اہل بیت وصحابہ سے محبت ' اہل سنت کا شعار،ان سے وابستگی نجات وہدایت کی ضمانت

دنیابندۂ مؤمن کے لئے مسافرخانہ ہے،زندگی ایک سفر ہےاور آخرت حقیقی منزل ہے،بندۂمؤمن کو دشوار کن راہوں سے گزرتے ہوئے ،شیطان کے مکر وفریب سے بچتے ہوئےمنزل مقصود تک پہنچنا ہوتا ہے،حضور اکرم صلی اللہ علیہ وآلہ وسلم نے اس سفر کو طئے کرنے کے لئے امت مسلمہ کو محفوظ کشتی بھی عطا فرمائی اور رہبر ورہنما بھی عطا فرمائے ،آپ نے حضرات اہلبیت کرام کو سفینۂ نوح کی مانند قرار دیا،ارشاد مبارک ہے: مثل أهل بيتي مثل سفينة نوح من ركبها نجا ، ومن تخلف عنها هلك - ترجمہ:بیشک تم میں میرے اہل بیت کی مثال حضرت نوح علیہ السلام کی کشتی کی طرح ہے،جو اس میں سوار ہوگیا نجات پالیا اورجو اس سے دور  رہا ہلاک ہوگیا-( المستدرك على الصحيحين للحاكم-حدیث نمبر:3270) اور حضرات صحابۂ کرام کی بابت ارشاد فرمایا: إنما أصحابي كالنجوم ، فبأيهم اقتديتم اهتديتم- ترجمہ:میرے صحابہ ہدایت کے درخشاں ستارے ہیں،تم ان میں جس کسی کی پیروی کروگے ہدایت پالوگے-( الإبانة الكبرى لابن بطة- حدیث نمبر709)   ستاروں کا کام راستہ دکھانا ہوتا ہے اور وہ خود بھی روشن ہوتے ہیں اور دوسروں کو بھی روشنی عطاکرتے ہیں- ان حقائق کا اظہارحضرت مولانا مفتی حافظ سید ضیاء الدین نقشبندی  دامت برکاتہم شیخ الفقہ جامعہ نظامیہ وبانی ابو الحسنات اسلامک ریسرچ سنٹر نے AHIRCکے زیر اہتمام مسجد ابو الحسنات پھول باغ جہاں نما حیدرآباد میں منعقدہ ہفتہ واری توسیعی لکچر کے دوران فرمایا،سلسلۂ خطاب جاری رکھتے ہوئے مفتی صاحب قبلہ  نے فرمایا  کہ دنیا کے سمندر میں راستہ طئے کرنے کے لئے سورای کی بھی ضرورت ہوتی ہے اور راستہ دکھانے والے کی بھی،حضرات اہل بیت کرام محفوظ کشتی ہیں اور حضرات صحابۂ کرام ہدایت کے ستارے ہیں-ان حضرات سے وابستگی کے ذریعہ انسان منزل مقصود کو پہنچ سکتا ہے- آپ نےامام رازی کے حوالہ سے کہا کہ اہل سنت وجماعت کا بیڑا پار ہے کیونکہ وہ حضرات اہل بیت کی کشتی میں سوار ہیں اور صحابۂکرام سے روشنی حاصل کررہےہیں- اور فرمایاکہ حضرات اہل بیت کرام کو اللہ تعالی نے ہر قسم کی فکری ،عملی اور اعتقادی گندگی سے محفوظ رکھا ،ان کی پاکیزگی وطہارت کا بیان قرآن میں نازل فرمایا،اور اللہ تعالی نے تمام صحابۂ کرام سے جنت کا وعدہ فرمایا اور انہیں اپنی رضا وخوشنودی کا مژدۂ جاں فزا عطا فرمایا،ارشاد الہی ہے: وَكُلًّا وَعَدَ اللَّهُ الْحُسْنَى - ترجمہ:اور اللہ تعالی نے ان تمام(صحابہ)سے جنت وعدہ کرلیا ہے-(سورۃ الحدید:10) مفتی صاحب قبلہ نے فرمایا کہ جب کسی مسئلہ میں مجتہد اجتہاد کرے اور وہ حق کو پالے تو اسے دوہراثواب دیا جاتا ہے اور اگر وہ خطا کرجائے تو اسے ایک ثواب دیا جاتا ہے،جب عام مجتہد کا اجتہادی خطا پر مؤاخذہ نہیں کیا جاتا بلکہ ایک ثواب دیا جاتا ہے تو پھر کوئی باعظمت صحابی اگراپنے اجتہاد میں حق کو نہ پائيں تو کسی کو یہ اجازت نہیں کہ ان کے خلاف اپنی زبان کھولے،صحابۂ کرام کے مابین جو مشاجرات ہوئیں ان میں کسی کو خوض کرنے اور کلام کرنے کی اجازت نہیں،ائمۂ دین اور علماء اعلام نے امت کو یہی تعلیم دی کہ ہم تمام صحابۂ کرام سے محبت کرتے ہیں اورہمیشہ  خیر وبھلائی کے ساتھ ہی ان کا ذکر کریں گے- مفتی صاحب قبلہ نے فرمایا کہ اہل سنت وجماعت اس بات پر متفق ہیں کہ حضرت علی مرتضی رضی اللہ عنہ اور حضرت امیر معاویہ رضی اللہ عنہ کے درمیان جو کچھ ہوا اس میں حضرت مولائے کائنات ہی حق پر تھے- دوران خطاب آپ نے فرمایا کہ اگر حضرت امیر معاویہ باطل پر ہوتے تو امام حسن مجتبی رضی اللہ عنہ کبھی آپ کے حق میں خلافت سے دست بردار نہ ہوتے،اس وقت امام حسین رضی اللہ عنہ بھی موجود تھے آپ بھی خاموش رہے،آپ اگر حضرت امیرمعاویہ کو حق پر نہ مانتے تو ضرور آواز اٹھاتے- آپ نے مسند ابو یعلی کے حوالہ سے حدیث شریف بیان کی کہ حضور اکرم صلی اللہ علیہ وآلہ وسلم نے ارشاد فرمایا:میری امت کا معاملہ عدل وانصاف کے ساتھ چلتا رہے گایہاں تک کہ سب سے پہلے اس میں رخنہ ڈالنے والا بنو امیہ کا ایک شخص ہوگا جسے یزید کہا جائے گا- لا يزال أمر أمتي قائما بالقسط حتى يكون أول من يثلمه رجل من بني أمية يقال له : يزيد –( مسند أبي يعلى الموصلي،حدیث نمبر:837) حدیث شریف کے مطابق سب سے پہلے دین میں فساد بپاکرنے والایزید ہے،اور حضرت معاویہ رضی اللہ عنہ کی خلافت کا زمانہ اس سے پہلے کا ہے،حضور نے اس سے پہلے والے زمانہ سے متعلق فرمایا کہ اس میں امت کا معاملہ مسلسل عدل وانصاف کے ساتھ چلتا رہے گا-اس کے علاوہ حضور صلی اللہ علیہ وآلہ وسلم نے بطور خاص حضرت امیر معاویہ کے حق میں دعا فرمائی: عَنِ النَّبِىِّ صلى الله عليه وسلم أَنَّهُ قَالَ لِمُعَاوِيَةَ : اللَّهُمَّ اجْعَلْهُ هَادِيًا مَهْدِيًّا وَاهْدِ بِهِ. ائے اللہ!انہیں ہدایت دینے والا اور ہدایت یافتہ بنا اور ان کو ہدایت کا ذریعہ بنا! -(جامع الترمذی،ابواب المناقب، باب مناقب معاوية بن أبى سفيان رضى الله عنه. حدیث نمبر:4213-تاریخ الخلفاء) اور مسند امام احمد میں حدیث شریف ہے: عَنِ الْعِرْبَاضِ بْنِ سَارِيَةَ السُّلَمِىِّ قَالَ سَمِعْتُ رَسُولَ اللَّهِ -صلى الله عليه وسلم- وَهُوَ يَدْعُو إِلَى السَّحُورِ فِى شَهْرِ رَمَضَانَ  هَلُمَّ إِلَى الْغَدَاءِ الْمُبَارَكِ. ثُمَّ سَمِعْتُهُ يَقُولُ  اللَّهُمَّ عَلِّمْ مُعَاوِيَةَ الْكِتَابَ وَالْحِسَابَ وَقِهِ الْعَذَابَ.  ترجمہ:حضرت عرباض بن ساریہ سلمی رضی اللہ تعالی عنہ سے روایت ہے،آپ نے فرمایا کہ میں نے حضرت رسول اللہ صلی اللہ علیہ والہ وسلم کو فرماتے سنا ،اس حال میں کہ آپ ماہ رمضان میں سحری کی طرف بلارہے تھے،مبارک کھانے کی طرف آؤ!پھر میں نے آپ کو فرماتے سنا:الہی!معاویہ کو کتاب وحساب کا علم عطا فرما اور عذاب سے ان کی حفاظت فرما!- (مسند امام احمد ، حديث العرباض بن سارية،حدیث نمبر 17616 – المعجم الكبير، حدیث نمبر:     1503- صحيح ابن حبان، حدیث نمبر: 7333- صحيح ابن خزيمة، حدیث نمبر: 1831- معرفة الصحابة لأبي نعيم الأصبهاني- من اسمه الحارث، حدیث نمبر:1952- مسند الشاميين للطبراني، حدیث نمبر: 1981- جامع الأحاديث، الهمزة مع اللام ،حدیث نمبر: 5114- الجامع الكبير للسيوطي، حدیث نمبر: 421- مجمع الزوائد ومنبع الفوائد، حدیث نمبر: 15917- اتحاف الخيرة المهرة بزوائد المسانيد العشرة-تاریخ الخلفاء) سلام ودعا پر جلسہ کا اختتام عمل میں آیا، مولانا حافظ سید واحد علی قادری حفظہ اللہ  استاذ جامعہ نظامیہ نے نظامت کے فرائض انجام دئے – <a href="../../../../">www.ziaislamic.com</a>

Mufti Maulana Syed Zia Uddin Naqshbandi Quadri

Shaik-ul-Fiqh - Jamia Nizamia

Mufti Maulana Syed Zia Uddin Naqshbandi Quadri

Shaik-ul-Fiqh - Jamia Nizamia

News

اہل بیت وصحابہ سے محبت ' اہل سنت کا شعار،ان سے وابستگی نجات وہدایت کی ضمانت