فضا‏ئل جمعہ اور جمعۃ الوداع

فضا&rlm;ئل جمعہ اور جمعۃ الوداع جمعہ کے فضائل اور اس کی اہمیت سے متعلق زجاجۃ المصابیح میں وارد چند احادیث مبارکہ مع ترجمہ درج ذیل ہیں: صحیح بخاری و صحیح مسلم میں حدیث پاک ہے :        عَنْ أَبِي هُرَيْرَةَ قَالَ قَالَ : رَسُولُ اللَّهِ صَلَّى اللَّهُ عَلَيْهِ وَسَلَّمَ نَحْنُ الْآخِرُونَ السَّابِقُونَ يَوْمَ الْقِيَامَةِ ، بَيْدَ أَنَّهُمْ أُوتُوا الْكِتَابَ مِنْ قَبْلِنَا وَأُوتِينَاهُ مِنْ بَعْدِهِمْ ثُمَّ هَذَا يَوْمُهُمُ الَّذِى فُرِضَ عَلَيْهِمْ يَعْنِي الْجُمُعَة فَاخْتَلَفُوا فِيهِ ،فَهَدَانَا اللَّهُ لَهُ  وَالنَّاسُ لَنَا فِيهِ تَبَعٌ الْيَهُودُ غَدًا وَالنَّصَارَى بَعْدَ غَدٍ- ترجمہ:سیدنا ابو ہریرہ رضی اللہ تعالی عنہ سے روایت ہے‘ آپ فرماتے ہیں کہ حضرت رسول اللہ صلی اللہ علیہ والہ وسلم  نے ارشاد فرمایا : ہم (دنیا میں) سب سے پیچھے آئے اور قیامت کے دن سب سے پہلے ( اس طرح ) ہوں گے ( کہ قبروں سے سب سے پہلے اٹھائے جائیں گے‘ اور سب سے پہلے پل صراط پر سے گزر جائیں گے اور سب اُمتوں سے پہلے ہمارا فیصلہ ہوگا‘ انتظار کی تکلیف نہیں اٹھانی پڑے گی‘ اور پھر ) جنت میں داخل ہونے میں سب اُمتوں میں پہلے ہم داخل ہوں گے-  ہاں یہ سچ ہے کہ اہل کتاب کو ہم سے پہلے کتاب دی گئی اور تم کو ان کے بعد کتاب عطا ہوئی‘ ان کو جمعہ کا دن مقرر کرکے دیا گیا (مگر اس جمعہ کے دن کی ان کو کچھ قدر نہ ہوئی) انہوں نے جمعہ کے لینے میں اختلاف کرکے جمعہ کو قبول نہیں کیا ۔ خدا کا شکر ہے کہ اللہ تعالی نے ہم کو جمعہ کے دن کے اختیار کرنے کی ہدایت فرمائی‘ ہم نے جمعہ کو اختیار کیا اور اس دن کے لحاظ سے اہل کتاب ہم سے پیچھے ہوگئے‘ یہود (شنبہ کے دن کو اختیار) کرکے ایک دن پیچھے ہوگئے اور نصاری (اتوار کو اختیار کرکے) دو دن پیچھے ہوگئے۔  ( صحیح بخاری ، باب فرض الجمعة . حدیث نمبر:876 - صحیح مسلم، باب هداية هذه الأمة ليوم الجمعة. حدیث نمبر:2015- زجاجۃ المصابیح،باب الجمعۃ ، ج:1،ص:379)     جمعہ  کو حضرت آدم علیہ السلام کی تخلیق :     صحیح مسلم شریف میں حدیث مبارک ہے:          عَنْ أَبِى هُرَيْرَةَ قَالَ قَالَ : رَسُولُ اللَّهِ صَلَّى اللَّهُ عَلَيْهِ وَسَلَّمَ خَيْرُ يَوْمٍ طَلَعَتْ عَلَيْهِ الشَّمْسُ يَوْمُ الْجُمُعَةِ فِيهِ خُلِقَ آدَمُ وَفِيهِ أُدْخِلَ الْجَنَّةَ وَفِيهِ أُخْرِجَ مِنْهَا وَلاَ تَقُومُ السَّاعَةُ إِلاَّ فِى يَوْمِ الْجُمُعَةِ.        سیدنا ابو ہریرہ رضی اللہ تعالیٰ عنہ سے روایت ہے‘ آپ فرماتے ہیں کہ حضرت رسول اللہ  صلی اللہ علیہ والہ وسلم نے ارشاد فرمایا کہ تمام دنوں سے بہتر جمعہ کا دن ‘ حضرت آدم علیہ الصلوٰۃ والسلام کے پیدائش کی تکمیل ہوئی، جمعہ کے دن ہی آپ کے جسم مبارک میں روح ڈالی گئی‘ پھر آپ کو جمعہ کے دن ہی جنت سے باہر لایا گیا اور قیامت (یعنی نفخ ثانی جس سے تمام مخلوق زندہ ہوکر میدان حشر میں آئے گی) جمعہ کے دن ہی ہوگی۔      (صحیح مسلم شریف ، باب فضل يوم الجمعة. حدیث نمبر:2014- زجاجۃ المصابیح،باب الجمعۃ ، ج:1،ص:379/380)     قبولیت دعا کی گھڑی :   جامع ترمذی اور مسند امام احمد میں حدیث مبارک ہے: عَنْ أَبِى هُرَيْرَةَ قَالَ قَالَ رَسُولُ اللَّهِ صلى الله عليه وسلم: الْيَوْمُ الْمَوْعُودُ يَوْمُ الْقِيَامَةِ وَالْيَوْمُ الْمَشْهُودُ يَوْمُ عَرَفَةَ وَالشَّاهِدُ يَوْمُ الْجُمُعَةِ وَمَا طَلَعَتِ الشَّمْسُ وَلاَ غَرَبَتْ عَلَى يَوْمٍ أَفْضَلَ مِنْهُ فِيهِ سَاعَةٌ لاَ يُوَافِقُهَا عَبْدٌ مُؤْمِنٌ يَدْعُو اللَّهَ بِخَيْرٍ إِلاَّ اسْتَجَابَ اللَّهُ لَهُ وَلاَ يَسْتَعِيذُ مِنْ شَرٍّ إِلاَّ أَعَاذَهُ اللَّهُ مِنْهُ. ترجمہ:سیدنا ابو ہریرہ رضی اللہ تعالیٰ عنہ سے روایت ہے‘ آپ فرماتے ہیں کہ حضرت رسول اللہ صلی اللہ تعالیٰ علیہ والہ وسلم نے (سورۂ بروج کی تفسیر میں) ارشاد فرمایا کہ " الْيَوْم الْمَوْعُود " (وہ دن جس کا وعدہ ہے) سے مراد قیامت کا دن ہے-    اور " الْيَوْم الْمَشْهُود "(وہ دن جس دن میں لوگ تمام دنیا سے عرفات میں حاضر ہوتے ہے) سے مراد عرفہ کا دن ہے –    اور "شاهِد" سے مراد جمعہ کا دن ہے (کہ لوگ تو اپنی اپنی جگہ رہتے ہیں‘ اور جمعہ اُن پر حاضر ہوتا ہے) اور سب دنوں سے افضل دن جمعہ کا دن ہے‘ جمعہ کے دن ایک گھڑی ایسی ہے کہ جو بندۂ مومن اللہ تعالیٰ سے اس وقت دعا خیر کرتا ہے تو اس کی دعا اللہ تعالیٰ قبول فرمالیتا ہے‘ اور جس شر سے بچانے کی دعا کرتا ہے تو اللہ تعالیٰ اس کو اس شر سے بچائے رکھتا ہے۔     (جامع ترمذی،ابواب تفسير القرآن ، حدیث نمبر: 3661-      مسند امام احمد، مسند أبى هريرة رضي اللہ عنہ ، حدیث نمبر: 8193-      زجاجۃ المصابیح،باب الجمعۃ ، ج:1،ص: 380)       جمعہ کے دن مجھ پر کثرت سے درود شریف پڑھا کرو!     سنن ابوداؤد ، سنن نسائی ، سنن ابن ماجہ اور مستدرک علی الصحیحین وغیرہ  میں حدیث مبارک ہے:        عَنْ أَوْسِ بْنِ أَوْسٍ قَالَ قَالَ رَسُولُ اللَّهِ صلى الله عليه وسلم : إِنَّ مِنْ أَفْضَلِ أَيَّامِكُمْ يَوْمَ الْجُمُعَةِ فِيهِ خُلِقَ آدَمُ وَفِيهِ قُبِضَ وَفِيهِ النَّفْخَةُ وَفِيهِ الصَّعْقَةُ فَأَكْثِرُوا عَلَىَّ مِنَ الصَّلاَةِ فِيهِ فَإِنَّ صَلاَتَكُمْ مَعْرُوضَةٌ عَلَىَّ. قَالَ قَالُوا يَا رَسُولَ اللَّهِ وَكَيْفَ تُعْرَضُ صَلاَتُنَا عَلَيْكَ وَقَدْ أَرِمْتَ يَقُولُونَ بَلِيتَ. فَقَالَ  إِنَّ اللَّهَ عَزَّ وَجَلَّ حَرَّمَ عَلَى الأَرْضِ أَجْسَادَ الأَنْبِيَاءِ .        ترجمہ: سیدنا اوس بن اوس رضی اللہ عنہ سے روایت ہے انہوں نے فرمایا حضرت رسول اللہ صلی اللہ علیہ وسلم نے ارشاد فرمایا کہ تمہارے دنوں میں زیادہ فضیلت والا دن جمعہ ہے‘ اسی دن آدم علیہ السلام پیدا ہوئے‘ اسی دن وصال فرمائے‘ اسی دن صور پھونکا جائے گا اور اسی دن لوگوں پر بے ہوشی طاری ہوگی۔ لہٰذا تم اس دن مجھ پر کثرت سے درود شریف پڑھا کرو کیونکہ تمہارا درود میری بارگاہ میں پیش کیا جاتا ہے ‘ راوی کہتے ہیں صحابہ کرام علیھم الرضوان نے عرض کیا: یا رسول اللہ صلی اللہ علیہ و آلہ وسلم ! آپ کی بارگاہ میں ہمارا درود کس طرح پیش کیا جائے گا جب کہ آپ وصال فرماچکے ہوں گے؟ تو حضور اکرم صلی اللہ علیہ و آلہ وسلم نے ارشاد فرمایا: حقیقت یہ ہے کہ اللہ تعالیٰ نے زمین پر انبیاء کرام کے اجسام کو حرام قرار دیا ہے۔  (سنن ابو داؤد شریف ج 1 ‘ کتاب الصلوٰۃ فضل یوم الجمعۃ ولیلۃ الجمعۃ ص 150- سنن نسائی، باب إكثار الصلاة على النبى -صلى الله عليه وسلم- يوم الجمعة،حدیث نمبر: 1385- سنن ابن ماجہ، باب فى فضل الجمعة، حدیث نمبر: 1138- مستدرک علی الصحیحین ، كتاب الجمعة، حدیث نمبر: 980- مسند امام احمد، حديث أوس بن أبى أوس الثقفى، حدیث نمبر: 16592- مصنف ابن ابی شیبہ،ج2،ص389- سنن کبری للنسائي، حدیث نمبر:  16592- معجم کبیر طبرانی، حدیث نمبر:  588- معجم اوسط طبرانی، حدیث نمبر:  4936- بیہقی شب الایمان، حدیث نمبر:  2894- صحیح ابن حبان، باب الأدعية، حدیث نمبر:  912- صحیح ابن خزیمۃ، جماع أبواب فضل الجمعة، حدیث نمبر:  1638- سنن صغری للبیہقی، باب فضل الجمعة، حدیث نمبر:  607- جامع الأحاديث، حدیث نمبر:  8441- الجامع الكبير للسيوطي، حدیث نمبر:  1790- سنن دارمى، حدیث نمبر: 1624- كنز العمال، حدیث نمبر: 2202- زجاجۃ المصابیح ، باب الجمعۃ ، ج:1،ص:382)     اور سنن ابن ماجہ ،جامع الاحادیث والمراسیل اور جامع کبیر میں ان الفاظ کا اضافہ ہے :   فَنَبِىُّ اللَّهِ حَىٌّ يُرْزَقُ.     ترجمہ: اللہ کے نبی حیات ہیں ،رزق پاتے ہیں- (سنن ابن ماجہ، باب ذكر وفاته ودفنه -صلى الله عليه وسلم- حدیث نمبر: 1706- جامع الأحاديث، حدیث نمبر:  4320- الجامع الكبير للسيوطي، حدیث نمبر:  61)       جمعہ کو جس شخص کا انتقال ہو وہ قبر کے عذاب سے محفوظ رہتا ہے !       جامع ترمذی اور مسند امام احمد میں حدیث مبارک ہے:       عَنْ عَبْدِ اللَّهِ بْنِ عَمْرٍو قَالَ قَالَ رَسُولُ اللَّهِ صلى الله عليه وسلم: مَا مِنْ مُسْلِمٍ يَمُوتُ يَوْمَ الْجُمُعَةِ أَوْ لَيْلَةَ الْجُمُعَةِ إِلاَّ وَقَاهُ اللَّهُ فِتْنَةَ الْقَبْرِ.     ترجمہ:سیدنا عبداللہ بن عمرو رضی اللہ تعالیٰ عنہما سے روایت ہے‘ آپ فرماتے ہیں کہ حضرت رسول اللہ صلی اللہ تعالیٰ علیہ والہ وسلم نے ارشاد فرمایا : جو مسلمان جمعہ کے دن یا جمعہ کی رات کو انتقال کرجائے ، اللہ تعالیٰ اس مسلمان کو قبر کے عذاب اور سوال سے محفوظ رکھتا ہے ۔     (جامع ترمذی ، باب ما جاء فيمن مات يوم الجمعة. حدیث نمبر:  1095-  مسند امام احمد ، مسند عبد الله بن عمرو رضی اللہ تعالی عنہ ، حدیث نمبر:  6739 - زجاجۃ المصابیح ، باب الجمعۃ ، ج:1،ص:382)   جمعۃ الوداع سے متعلق حضرت محدث دکن رحمۃ اللہ تعالی علیہ فرماتے ہیں:      اب جمعۃ الوداع کے بارے میں سنئے!  صاحبو! ارشاد باری ہورہا ہے : ذَلِكَ بِأَنَّهُمْ لَا يُصِيبُهُمْ ظَمَأٌ وَلَا نَصَبٌ وَلَا مَخْمَصَةٌ فِي سَبِيلِ اللَّهِ وَلَا يَطَئُونَ مَوْطِئًا يَغِيظُ الْكُفَّارَ وَلَا يَنَالُونَ مِنْ عَدُوٍّ نَيْلًا إِلَّا كُتِبَ لَهُمْ بِهِ عَمَلٌ صَالِحٌ إِنَّ اللَّهَ لَا يُضِيعُ أَجْرَ الْمُحْسِنِينَ -(پ11، رکوع14، سورۂ توبہ)        ترجمہ : (اور) یہ (ساتھ جانے کا ضروری ہونا) اس سبب سے ہے کہ ان کو (یعنی رسول اللہ صلی اللہ علیہ وسلم کے ساتھ جانے والوں کو) اللہ کی راہ میں جو پیاس لگی اور جو ماندگی پہنچی اور جو بھوک لگی اور جو چلنا چلے جو کفار کے لئے موجب غضب ہوا ، اوردشمنوں کی جو کچھ خبر لی ، ان سب پر ان کے نام ایک ایک نیک کام لکھا گیا (اگر یہ ساتھ جاتے تو ان کے نام بھی لکھے جاتے ) یقینا اللہ تعالیٰ مخلصین کا اجر ضائع نہیں کرتا۔        سنو؛ صاحبو! ایک شخص بدتمیز ، بد سلیقہ اور بے ادب ہے ، نجاست سے آلودہ ہے، اس نے نہ تو غسل کیا اور نہ کپڑے تبدیل کیا، بدن سے بدبو آرہی ہے ، ہر چند اس سے کہا گیا کہ میاں غسل کرلو ،کپڑے بدلو ، مگر اس بھلے آدمی نے ایک نہ سنی ۔ بھوت سا بنا ہوا ہے ، پھر لطف یہ ہے کہ بادشاہ کی حضوری میں جانا بھی چاہتا ہے لیکن بادشاہ کو اس سے محبت ہے اور اس کو خبر بھی نہیں کہ بادشاہ کو اس سے محبت ہے ،اگر خبر ہوتی تو اس نجس حالت کے ساتھ بادشاہ کے حضوری میں جانے کا ارادہ نہ کرتا۔        صاحبو! آپ نے بادشاہوں کے مصاحبوں کو دیکھا ہوگا کہ کس کس طرح سے صفائی کا انتظام کرتے ہیں تاکہ ان کی کوئی بات بادشاہ کی مرضی کے خلاف نہ ہو۔ بادشاہ تو بادشاہ اگر کسی معمولی عورت سے محبت ہوجائے تو آئینہ رکھ کر کنگھی کی جاتی ہے ، ٹوپی درست کی جاتی ہے، ادھر شیروانی دیکھی جاتی ہے ، یہ کیوں ؟ یہ اس وجہ سے ہے کہ وہ شخص یہ پوچھنا چاہتا ہے کہ کہیں مجھ میں ایسی کوئی بات تو نہیں ہے کہ جو میری محبوبہ کی مرضی کے خلاف ہو۔        غرض ایسی حالت سے آنے والے کے لئے تو جیل تیار ہونا چاہئے تھا مگر چونکہ بادشاہ کو اس سے محبت ہے ، اس لئے بادشاہ نے یہ حکم دیا کہ اس کو حمام میں لے جاکر نہلادو،کیونکہ وہاں شاہی لوگ جمع ہیں، انہوں نے اس کو خوب مل مل کر نہلانا شروع کیا، ان حضرت نے نہانے میں بڑے نخرے کئے اور کہنا شروع کیا کہ ہائے میں مرا، ہائے میں جلا۔ مگر شاہی لوگ اس کو نہ سنے۔ اس لئے کہ وہ سمجھتے ہیں، یہ تو ہے نادان، اگر ہم نے ذرا کمی کی تو یہ میلا کچیلا رہ جائے گا اور دربار کے لائق نہ ہوگا،اس پر بھی اگر وہ شاہی لوگوں کی نہ سنے تو کسی کا کیا بگڑے گا؟ یہ شخص خود دربار سے محروم رہے گا۔        ایسا ہی انسان بڑا بدتمیز ہے ، بے داب ہے۔ گناہوں کی نجاست سے آلودہ ہے ، نہ تو بہ کا غسل کیا ، نہ نیک اعمال کے کپڑے بدلا، گناہوں کی بدبو آرہی ہے ، ہر چند کہنے والے کہہ رہے ہیں کہ بھائی توبہ کرو کچھ نیک کام کرو، مگر میاں یہاں سنتا کون ہے؟ لیکن خدائے تعالیٰ کو اس سے محبت ہے، اگر اس کو بھی خدا سے محبت ہوتی تو ہر وقت خود کو دیکھتا رہتا کہ کونسی بات مجھ میں خدا کی مرضی کے خلاف ہے ، اس حالت سے آنے والے کے لئے تو دوزخ کا حکم ہوتا تھا لیکن چونکہ خدائے تعالیٰ کو انسان سے بے حد محبت ہے ، اس لئے حکم دیا کہ اس کو تقویٰ کے حمام میں لیجاکر گناہوں سے پاک کرو، وہاں پیغمبر جو شاہی لوگوں کے مثل ہیں خوب مل مل کر نہلانے لگے یعنی جتنے خدا کے احکام ہیں وہ روح کے غسل ہیں ، اب یہ لگے نخرے کرنے کہ ہائے گرمیوں کے روزے، ہائے جاڑے کی نماز وغیرہ۔ انسان چلاتے ہی رہے مگر پیغمبر کب سنتے؟ گناہوں سے ، نجاست سے پاک ہونے کا انتظام فرمادئیے۔ اس پر بھی اگر کوئی پیغمبر کا کہنا نہ سنے ، ان کی اطاعت نہ کرے تو کسی کا اس میں کیا نقصان ہے وہ خود جنت سے محروم رہے گا اور جو سمجھ گیا وہ گناہوں سے توبہ کا غسل کرکے پاک ہوگیااور تقویٰ کا لباس پہن لیا، وہ خدائے تعالیٰ کے دربار کے لائق ہوااور جنت اس کا ٹھکانہ ہے۔        کسی وقت یا کسی شب یا کسی ماہ کے بابرکت ہونے کی وجہ یہ ہے کہ اللہ تعالیٰ اپنی تجلیات میں سے کوئی تجلی اس وقت یا اس شب یا اس ماہ پر کرتا ہے تو اس وقت گناہ بہت دھلتے ہیں جیسے مکان پر تجلی ہو ، جیسے کعبہ، اس پر خدا نے تجلی کی تو وہ متبرک ہوگیا، ایسا ہی زمانہ پر تجلی کی جیسے رمضان تو وہ متبرک ہے۔        صاحبو! ایک مثال سنو !ایک شخص صابون لگاکر نہایا اور دوسرا یوں ہی بغیر صابون کے نہایا تو ضرور صابون لگانے والا جلد اور بہت میل سے پاک ہوگا اور بے صابون والے کو پاک ہونے میں بہت دیر لگے گی۔        اسی طرح رمضان میں توبہ کرکے نیک اعمال کرنے والا جلد اور بہت سے گناہوں سے پاک ہوجاتا ہے ، اس کے برخلاف دوسرے دنوں میں توبہ اور نیک اعمال کیا تو ان دنوں میں ایسا جلد اور بہت سے گناہوں سے پاک نہیں ہوتا۔        اس لئے مسلمانو! رمضان کو غنیمت جانو ! جن کی آنکھیں کھلی ہوئی ہیں وہ رمضان مبارک کے برکات کو کھلی آنکھ سے دیکھتے ہیں ، جو غافل ہیں ان کو یہ مہینہ اور دوسرے مہینے دونوں یکساں ہیں۔        صاحبو! رمضان آیا اور اپنے برکات و انوار کی بارش برسایا اور رخصت ہورہا ہے، ہائے! غافلوں کو کچھ خبر بھی نہ ہوئی ، ان لوگوں کی ایسی مثال ہے جیسے کوئی شخص کسی مکان میں کمرہ اندر سے بند کر کے بیٹھا ہو ، اور باہر یہ حالت ہے کہ ابرآیا ، ٹھنڈی ہوائیں چلیں، اور بارش ہوئی ، لوگ خوش ہوئے ابر چلاگیا، اور آسمان صاف ہوگیا۔ یہ حضرت مکان کے اندر ہی رہے ان کو کچھ بھی خبر نہ ہوئی کہ باہر کیا سے کیا ہوگیا۔        شاہی خوشی ہوتی ہے تو ہر قیدی کوشش کرتا ہے کہ چھوٹ جائے اور رہائی ہو ، رمضان المبارک کا مہینہ ہے ، خدائے تعالیٰ کا عام فضل ہورہا ہے ، قیدی چھوٹ رہے ہیں ۔ مسلمانو! تم پر بھی تو تعزیرات آخرت کے بہت سے دفعہ لگ چکے ہیں ، تم بھی تو قیدی ہو ، تم کو بھی رہائی کی کوشش کرنی چاہئے ۔ اب تک کچھ نہ کئے ہو تو اب بھی جو کچھ ہے غنیمت جانو ۔ ان دو دنوں میں تو بھی کچھ کرلو ، دیکھو رمضان چلے اور آج جمعتہ الوداع ہے مگر یہ وقت بہت مشکل کا ہے ، چاروں طرف فتنے ہی فتنے ہیں۔        صاحبو! آپ کیا سمجھ رہے ہیں ؟ آپ کے اطراف گمراہیوں کا جال پھیلا ہوا ہے ، آپ کے اطراف شیطانوں کا ہجوم ہے ، شیاطین الجن علیٰحدہ ہجوم کئے ہوئے ہیں، شیاطین الانس علیٰحدہ گھیرے ہوئے ہیں ، کام کرنے والوں کو کام سے چھڑارہے ہیں ، سب سے بڑا جال حب دنیا کا پھیلا ہوا ہے ، اس کی طرف بلانے والے الگ بلارہے ہیں ، اسی واسطے مولاناؒ فرماتے ہیں ؂   صد ہزارانِ دام و دانہ است اے خدا ما چو مرغانِ حریص بے نوا   ترجمہ : اے خدا! دانہ پڑا ہوا ہے اور اس پر سینکڑوں جال بچھے ہوئے ہیں ، میں حریص پرندوں کی طرح ہوں ۔   می رہائی ہر دمے ما را و باز    سوئے دامے می رویم اے بے نیاز   ترجمہ : اگرچہ ہروقت دام سے چھٹکارا پارہا ہوں ، بچ رہا ہوں اے بے نیاز ، پھر بھی میں جال کی طرف چلا جارہا ہوں ۔        اے خدا! تو ہم کو نجات دیتا جاتا ہے مگر ہم اور پھنستے ہی جاتے ہیں، ہم بار بار گرتے ہیں اور آپ سنبھالتے جاتے ہیں ۔ ہماری مثال اس غلام کی سی ہے جس کے بہت سے مالک ہوں، ایک حکم دیتا ہے کہ پانی پلاؤ، دوسرا حکم دیتا ہے کہ لیٹ جاؤ ، اور تیسرا حکم دیتا ہے کہ نہیں بیٹھ جاؤ ، دس آقا ہیں اور دس احکام ہیں ۔        خدا کہتا ہے کہ نماز پڑھو ، یہ اٹھتا ہے ، ساتھ والے کہتے ہیں کہ بڑے نمازی آئے بیٹھ میاں۔        خدا کہتا ہے کہ روزہ رکھو ۔ ساتھ والے روکتے ہیں ۔        اب یہ اس کوشش میں ہے کہ اس سے سب خوش رہیں ۔ اس شخص کی مثال ایسی ہے :   حکایت :        ایک ہر دلعزیز صاحب تھے، ہر ایک کی دلجوئی کیا کرتے تھے، یہ ایک مرتبہ ایک ندی کے کنارہ پر پہنچے دیکھا کہ ایک شخص اس کنارہ پر بیٹھا ہوا ہے اور اس پار جانا چاہتا ہے اور ایک شخص دوسرے کنارے پر بیٹھا ہے وہ اس طرف آنا چاہتاہے ، یہ ہر دلعزیز صاحب اس قریب والے کو کندھے پر بٹھاکر چلے جب بیچ ندی میں پہنچے تو خیال آیا کہ اگر اس کو کنارہ پر پہنچاؤں تو دوسرا آزردہ ہوگا اور خیال کئے کہ دوسرے کو بھی یہاں تک لانا چاہئے ، یہ خیال آتے ہی کندھے والے شخص کو بیچ ندی میں پٹک دئیے اور دوسرے کو لانے کے لئے گئے ۔ جب بیچ میں اس دوسرے شخص کو لائے تو پہلا شخص ڈوبتا ہوا دکھائی دیا تو یہ اس دوسرے شخص کو پٹک کر اس کو سنبھالنے کے لئے چلے تو کیا دیکھتے ہیں کہ وہ ڈوب چکا ہے پھر اس دوسرے کی خبر لینے کے لئے آئے تو اس کا بھی خاتمہ ہوچکا تھا-      یاد رکھئے! یہی طرز ہم بھی اختیار کررہے ہیں، مگر اس کا بھی خیال رکھئے کہ خدا کو راضی کئے تو مخلوق بگڑتی ہے اور اگر مخلوق کو منائیں تو خدا ناراض ہوجاتا ہے ، اب آپ کو اختیار ہے جس کو چاہو بگاڑلو ، اور جس کو چاہو منالو۔      بعض امور خیر کے ہوتے ہیں ، شیطان بہکاتا ہے کہ جو کام بڑے بڑے کرنے کے ہیں وہ تو تم سے ہو نہیں سکتے اس کو کیا کرتے ہو۔ اسی طرح کہتا ہے کہ جو بڑے بڑے گناہ ہیں وہ تو چھوٹتے ہی نہیں ہیں ، اس کو چھوڑ کر کیا متقی بنوگے، یاد رکھو!یہ بھی شیطان کا دھوکہ ہے ، کسی نیک کام کو حقیر مت سمجھو بلکہ جب توفیق ہوجائے فوراً اس پر عمل کرلو، اسی طرح کسی برے کام کو کم نہ سمجھو ، اس سے بچتے رہو۔   حدیث :      حضرت رسول اللہ صلی اللہ علیہ والہ وسلم  فرمائے ہیں: اے عائشہ !کسی خیر کو حقیر نہ جانو ، خدا کے پاس اس کی جزا ہے ، اور نہ کسی شر کو حقیر جانو ، خدا کے پاس اس کی سزا مقرر ہے۔   (ماخوذ از:فضائل رمضان،ص111/113)

Mufti Maulana Syed Zia Uddin Naqshbandi Quadri

Shaik-ul-Fiqh - Jamia Nizamia

Mufti Maulana Syed Zia Uddin Naqshbandi Quadri

Shaik-ul-Fiqh - Jamia Nizamia

News

فضا‏ئل جمعہ اور جمعۃ الوداع

Mufti Maulana Syed Zia Uddin Naqshbandi Quadri

Shaik-ul-Fiqh - Jamia Nizamia

Mufti Maulana Syed Zia Uddin Naqshbandi Quadri

Shaik-ul-Fiqh - Jamia Nizamia

News

&#1601;&#1590;&#1575;&#8207;&#1574;&#1604; &#1580;&#1605;&#1593;&#1729; &#1575;&#1608;&#1585; &#1580;&#1605;&#1593;&#1731; &#1575;&#1604;&#1608;&#1583;&#1575;&#1593;

فضا‏ئل جمعہ اور جمعۃ الوداع