کے مطابق صحیح اور درست ہوگا ،وہ نہ خواہشات سے مغلوب ہوکربے حیائی کا ارتکاب کریں  گے،نہ مصیبتوں  سے پریشان ہوکر ناجائزاعمال کواپنائیں  گے ،نہ زندگی کی سختیوں  کے سبب کسل مندی میں  مبتلاہوں  گے اورنہ بدنظمی ولاپرواہی سے نقصان اٹھائیں  گے۔<o:p></o:p> <o:p></o:p> (6)فرصت کے لمحات کو مفید و سود مند بنانا:<o:p></o:p> انسان اپنی زندگی میں روزانہ کی مصروفیات کے باوجود کچھ فرصت بھی پاتا ہے‘ ان فرصت کے لمحات میں  اُسے کوئی ذمہ داری نہیں  ہوتی‘ ایسے وقت آدمی چاہتا ہے کہ اُسے بہتر سے بہتر کام میں  گذارے‘ بعض افراد اپنا وقت بے فائدہ کاموں  میں  گذارتے ہیں ‘ عارضی طور پر شوق کی تسکین اور خواہش کی تکمیل ہوتی ہے لیکن اس کی وجہ سے اُن کی صحت‘ فکر اور طبیعت پر بُرا اثر مرتب ہوتا ہے ‘سنیما بینی‘ لہو ولعب‘ ہنسی مذاق مخرب اخلاق مناظر میں  یہ اپنا بیش قیمت وقت صرف کرتے ہیں  اور اپنے لئے نقصان بھی مول لیتے ہیں ‘ جو امور‘ شرعی طور پر ممنوع ہیں ‘ اُن کی قباحت تو واضح ہے غیر ممنوع اور مباح کھیل بھی اس قدر کھیلنا کہ ورزش کی حد سے بڑھ جائے اور آدمی کو غفلت میں  مبتلا کردے‘ ایک طالب علم کو اُس سے بھی اجتناب و گریز کرنا چاہئے۔ ارشاد نبوی ہے: من حسن اسلام المرء ترکہ مالا یعنیہ۔ ترجمہ: بہترین مسلمان وہ ہے جو لایعنی عمل چھوڑدے۔ (سنن ترمذی شریف ج 2 ص 58 )<o:p></o:p> <o:p></o:p>      وقت کی اہمیت کیا ہے؟ آج کے عدیم الفرصتی کے دور میں  اس کا ہر ایک کو بخوبی اندازہ ہے‘ اس کو غنیمت جاننا چاہئے۔<o:p></o:p> <o:p></o:p> وقت کی دولت جس نے گنوائی<o:p></o:p> <o:p></o:p>  اس نے عزت کہیں  نہ پائی<o:p></o:p> <o:p></o:p>      حضرت نبی اکرم صلی اللہ علیہ وسلم نے فرصت کے اوقات کو مصروفیت سے پہلے غنیمت جاننے کا حکم فرمایا،نیزایک روایت کے مطابق حضورپاک صلی اللہ علیہ وسلم نے پانچ حالات کوغنیمت جاننے اور انکی قدر کرنے کی تاکیدفرمائی ہے:<o:p></o:p>  عن عمرو بن میمون الاودی قال قال رسول اللہ صلی اللہ علیہ وسلم اغتنم خمساقبل خمس شبابک قبل ھرمک وصحتک قبل سقمک وغناک قبل فقرک وفراغک قبل شغلک وحیوتک قبل موتک۔<o:p></o:p> <o:p></o:p> ترجمہ:حضرت عمرو بن میمون اودی رضی اللہ عنہ سے روایت ہے حضرت رسول اللہ صلی اللہ علیہ وسلم نے ایک شخص سے نصیحت کرتے ہوئے فرمایا: تم پانچ چیزوں  کو پانچ چیزوں  سے پہلے غنیمت جانو؛ اپنی جوانی کو بڑھاپے سے پہلے ،تندرستی کو بیماری سے پہلے ،تونگری کو محتاجی سے پہلے ،فرصت کو مصروفیت سے پہلے اور زندگی کو موت سے پہلے۔<o:p></o:p>  (مشکوۃ المصابیح، ص443 -مستدرک علی الصحیحین ،کتاب الرقاق، حدیث نمبر7057)۔<o:p></o:p> اس حکم نبوی علی صاحبہ الصلوٰۃ و السلام کا مقصود و مطلوب یہ ہے کہ فرصت کے اوقات میں  صرف وقت گذاری کے طور پر لایعنی او ربے مقصد حرکات نہ کئے جائیں  بلکہ منصوبہ بندی کے ساتھ بامقصد اعمال انجام دینے کی فکر کی جائے۔ اپنے آپ کو مصروف رکھنے کے لئے تعلیم حاصل کرنا وقت کی بہترین قدردانی ہے۔ جس وقت تعلیم حاصل کی جارہی ہے‘ اس زمانہ طالبعلمی میں  جوفرصت وتعطیلات کے اوقات میسرآئیں  ان کو بہتر طور پر گذارنے کے لئے اپنے آپ کو تعلیمی مشاغل میں  مصروف رکھاجائے۔ جیسے گرمائی تعطیلات میں  مختصر مدتی اسلامک اسٹڈیز کورسس‘ کمپیوٹر کورسس‘ اسپوکن انگلش کورسس‘ اسپوکن عربک کورسس وغیرہ۔ تدریس کا مقصد یہ بھی ہو کہ طالب علم مستقبل میں  اپنے مقررہ کاموں  سے فارغ ہوکرجولمحاتِ فرصت پائے انہیں  بہتر طور پر گذارے جیسے قرأت قرآن کریم‘ قرآن فہمی اورمعلومات عامہ میں  ازدیاد و اضافہ کرنے والے پروگرام وغیرہ۔<o:p></o:p> <o:p></o:p>     (7)احقاق حق :<o:p></o:p> تدریس کا ایک مقصدیہ ہیکہ جوکچھ علوم ومعارف حاصل کئے گئے ہیں  ان کے ذریعہ یہ کوشش کی جائے کہ چاردانگ عالم میں  پرچم حق بلندہو‘ کتاب و سنت کے دلائل قاطعہ سے فکرونظرکوجلاء بخشی جائے ،پاکیزہ عقائد ودرست افکارکودلوں  میں  بسایاجائے اورذہن وفکرمیں  جمادیاجائے۔<o:p></o:p> <o:p></o:p>    (8)ابطالِ باطل:<o:p></o:p> یہ بھی منجملہ مقاصدتدریس کے ایک ہے اہل باطل عقائدوایمانیات میں  موشگافیاں  کرکے جوشکوک وشبہات پیداکررہے ہیں  ان کا سنجیدگی و متانت سے جواب دے کرذہنوں  میں  پیداکردہ شکوک وشبہات کا ازالہ کیا جائے ،الحاد وبے دینی ‘ضلالت وگمراہی کی مسموم فضاء کا خاتمہ ہو‘باطل افکارونظریات کا رد بلیغ کیا جائے ۔جیساکہ ہمارے بزرگوں  نے روز اول سے ہی حق کے خلاف اٹھنے والے ہرفتنے کی سرکوبی کی اورمذہب حق کی ترویج واشاعت میں  کوئی دقیقہ فروگذاشت نہ کیا ۔<o:p></o:p> <o:p></o:p>      تعمیرملت:<o:p></o:p> جس طرح موج کا تعلق اندرون دریا سے ہے‘ بیرون دریا سے نہیں ‘ اسی طرح فرد بھی ربطِ ملت سے قائم و باقی ہے تنہا کچھ نہیں ۔ جس طرح عمارت کی ایک اینٹ دوسری اینٹ کو تقویت دیتی ہے‘ ایک حصہ دوسرے حصہ کو مضبوط کرتا ہے‘ اسی طرح ایک بندۂ مومن دوسرے بندۂمومن کی تقویت و تائید‘ نصرت و تعاون کرتا ہوا اس کے استحکام کا باعث ہوتا ہے‘ و نیز اولاد آدم ہونے کے اعتبار سے ایک انسان دوسرے انسان کے ساتھ خوشگوار ربط و تعلق قائم رکھے کیونکہ تمام مخلوق اللہ کا کنبہ ہے‘ اللہ کے نزدیک سب سے محبوب وہی ہے جو اس کے کنبہ کے ساتھ حسن سلوک سے پیش آئے‘  اہل اللہ اور صوفیہ کی زندگی میں  اس کی عظیم مثالیں  ملتی ہیں ۔ حضرت خواجہ بندہ نواز گیسو دراز علیہ الرحمہ کے کسی ارادتمند نے دوران گفتگو ایک غیر مسلم سے’’ تو‘‘ کہہ کر مخاطبت کی تو آپ نے منع کرتے ہوئے فرمایا یہ بھی کوئی طرز گفتگو ہے؟ تو مرید نے معذرت کرتے ہوئے عرض کیا حضرت !یہ شخص غیر مسلم ہے تو آپ جلال میں  آگئے چہرۂ مبارک سرخ ہوگیا اور فرمایا کیا وہ انسان نہیں  ہے؟<o:p></o:p> <o:p></o:p> فرد قائم ربط ملت سے ہے تنہا کچھ نہیں     موج جو دریا میں  ہے بیرونِ دریا کچھ نہیں <o:p></o:p> <o:p></o:p>      اسی طرح تدریس کے فوائد،تعلیم کا مثبت نتیجہ محض طالب علم کی شخصیت کی حدتک محدودنہیں  بلکہ خود اس کی شخصیت ملت کے ہرفردکے لئے مفیدوسودمندہو،معاشرہ کے لئے کارآمدہو،معاشرہ کے اجزائے ترکیبی اس کے افرادہوتے ہیں  اورایک پرامن ‘صالح معاشرہ اسی وقت تشکیل پاسکتاہے جب اس کے افرادصالح ہوں ،وہ اپنی شخصیت سے معاشرہ کوایک صالح فرد،نیک صفت شہری فراہم کرتاہے۔ چنانچہ ملت کی تعمیر قوم کی اصلاح اور معاشرہ کی درستگی کے تحت گیارہ (11)تدریسی مقاصد بیان کئے جاتے ہیں ۔<o:p></o:p> <o:p></o:p> (1) صالح معاشرہ کی تشکیل:<o:p></o:p>  تعلیم کے مقاصد میں  ملت کی تعمیر و ترقی اور ایک صحت مند و صالح معاشرہ کی تشکیل ایک مہتم بالشان مقصد ہے‘ طالب علم کو چاہئے کہ وہ حصول علم کے بعد ماحول و معاشرہ سے ہم آہنگ ہوتے ہوئے اپنی صلاحیتوں  اورقابلیتوں  کے ذریعہ معاشرے کے افرادکوفائدہ پہنچائے،رشتہ دار و ہمسایہ ،دوست و احباب، اس کے حسن اخلاق‘ حسن معاملت ‘ بہتر میل ملاپ، پاکیزہ نشست و برخواست سے استفادہ کریں ، وہ معاشرہ کے افرادکی عزت واحترام کرے ،بیمارکی مزاج پرسی کرے اورہوسکے تو تیمارداری کرے،تنگدستوں  کی مددکرے، اپنی ذات ‘قول ‘عمل یا کسی بھی پہلو سے معاشرہ کے کسی فرد کو ضرر و نقصان نہ پہنچائے ،خواہ وہ فرد کسی بھی طبقہ سے تعلق رکھتا ہو، معاشرہ اس کے شرسے محفوظ رہے۔<o:p></o:p> <o:p></o:p> تدریس کے ذریعہ ایسی نسل کی آبیاری کی جائے اورایسے باصلاحیت اورقابل افراد تیارکئے جائیں  جوزمانے کے چیلنج کاجواب دے سکیں  اورملت کوصحیح قیادت فراہم کرسکیں ،ان کی عقل کامل‘ فہم راسخ اور تخیل بلند ہو ‘ وہ زمانہ کے نبض شناس ہوں  ،جو لوگوں  کے ذہن ودماغ کوآسودگی اوراطمینان عطاکریں  اور قلوب کوراحت وسکون پہنچائیں ۔<o:p></o:p> <o:p></o:p>      (2) مختلف ماہرین علوم وفنون کی فراہمی:<o:p></o:p> کسی ملک میں  صرف علماء ، ڈاکٹرس ، وکلاء یا کوئی ایک ہی اہل فن نہیں  ہوتے بلکہ مختلف طبقات کے لوگ اور مختلف زبانیں ہوتی ہیں ، جس کے لئے مختلف اقسام کے علوم وفنون کی ضرورت رہتی ہے، اگر تمام علوم و فنون کے ماہرین نہ ہوں  تو ملک کی ترقی نہیں  ہوسکتی۔ لہٰذا طلبہ کی بنیادی تعلیم،اس کا نصاب ،اندازتدریس کچھ اس طرح ہوکہ طالب علم بنیادی تعلیم کی تکمیل کے بعدکسی بھی فن کواختیار کرسکے ،بنیادی تعلیم ہر فن میں  اس کے لئے واقعی طور پر بنیادکی حیثیت سے معاون ہو،بنیادی معلومات کی عدم موجودگی یا کم یابی کے سبب طالب علم کو اپنا مرغوب وپسندیدہ فن چھوڑنے کی نوبت نہ آئے ،صنعت و حرفت ،معاش واقتصاد،طب وحکمت، سائنس وٹکنالوجی اوردیگرفنون سے متعلق طلبہ کوابتدائی اوربنیادی معلومات  دی جائیں  ،وہ جس مضمون اورجس فن کوچاہیں  اپنی دلچسپی و رغبت سے اختیارکرسکیں ۔<o:p></o:p> <o:p></o:p> (3) استحکام معیشت :<o:p></o:p>   اللہ تعالیٰ نے معاش کے لئے کوشش کرنے اور حلال کمائی کے لئے جدوجہد کرنے کا حکم فرمایا:<o:p></o:p>  فاذا قضیت الصلوۃ فانتشروا فی الارض وابتغوا من فضل اللہ۔<o:p></o:p>  ترجمہ: پس جب نماز ادا کرلی جائے تم زمین میں  پھیل جاؤ اور اللہ کے فضل کو تلاش کرو۔ (سورۃ الجمعہ۔ 10)۔<o:p></o:p> جس شعبہ کی تعلیم حاصل کی جارہی ہے ‘ اُس کے ذریعہ خدمت خلق کرتے ہوئے خودداری کی زندگی بسر کرنے کے لئے اس کو روزگار بنایا جائے تاکہ اس کے ذریعہ معیشت مستحکم ہوسکے اور کسی دوسرے کا دست نگر و محتاج نہ رہے ‘ جیسے میڈیسن‘ انجینئرنگ‘ سافٹ ویر انجینئرنگ‘ ویب ڈیزائننگ اور ٹیچنگ وغیرہ۔<o:p></o:p> <o:p></o:p>     (4)سماجی تقاضوں  کی تکمیل :<o:p></o:p> سماج میں  مختلف شعبے ،متعددپیشے اورکئی طبقات ہوتے ہیں  ،تعلیم وتدریس میں  طلبہ کوزیورعلم سے آراستہ و پیراستہ کرنے کے ساتھ ساتھ انہیں  یہ فکردی جائے کہ ملک کی صنعتی برتری کس طرح ہو؟اقتصادی ترقی کا ذریعہ کیا ہو؟معاشرتی مسائل کیسے حل ہوں ؟ تدریس کا ایک مقصدیہ ہوتاہے طالب علم کواس قابل بنایاجائے کہ وہ لوگوں  کے حوائج وضروریات کی تکمیل کرے ،ضرورت کی تکمیل شخصی طور پر بھی ہوتی ہے اوراجتماعی طور پر بھی، انفرادی وشخصی ضرورت کی تکمیل کا معنی یہ ہے کہ کسی ایک فرد کی ضرورت پوری کی جائے جیسے کسی کمزور و ناتواں  کو سہارا دینا، کسی بیمار کی تیمارداری کرناوغیرہ ۔<o:p></o:p> <o:p></o:p>      اجتماعی ضرورت کی تکمیل کا مطلب یہ ہے کہ جو معاشرہ کے تمام افراد کے لئے ہو اور آدمی اس ضرورت کی تکمیل کے لئے جدوجہد کرے مثلاً آدمی اپنی مہارت وتجربہ سے کوئی چیزایجادکرے جس کے ذریعہ سارے لوگوں  کی ضرورت کی تکمیل ہو،کوئی ایسا طریقۂ کار اختیار کرے جس سے سوسائٹی کے تمام افراد کوسہولت فراہم ہو، چنانچہ قرآ ن کریم میں  مختلف علوم کی جانب اشارہ کیا گیا، کئی ایجادات کے اصول و مصادر کو بیان کیا گیاجیساکہ ارشادالہی ہے :<o:p></o:p> وانزلنا الحدید فیہ باس شدید و منافع للناس ۔<o:p></o:p> ترجمہ:اورہم نے لوہے کونازل کیا،اس میں  زبردست طاقت ہے اورلوگوں  کے لئے کئی فائدے ہیں ،(سورۃ الحدید ۔25) <o:p></o:p> والنالہ الحدید۔<o:p></o:p> ترجمہ: ہم نے ان کے لئے لوہے کونرم بنایاہے  (سورۃسبا۔ 10) ۔ <o:p></o:p> وعلمنہ صنعۃ لبوس لکم۔<o:p></o:p>  ترجمہ: اورہم نے انہیں  تمہارے لئے زرہیں  بنانے کا علم دیا۔(سورۃ الانبیاء  ۔80)<o:p></o:p>      لوہے کی وجہ سے بہت سی قدیم وجدیدایجادات اورمصنوعات بنی ہیں ،اس میں  زبردست طاقت یہ ہے کہ اس کے ذریعہ بڑی سے بڑی مشینیں  جوڑی اور نصب کی جاتی ہیں  اورلوگ جتنی مصنوعات سائیکل، موٹر، کار، ٹرین ، ہوائی جہاز، سمندری جہاز وغیرہ تیار کرتے ہیں ‘ ان سب کا دارومدار لوہے پر ہے۔ <o:p></o:p> اسٹیل ٹکنالوجی (Steel Technology)، میکانیکل انجینئرنگ (Mechanical Engineering) اسی کے نئے نام ہیں ،اسی طرح حضرت نوح علیہ السلام کے کشتی بنانے کے عمل سے وڈ انجینئرنگ (Wood Engineering) کا فن معلوم ہوا۔<o:p></o:p>  ارشادالہٰی ہے:<o:p></o:p>   واصنع الفلک باعیننا و وحینا۔ <o:p></o:p> ترجمہ: اور آپ ہماری نگاہوں  میں  اورہماری وحی کے مطابق کشتی بنائیے۔ (سورۃ ھود ۔37)<o:p></o:p> سول انجینئر (Civil Engineer) کا کام یہ ہے کہ وہ لوہے کی مقداربتلاتاہے ،لوہارکھنے کا طریقۂ کاربتلاتاہے ،اس پیشہ کی طرف بھی قرآن میں  اشارہ ملتاہے جیساکہ حضرت سکندرذوالقرنین نے لوگوں  کی خواہش پر‘فسادپیداکرنے والی اقوام کوروکنے کی خاطر آہنی دیوار بنانے کیلئے لوہے کے ٹکڑے لانے کا حکم فرمایا: اٰتونی زبرالحدید۔<o:p></o:p>  ترجمہ:تم میرے پاس لوہے کے ٹکڑے لاؤ ۔ (سورۃ الکھف۔ 96 )<o:p></o:p> مذکورہ علوم سیکھنے اوراس میں  مہارت ودسترس حاصل کرنے کا مقصدیہی ہے کہ ان علوم کے ذریعہ مخلوق کے حوائج کی تکمیل کی جائے اوران کے لئے سہولت وآسانی فراہم کی جائے۔<o:p></o:p> <o:p></o:p> (5)بقاء باہم وقیامِ امن عالم:<o:p></o:p> تدریس کے مقاصدمیں  ایک اہم مقصدیہ ہے کہ طالب علم کو ایک امن پسند شخصیت بنایا جائے‘ اُس کو اس حقیقت سے روشناس کرایا جائے اور عملی طور پر تربیت دی جائے کہ وہ تمام دنیا والوں  کے حق میں  امن و سلامتی کا سفیر بنے۔ اپنے کو صرف اپنے محلہ ‘ اپنی بستی اور اپنے ملک کا باشندہ ہی نہ سمجھے بلکہ پوری دنیا کو اپنی بستی سمجھے اور دنیا میں  رہنے والے ہر ہر فرد کو اپنے گھر کا فرد سمجھے اور ان سب کے حق میں  نفع بخش و سفیر امن رہے۔ حضور نبی کریم صلی اللہ علیہ وسلم ارشاد فرماتے ہیں :<o:p></o:p>  خیر الناس من ینفع الناس۔<o:p></o:p>   ترجمہ : سب سے بہتر انسان وہ ہے جو تمام انسانوں  کو نفع پہنچائے۔ ( کنز العمال‘ کتاب المواعظ۔44154)<o:p></o:p> اور طالب علم کوبتلایاجائے کہ ہرانسان کوزندگی گذارنے کا حق حاصل ہے،کسی شخص کویہ اختیارنہیں  کہ وہ دوسرے کوقتل کردے،اس کو تعلیم دی جائے کہ انسانی جان کویہ اہمیت و حرمت ،تقدس وعزت حاصل ہے کہ ایک انسانی جان کوختم کرنا ساری انسانیت کوختم کردینے کے برابرہے ،اللہ تعالی کا ارشادہے :<o:p></o:p> من قتل نفسا بغیر نفس او فساد فی الارض فکانما قتل الناس جمیعا۔<o:p></o:p>  ترجمہ: جس نے کسی کوناحق قتل کیا گویااس نے تمام انسانوں  کوقتل کیا۔(سورۃ المائدۃ۔  32)<o:p></o:p>            جب اس کوانسانی جان کی حرمت وعزت بتلائی جائے گی تووہ کسی کے قتل کا اقدام نہیں  کرے گا اورتمام انسانوں  کی جانیں  اس سے محفوظ وبے خوف رہیں   گی۔ اس اہم مقصد سے پہلوتہی برتنے کا نتیجہ یہ ہورہا ہے کہ بعض نادان طالب علم کسی ذہین و فطین اعلیٰ درجہ سے کامیاب طالب علم کو ترقی کی منزل پر نہیں  دیکھ پاتے‘ جس کے باعث وہ اس کی جان کے درپے ہوجاتے ہیں  اور مزید شر انگیزی میں  آگے بڑھتے ہوئے ملک کی امن و سلامتی کے لئے خطرہ بن رہے ہیں  اس لئے بھی اس تحفظ جان کے مقصد کو ذہن نشین کرانے کی پہلے سے کہیں  زائد ضرورت اس وقت ہے۔<o:p></o:p> <o:p></o:p>      (6) مالی حقوق کا تحفظ :<o:p></o:p> اسی طرح مال ومعاش کا تحفظ بھی تدریس کا مقصدہے یعنی طالب علم کواس بات کی تعلیم دی جائے کہ ہرآدمی مال رکھنے کا مستحق ہے اورہرایک کواس کی ضرورت و حاجت رہتی ہے‘ کسی شخص کو یہ حق نہیں  کہ دوسرے کا مال یا اس کا ساز و سامان اُس سے چھین لے‘ تعلیم کے ذریعہ بتلایاجائے کہ مال ہرایک کی ضرورت ہے اورکسی شخص کا کسی چیزپرمالک ہونااس کابنیادی حق ہے ،جیساکہ خطبۂ حجۃ الوداع کے موقع پر جان ومال کے بارے میں  حضرت نبی اکرم صلی اللہ علیہ واٰلہ وسلم کا ارشادمبارک ہے ’’: <o:p></o:p> فان دماء کم و اموالکم واعراضکم علیکم حرام کحرمۃ یومکم ھذا فی بلدکم ھنا فی شھرکم ہذا ‘‘۔۔     ترجمہ: یقیناتمہارے خون‘ تمہارے مال اورتمہاری عزت قابل احترام و لائق حرمت ہیں  جس طر ح تمہارے اس شہر میں ‘ تمہارے اس مہینہ میں ‘ تمہارا یہ دن حرمت والا ہے۔ (صحیح بخاری شریف کتاب الحج‘ باب الخطبۃ ایام منی‘ حدیث نمبر 1623)<o:p></o:p> <o:p></o:p> (7) اصلاح وارشاد:<o:p></o:p>  تدریس کا ایک اہم مقصدیہ بھی ہوتاہے کہ طالب علم ایک مصلح اوررہنماکی حیثیت سے ابھرے،وہ اپنے ماحول ومعاشرہ کا جائزہ لیتارہے ،کہیں  کوئی سقم ہو تو اس کو دور کرنے کی کوشش کرے جیسا کہ حضرت سلیمان علیہ السلام اپنے لشکرکاجائزہ لیتے ،اللہ تعالی کا ارشادہے :<o:p></o:p> وتفقد الطیر فقال مالی لااری الہدہد ام کان من الغائبین ۔<o:p></o:p> ترجمہ:اورانہوں  نے پرندوں  کا جائزہ لیا اورفرمایاکیاوجہ ہے کہ مجھے آج ہدہدنظرنہیں  آرہا ہے‘ آیا وہ غیرحاضررہنے والوں  میں  ہے ۔(سورۃ النمل۔20)<o:p></o:p> اس سے معلوم ہوتاہے کہ ایک مصلح قوم ،رہنمائے ملت ،مدبرودانشورکواپنے گردوپیش کا جائزہ بھی لیتے رہناچاہئے تاکہ اگر معاشرہ میں  کوئی غیراخلاقی عمل رواج پارہا ہوتواس کی اصلاح کرسکے،جب وہ سماج کا جائزہ لے کراس کی اچھائیاں  اور برائیاں  دیکھے گاتبھی وہ قوم کی اصلاح کا ایساطریقہ اختیار کرپائے گاجس کی قوم کوزیادہ ضرورت ہے ‘ تعلیم پانے والے افراد وہ ہیں  جو سار ی انسانیت کے لئے نمونہ ہوتے ہیں  جیسا کہ حدیث پاک ہے :  <o:p></o:p> ’’ عن انس بن مالک قال :قال النبی صلی اللہ علیہ وسلم ان مثل العلماء فی الارض کمثل النجوم فی السماء یہتدی بہافی ظلمات البروالبحر،فاذاانطمست النجوم اوشک ان تضل الہداۃ‘‘ ۔<o:p></o:p> ترجمہ: سیدنا انس بن مالک رضی اللہ عنہ سے مروی ہے کہ انہوں  نے فرمایا: حضرت نبی اکرم صلی اللہ علیہ وسلم نے ارشاد فرمایا: یقینا زمین میں  علم والوں  کی مثال ایسی ہے جیسے آسمان میں  تارے‘ اُن کے ذریعہ خشک و تر کی تاریکیوں  میں  رہنمائی حاصل کی جاتی ہے‘ پھر جب تارے بجھ جائیں  گے تو قریب ہے کہ سیدھی راہ چلنے والے گمراہ ہوجائیں ۔ (مجمع الزوائد ج 1ص121)۔ <o:p></o:p> <o:p></o:p>     (8) باکردارخواتین تیارکرنا:<o:p></o:p> انسانی زندگی صرف مرد کے وجود سے مکمل نہیں  جب تک کہ اس کے ساتھ عورت شامل نہ ہو،عورت معاشرہ کا ایک اہم جزء ہے ،عائلی ،معاشرتی اور گھریلو تربیتی مسائل خواتین ہی سے وابستہ ہیں ‘ اگرصرف مرد کی تعلیم کی طرف توجہ کی جائے اوراس معاملہ میں  عورت کونظراندازکردیاجائے تویہ نہ صرف عورت پرظلم ہوگابلکہ معاشرہ کاایک بڑاحصہ ناخواندگی میں  مبتلا ‘حصول تعلیم سے محروم اور مقاصد تعلیم سے بے بہرہ ہوجائے گا،اس لئے اسلام نے عورت کی تعلیم کو بھی ضروری قراردیاہے ۔ دختران ملت ‘دینی تعلیم اوردنیوی تعلیم ہردومیں  حصہ لیکر باکردار خواتین کی حیثیت سے معاشرہ کے ظہر و  بطن کی اصلاح کرسکتی ہیں  ،خواتین کی اصلاح کرنا، انہیں  دینی، تعلیمی، اصلاحی ذمہ داریوں  کا احساس دلانا ،بچوں  کی تربیت کا شعورپیداکرنا،انہیں  تعلیم یافتہ ،باشعور بنانا اور اخلاقی خوبیوں  سے آراستہ کرنا اس میں  خواتین بھی اہم کردار ادا کرسکتی ہیں ‘ پردہ کا مکمل اہتمام کرتے ہوئے اورحدودشرعی میں  رہ کرسماجی خدمات بھی انجام دے سکتی ہیں  ۔چنانچہ بخاری شریف میں  حدیث پاک ہے :<o:p></o:p> عن الربیع بنت معوذ قالت کنا مع النبی صلی اللہ علیہ وسلم نسقی الماء و نداوی الجرحی و نرد القتلی الی المدینۃ۔<o:p></o:p>   حضرت ربیع بنت معوذ رضی اللہ عنہا سے روایت ہے وہ فرماتی ہیں  کہ ہم حضرت نبی اکرم صلی اللہ علیہ وسلم کی معیت میں  پانی پلاتے‘ زخمیوں  کی مرہم پٹی کرتے اور شہداء کو مدینہ طیبہ کی جانب لے جاتے۔ (صحیح بخاری شریف، ج1، کتاب الجھاد ،باب مداواۃ النساء الجرحی فی الغزو، ص403)<o:p></o:p>    عہد نبوی میں  باعظمت صحابیات زخمیوں  کی تیمارداری کرتی تھیں  ‘ معرکوں  میں  پانی پلاتی تھیں  اور مختلف امور انجام دیا کرتی تھیں ۔ <o:p></o:p>  الحاصل عفت مآب دختران اور پاکدامن خواتین حجاب کو اپناتے ہوئے عصری علوم بھی حاصل کریں  اوراندرونی وبیرونی ،معاشی ومعاشرتی،صنعتی فنون سے آراستہ ہوں  اوربالواسطہ وبلاواسطہ حسب ضرورت خدمات انجام دیں ، اور علم طب کے شعبہ نسوانی امراض میں  تخصص حاصل کریں  اور اسپیشلسٹ بن جائیں ۔<o:p></o:p> <o:p></o:p>     (9) علم کی اشاعت وترویج :<o:p></o:p> تدریس کا ایک مقصدعلم کی اشاعت وترویج ہے ،تعلیم اس لئے دی جارہی ہے کہ علم دوسروں  تک پہنچایاجائے ،حضرت نبی اکرم صلی اللہ علیہ وسلم نے ارشاد فرمایا:<o:p></o:p>  الا فلیبلغ الشاہد الغائب۔<o:p></o:p> ترجمہ:سنو! حاضر شخص غیر حاضر شخص تک پہنچادے ۔<o:p></o:p> نیزمجمع الزوائد میں  حدیث پاک ہے :<o:p></o:p> عن ثابت بن قیس بن شماس قال قال رسول اللہ علیہ وسلم تسمعون ویسمع منکم ویسمع ممن یسمع منکم ۔<o:p></o:p> ترجمہ:سیدنا ثابت بن قیس رضی اللہ عنہ سے روایت ہے حضرت رسول اللہ صلی اللہ علیہ وسلم نے ارشادفرمایا:تم علم کی باتیں  سنتے رہا کرو اور لوگ تم سے علم کی باتیں  سنتے رہیں  گے اور جو تم سے سنیں  گے بعدوالے ان سے سن کر علم حاصل کرتے رہیں  گے ۔<o:p></o:p> (مجمع الزوائد،ج1،ص533،حدیث نمبر:581)<o:p></o:p> جولوگ کسی فن میں  مہارت رکھتے ہیں  وہ دوسروں  کوسکھائیں ‘ دوسروں  کو تعلیم نہ دے کر کتمان علم کا سبب نہ بنیں  بلکہ اپنی طرح کئی ماہرین پیداکریں  ،جیساکہ حضرت نبی اکرم صلی اللہ علیہ واٰلہٖ وسلم نے اس سلسلہ میں  تفصیلی و تاکیدی حکم فرمایا  :<o:p></o:p> مابال اقوام لایفقہون جیرانہم و لایعلمونہم ،ولایعظونہم ،ولایامرونہم ،ولاینہونہم ،ومابال اقوام لایتعلمون من جیرانہم ،ولایتفقہون ،ولایتعظون ،واللہ لیعلمن قوم جیرانہم ،ویفقہونہم ،ویعظونہم ،و یامرونہم ،وینہونہم ،ولیتعلمن قوم من جیرانہم ویتفقہون ویتعظون اولاعاجلنہم العقوبۃ۔<o:p></o:p> ترجمہ:لوگوں  کوکیا ہوگیاہے ،اپنے پڑوسیوں  کوماہراورسمجھ بوجھ والے نہیں  بناتے ،ان کوتعلیم نہیں  دیتے‘ انہیں  نصیحت نہیں  کرتے ،انہیں  نیکی اورخیرکا حکم نہیں  دیتے اوربرائیوں  اورنقصان سے نہیں  روکتے،اور لوگوں  کوکیا ہوگیا ہے اپنے پڑوسیوں  سے نہیں  سیکھتے ،ان سے مہارت اورسمجھ بوجھ حاصل نہیں  کرتے اورنصیحت نہیں  پکڑتے ،اللہ کی قسم! ضرور ضرور لوگ اپنے پڑوسیوں  کو تعلیم دیں ‘ انہیں  علم فقہ سیکھنے والے بنائیں ‘ انہیں  نصیحت کریں ‘ انہیں  بھلائی کا حکم دیں  اوربرائی سے منع کریں ، اور ضرور ضرور لوگ اپنے پڑوسیوں  سے سیکھیں  ،علم فقہ کے ماہر بن جائیں  ،اورنصیحت حاصل کریں  یا پھر جلد ہی میں  ان کی گرفت کروں  گااورسزادوں  گا۔<o:p></o:p> (مجمع الزوائد،ج1،ص402،حدیث نمبر:748)<o:p></o:p> <o:p> </o:p>      اس حدیث پاک سے معلوم ہوتاہے کہ اپنافن دوسروں  کوسکھانا،اپنی مہارت دوسروں  میں  منتقل کرنا تعلیم کا وہ مقصدعظیم ہے کہ اس کی تکمیل نہ کرنے پرفن کے ماہرین کی گرفت ہوسکتی ہے اور ان کو مورد عتاب ٹہرایاجاسکتاہے۔<o:p></o:p> <o:p></o:p>    (10) جہالت و ناخواندگی کا خاتمہ:<o:p></o:p> امام رازی رحمۃ اللہ علیہ سورہ توبہ کی آیت کریمہ (122) کے تحت فرماتے ہیں  :<o:p></o:p> واولئک یحذرون الجہل والمعصیۃ ۔<o:p></o:p> ترجمہ:تاکہ یہ لوگ جہالت ومعصیت سے بچتے رہیں ۔<o:p></o:p> (تفسیررازی سورۃ التوبۃ  122)<o:p></o:p>   علامہ قاضی بیضاوی رحمۃ اللہ علیہ نے لکھا ہے :<o:p></o:p> ولیجعلواغایۃ سعیہم ومعظم غرضہم من الفقاہۃ ارشادالقوم وانذارہم ،وتخصیصہ بالذکرلانہ اہم ۔ ۔ ۔ وانہ ینبغی ان یکون غرض المتعلم فیہ ان یستقیم ویقیم لا الترفع علی الناس والتبسط فی البلاد۔<o:p></o:p> ترجمہ:ان کا سمجھ بوجھ‘ فہم و فقہ حاصل کرنے کا مقصداصلی اورمنتہائے غرض یہ ہوکہ لوگوں  کوراہ ہدایت بتلائیں  اورگمراہی وبے راہ روی سے ڈرائیں ، تذکیر و تہدید کو مقصدتعلیم کے بطور اس لئے ذکرفرمایاکہ وہی بنیادی عنصرہے،۔ ۔ ۔ راہ علم میں  طالب علم کا مقصدیہ ہوکہ کج روی سے گریزکرتے ہوئے صلاح وفلاح کے راستہ پرچلے اورمعاشرہ کے افرادکوجہالت کی تیرگی سے علم کی روشنی میں  لائے،اس کا مقصدیہ نہیں  ہے کہ دوسروں  پراپنی بڑائی جتائے یا سیروتفریح اورنقل مقام کرے۔<o:p></o:p> اس سے واضح ہوتا ہے کہ تعلیم کی ایک اہم غرض یہ ہو نی چاہئے کہ معاشرہ میں  چند افراد ہی تعلیم یافتہ نہ ہوں  بلکہ سماج کا ہر ہر فرد زیور علم سے آراستہ ہو۔<o:p></o:p>  امام غزالی رحمۃ اللہ علیہ فرماتے ہیں :<o:p></o:p>   لان الخاصیۃ التی یتمیز بھا الناس عن سائر البھائم ھو العلم فالانسان انسان بما ھو لاجلہ ولیس ذلک بقوۃ شخصہ فان الجمل اقوی منہ ولا بعظمہ فان الفیل اعظم منہ ولا بشجاعتہ  فان الاسد اشجع منہ ولا باکلہ فان الثور اوسع بطنا منہ  ..... بل لم یخلق الاللعلم  -<o:p></o:p> ترجمہ:۔ وہ خصوصیت جس کی وجہ سے انسان جانوروں  سے ممتاز ہے وہ علم ہے‘ کیونکہ انسان اپنی شرافت علمی کی وجہ سے انسان ہے ‘ اپنی ذاتی قوت کی وجہ سے نہیں  اس لئے کہ اونٹ اس سے زیادہ طاقتور ہے ‘اور نہ ہی اپنی جسامت کی وجہ سے اس لئے کہ ہاتھی اُس سے بڑا جسم رکھتا ہے اور نہ اپنی بہادری کی وجہ سے اس لئے کہ شیر اس سے زیادہ بہادر ہے اور نہ کھانے کی وجہ سے کیونکہ بیل اس سے زیادہ کشادہ پیٹ والا ہے ‘ بلکہ انسان کو صرف علم کے لئے پیدا کیا گیا ہے لہٰذا علم ہی کی وجہ سے وہ صاحب مجد و شرف ہے۔  (احیاء العلوم ،کتاب العلم ،الباب الاول ،فضیلۃ العلم) <o:p></o:p> <o:p></o:p>      اس سے معلوم ہوتا ہے کہ انسان کو دیگر مخلوقات پر فضیلت دینے کی وجہ یہ ہے کہ اللہ تعالیٰ نے اُسے علم کی فضیلت و بزرگی سے نوازا ہے، اسی لئے نبی اکرم صلی اللہ علیہ و الہ وسلم نے علم والوں  کو حکم فرمایا کہ ناواقف افراد کو تعلیم دیں  تاکہ جہالت کی تاریکی دور ہو‘ ناخواندگی کی تیرگی چھٹ جائے اور معاشرہ علم کے نور سے روشن و تابندہ ہوجائے۔ <o:p></o:p> <o:p></o:p> (11) عمل کے سانچہ میں  ڈھالنا:<o:p></o:p> تدریس کا مقصد یہ ہو کہ تعلیم حاصل کرنے والے ان معلومات کو اپنی زندگی میں  روبہ عمل لائیں  ،انھیں  کارگاہ عمل میں تربیت دے کرعمل کے سانچہ میں  ڈھالاجائے کہ علم کے ذریعہ خیر وشر میں  تمییز اور حق وباطل کے درمیان فرق کرتے ہوئے حق کو قبول کریں ‘ خیر کو اختیار کریں  اور باطل کو باطل سمجھیں ‘ شر سے بچتے رہیں ، علم کے مقتضی پر عمل پیرا ہوکربجائے خودحق کی عملی تصویربن جائیں  ۔<o:p></o:p> <o:p></o:p>      حضرت نبی اکرم صلی اللہ علیہ واٰلہ وسلم کا ارشاد مبارک ہے:<o:p></o:p>  مااکتسب مکتسب مثل علم یھدی صاحبہ الی ھدی  او یردہ عن ردی وما استقام دینہ حتی یستقیم عملہ۔ <o:p></o:p> ترجمہ: کوئی کسب کرنے والا اس علم کی سی فضیلت حاصل نہیں  کرسکا جو علم کہ اپنے طلب کرنے والے کو ہدایت کا راستہ بتائے یا اُسے ہلاکت سے بچائے اور کسی شخص کا دین اس وقت تک کامل نہیں  ہوتا جب تک کہ اس کا عمل درست نہ ہوجائے۔  (مجمع الزوائد، ج ۱ ،باب فی فضل العلم)<o:p></o:p> <o:p></o:p> اس حدیث سے آشکار ہوا کہ علم کا مقصد اُس پر عمل کرنا ‘ راہ راست پر گامزن ہوجانا اور بے راہ روی سے محفوظ ہوجانا ہے۔<o:p></o:p> <o:p></o:p>      اللہ تعالی کا ارشاد ہے: کو نواربانیین بماکنتم تعلمون الکتاب وبما کنتم تدرسون۔ <o:p></o:p>  ترجمہ: تم اللہ والے ہوجاؤاس لئے کہ تم قرآن کریم کی تعلیم دیتے ہواور اس وجہ سے کہ تم پڑھتے ہو۔(سورۃ اٰل عمران ۔79)<o:p></o:p> <o:p></o:p>      آیت کریمہ میں  مذکور ’’ربانیین ‘‘ کی تفسیر میں  علامہ قرطبی رحمۃ اللہ علیہ نے فرمایا: ربانی اس شخص کو کہتے ہیں  جو رب کے دین کا عالم ہواور اپنے علم کے مطابق عمل کرے۔<o:p></o:p> <o:p></o:p> تدریسی مقاصد کی تکمیل کے طریقے: تدریس کے مذکورہ بالا بیس(20)مقاصد اُس وقت حاصل ہوتے ہیں  جبکہ صحیح خطوط پر ان کے حصول کی کوشش اور تکمیل کی سعی کی جائے‘ طلبہ کو منصوبہ بند تعلیم دی جائے اور اس کے لئے مختلف طریقے اختیار کئے جائیں ‘ اختتامیہ کے طور پر ذیل میں  پانچ(5) طریقہ ہائے کار بیان کئے جاتے ہیں :<o:p></o:p> <o:p></o:p> (1) تدریس میں  فکر کی وسعت:<o:p></o:p> تدریسی مقاصد کے لئے ضروری ہے کہ بات منوانے کے لئے طالب علم پر تسلط اور جبر سے کام نہ لیا جائے‘ بلکہ صحیح فکر پیش کی جائے ‘ اس کے دلائل دئیے جائیں  اور طالب علم کو سونچنے‘ غور و فکر کرنے کا موقع فراہم کیا جائے اور اظہار خیال کی آزادی دی جائے‘ اسلام نے جبر و اکراہ سے منع کیا ہے۔ اللہ تعالیٰ کا ارشاد ہے:<o:p></o:p>    لا اکراہ فی الدین۔ (سورۃ البقرۃ۔ 256)  <o:p></o:p> <o:p></o:p> اگر طالب علم کو زبردستی اور تسلط سے ماننے کے لئے کہا جائے تو چونکہ وہ اس بات پر مطمئن نہیں  لہٰذا مقصدِ تعلیم جو دوسروں  تک پہنچانا ہے‘ اس کی تکمیل نہ ہوئی۔ کیونکہ جب وہ زمانہ طالب علمی میں  خود مطمئن نہیں  ہوا تو وہ بھی اپنے شاگردوں  اور اسٹوڈنٹس کو مطمئن نہیں  کرسکتا۔ تبلیغ اور دوسروں  کو علم پہنچانے کا مقصد اُسی وقت تکمیل پاسکتا ہے جب کہ آزادانہ ماحول میں  صحیح فکر پیش کی جائے‘ خواہ کوئی عقیدہ کا مسئلہ ہو یا فقہی جزئیہ‘ علم الحساب کے کسی مسئلہ (Problem) کا حل (Solution) ہو یا کوئی سیاسی‘ اقتصادی یا فکری بات ہو‘ طالب علم کو کشادہ ماحول میں  غور و فکر کرنے کا موقع اور فکری حریت دی جائے‘ اظہار خیال کا موقع دیا جائے‘ ہوسکتا ہے کہ اس کے ذہن میں  کوئی مفید و کارآمد بات ہو‘ استاذاس کو سنیں  اور صحیح فکر پر تحسین کردیں  اور غلطی پر تنبیہ کریں ۔ <o:p></o:p> <o:p></o:p> چنانچہ فاروق اعظم رضی اللہ عنہ سے متعلق مصنف عبدالرزاق میں روایت ہے:<o:p></o:p>   عن ابی عبدالرحمن قال قال عمر بن الخطاب لا تغالوا فی مھور النساء فقالت امرأۃ خاصمت عمر فخصمتہ۔<o:p></o:p>  ترجمہ: حضرت ابو عبدالرحمن سلمی رضی اللہ عنہ سے روایت ہے سیدنا عمر بن خطاب رضی اللہ عنہ نے فرمایا عورتوں  کے مہر میں  مبالغہ مت کرو‘ تو ایک خاتون نے کہا اے عمر(رضی اللہ عنہ) ! آپ کو اس کا اختیار نہیں  کہ مہر کی مقدار متعین فرمائیں  کیونکہ اللہ تعالیٰ کا ارشاد ہے اور تم اسے بہت زیادہ مال دے چکے ہو تو اُس سے کچھ نہ لو‘ اس بات پر حضرت عمر رضی اللہ عنہ نے فرمایا : ایک خاتون نے عمر سے گفتگوکی اور اس پر غالب آگئی۔ (مصنف عبدالرزاق، ج6، ص68/69 ،حدیث نمبر10420)۔<o:p></o:p> <o:p></o:p> (2) نصب العین پیش نظر رکھنا چاہئے:<o:p></o:p> استاذ ہو یا طالب علم ‘ تعلیم و تعلم سے قبل نصب العین متعین کرنا چاہئے اور اسا تذہ نصب العین کے مطابق طلبہ کو تعلیم دیں  ‘ نصب العین کا تعین کرنے سے پہلے یا اس کو پیش نظر رکھے بغیر تعلیم و تدریس کامل طو رپر سودمند نہ ہوگی اور اس کے مقاصد کی تکمیل نہ ہوسکے گی۔<o:p></o:p> <o:p></o:p>   (3) تدریس میں  تسہیل و تیسیر:<o:p></o:p> تدریس و تفہیم میں  ایسا طریقہ اختیار کیا جائے جس سے طلبہ کے لئے بات کو سمجھنے میں  آسانی ہو‘ بات کو تفہیم کے دوران چیستان اور معمہ کے طور پر پیش نہیں  کرنا چاہئے ۔ ارشاد نبوی ہے:<o:p></o:p> علموا ویسروا ولاتعسروا۔<o:p></o:p>  ترجمہ:علم سکھاؤ، آسانی وسہولت فراہم کرو اور دشواری پیدامت کرو۔ (مسند احمد، حدیث نمبر2029- مجمع الزوائد ج 1ص 131 )<o:p></o:p> <o:p></o:p>      لہٰذا افہام وتفہیم کے لئے جوطریقہ آسان ترین ہو وہ استعمال کیا جانا چاہئے تسہیل کا یہ مطلب نہیں  کہ نصاب  میں  سے ضروری امور کو حذف کر دیاجائے یا دقیق مسائل کو نظر انداز کیا جائے ، بلکہ مقررہ نصاب اور دقیق وباریک مسائل کو آسان انداز میں  سمجھانا چاہئے جیسے بورڈ کا استعمال‘ تمثیلا ت ، ضرورت کے وقت عملی تجربہ  (Practicals) وغیرہ ‘ہاں  البتہ ان کی ذہنی صلاحیتوں  کو مزید بڑھانے کے لئے بطور امتحان چیستان و معمہ کی شکل میں  نت نئے سوالات پیش کئے جائیں  تو بہتر ہے۔<o:p></o:p> <o:p></o:p>      (4) طالب علم کو سوال کا موقع دیاجائے:<o:p></o:p> طالب علم کس حد تک سمجھا ہے اور اُس کو استاذکی تقریر اور لکچر سے کتنا فائدہ ہوا ہے‘ یہ اس وقت واضح طور پر معلوم ہوتا ہے جب اُسے کچھ سوال کرنے کا موقع دیا جائے‘ استاذکے لکچر کی روشنی میں  وہ کچھ اور گہرائی و گیرائی کا سوال کرے تو اس کا مطلب یہ ہے کہ وہ لکچر سمجھ چکا ہے‘ تبھی مزید معلومات چاہتا ہے‘ اگر وہ لکچر کو نہ سمجھا ہو تو اُس کا سوال خود اس کا اظہار کردیتا ہے‘ ایسے وقت استاذکو سمجھانے کا دوسرا طریقہ اختیار کرنا چاہئے۔ طلبہ سے کبھی مایوس نہ ہونااورنہ انہیں  نروس کرناچاہئے ،بہرطورانکی حوصلہ افزائی کرتے ہوئے مزیداپنی کاوشوں  کوجاری رکھنا چاہئیے تاآنکہ وہ فکرونظر‘علم وعمل کے شہسواربن کرمیدان عمل کوفتح کرلیں  ۔<o:p></o:p> <o:p></o:p>  نئے عنصرآتے نہیں  چمن میں  گل کھلانے کو <o:p></o:p>     یہی مٹی سنورتی ہے یہی ذرے ابھرتے ہیں <o:p></o:p> <o:p></o:p> (5)جدید عصری وسائل کا استعمال:<o:p></o:p> تدریس کے مقاصد جس طرح عام اور سارے انسانی معاشرہ کو گھیرے ہوئے اور محیط ہیں ‘ اسی طرح اس کے طریقے جس قدر عام ہوں  مقاصد کی تکمیل کے لئے زیادہ سہولت بخش اور موزوں  ہوں  گے‘ آج ابلاغ و ترسیل کے عصری ذرائع ‘ روزنامے‘ ماہ نامے‘ سالانہ میگزینس کے علاوہ موبائل ‘ ٹی وی‘ انٹرنیٹ زیادہ مرکز توجہ ہیں ۔ اگر ان ذرائع سے تخریبِ اخلاق ‘ بے حیائی و بے پردگی پھیلائی جارہی ہے تو ان ذرائع کو کلی طور پر چھوڑنے کا حکم نہیں  دیا جاسکتا بلکہ دین اسلام  اُس کو صحیح طریقہ سے استعمال کرنے کی تعلیم دیتا ہے۔<o:p></o:p> <o:p></o:p> <o:p></o:p> عرب کا طریقہ یہ تھا کہ جب کوئی اہم بات کہنا منظور ہو اور ساری قوم کو متوجہ کرنا مقصود ہو تو صفا پہاڑ پر چڑھ کر ندا دیتے اور ساری قوم متوجہ ہوجاتی‘ حضرت نبی اکرم صلی اللہ علیہ و آلہ وسلم نے اعلانیہ اسلام کی عمومی دعوت دینے کے لئے یہی مروجہ طریقہ اختیار فرمایا‘ صفا پہاڑ پر تشریف لے گئے اور قوم کو اسلام کی دعوت دی‘ حق کا پیغام سنایا‘ صفا کے علاوہ جبلِ نور‘ کوہِ ابو قبیس‘ مروہ اور دیگر پہاڑبھی تھے ان کے بجائے کوہِ صفا کا حضور صلی اللہ علیہ وسلم نے انتخاب فرمایا ‘ اپنے عمل مبارک سے امت کی رہنمائی فرمائی اور تعلیم دی کہ پیغام رسانی کے لئے وہ طریقہ اختیار کرنا چاہئے جو زیادہ لوگوں تک اپنی بات کوپہنچانے میں  مؤثروکارآمدہو۔<o:p></o:p> <o:p></o:p> لہٰذا مسلمانوں  کے لئے ضروری ہے کہ تعلیم و تدریس کے مقاصد کی تکمیل کی خاطر تمام عصری وسائل کو استعمال کریں  ‘ اشاعتی اسباب‘ پرنٹ میڈیا اور الکٹرانک میڈیا کے ذریعہ تعلیم اتنی عام کردی جائے کہ ان وسائل و اسباب میں  تعلیم و تدریس کا استعمال کثرت سے ہونے لگے‘ مخربِ اخلاق ویڈیو‘ آڈیو اور مضامین و کتب کا جال جس نظم و نسق کے ساتھ پوری دنیا میں  پھیل گیا ہے‘ اور اس کے لئے سینکڑوں  ریڈیو اور ٹی وی چیانلس اور ہزاروں  ویب سائٹس کام کررہی ہیں ‘ فروغ تعلیم کی غرض سے اور تدریسی مقاصد کی تکمیل کے لئے اسی تعداد میں  بلکہ اس سے زائد ‘ اخلاقی گندگیوں  سے پاک چیانلس اور ویب سائٹس مصروف عمل کئے جائیں ‘ ہر چیانل ‘ ویب سائٹ اور ہر ذریعہ تعلیم کی غیر معمولی تشہیر ہوتی رہے تو اس کی وجہ سے فوراً نہ سہی آہستہ آہستہ مقاصد حاصل ہوتے نظر آئیں  گے اور ایک حد تک ان کی تکمیل ہوسکے گی اور کچھ سالوں  کے دوران عالمی حالات میں  قابل لحاظ سماجی و معاشرتی ‘ انفرادی و اجتماعی تبدیلی آئے گی۔<o:p></o:p> <o:p></o:p> ضمیر لالہ میں  روشن چراغ آرزو کردے<o:p></o:p> <o:p></o:p> چمن کے ذرے ذرے کو شہید جستجو کردے<o:p></o:p> <o:p></o:p> اٹھ کہ اب بزم جہاں  کا اور ہی انداز ہے<o:p></o:p> <o:p></o:p> مشرق و مغرب میں  تیرے دور کا آغاز ہے <o:p></o:p> <o:p></o:p> سبق پھر پڑھ صداقت کا‘ عدالت کا ‘شجاعت کا<o:p></o:p> <o:p></o:p> لیا جائے گا کام تجھ سے دنیا کی امامت کا<o:p></o:p> <o:p></o:p>      از:مولانا مفتی حافظ سید ضیاء الدین نقشبندی دامت برکاتہم<o:p></o:p> شیخ الفقہ جامعہ نظامیہ وبانی ابو الحسنات اسلامک ریسرچ سنٹر<o:p></o:p>  <a href="http://www.ziaislamic.com/">www.ziaislamic.com</a><o:p></o:p> <o:p> </o:p> <o:p> </o:p>

Mufti Maulana Syed Zia Uddin Naqshbandi Quadri

Shaik-ul-Fiqh - Jamia Nizamia

Mufti Maulana Syed Zia Uddin Naqshbandi Quadri

Shaik-ul-Fiqh - Jamia Nizamia

Burning Topics

تدریسی مقاصدعصر حاضر کے تناظر میں

Mufti Maulana Syed Zia Uddin Naqshbandi Quadri

Shaik-ul-Fiqh - Jamia Nizamia

Mufti Maulana Syed Zia Uddin Naqshbandi Quadri

Shaik-ul-Fiqh - Jamia Nizamia

Burning Topics

&#1578;&#1583;&#1585;&#1740;&#1587;&#1740; &#1605;&#1602;&#1575;&#1589;&#1583;&#1593;&#1589;&#1585; &#1581;&#1575;&#1590;&#1585; &#1705;&#1746; &#1578;&#1606;&#1575;&#1592;&#1585; &#1605;&#1740;&#1722;

تدریسی مقاصدعصر حاضر کے تناظر میں