بیعت اہمیت و ضرورت

عرب میں دستور تھا کہ جب کوئی شخص کسی چیز کو کسی کے ہاتھ بیچتا ہے تو پہلے اس چیز کی قیمت مقرر کی جاتی ، اس کے بعد بیچنے والا کہتا ہے کہ میں نے اس قیمت پر اس چیز کو بیچا اور خریدنے والا کہتا ہے کہ میں نے اسے خرید لیا ، اس کے بعد ایک دوسرے کے ہاتھ پرہاتھ رکھتا ہے۔یہ علامت اس بات کی تھی کہ طرفین سے معاہدہ ہوا اور یہ معاہدہ اور وعدہ مکمل ہوگیا اور طرفین سے کوئی وعدہ خلافی نہ کرے گا، نہ بائع (بیچنے والا) چیز دینے سے انکار کرے گا اور نہ مشتری (خریدنے والا) قیمت ادا کرنے سے ، یہ عام دستور تھا کہ جس وعدہ کو مستحکم کرنا منظور ہوتا تو ہاتھ میں ہاتھ ملاکر وہ وعدہ کیا کرتے تھے ، جیسا کہ اس حدیث شریف سے ظاہر ہے عدۃ المومن کأخذ الکف       یعنی مسلمان کا وعدہ ہاتھ میں ہاتھ ملانے سے کم نہیں۔ اس لئے بیع میں بھی یہی طریقہ اختیار کیا گیا کہ طرفین سے جو وعدہ خرید و فروخت ہوا ہے وہ ضرور پورا کیا جائے گا، اسی ہاتھ میں ہاتھ ملانے کا نام ’’بیعت ‘‘ہے ۔ چنانچہ لسان العرب میں لکھا ہے:    البیعۃ الصفقۃ علی ایجاب البیع     اور صفقہ کے معنی  منتہی الارب میں لکھا ہے :یک باردست زدن دربیع  غرض کہ لفظ بیعت عرب میں بیع و شری (خرید وفروخت)کے موقع میں مستعمل تھا،اسی بنا پر حق تعالیٰ نے بیعت اسلامی میں بھی یہی طریقہ اختیار فرمایا۔ اس آیت شریفہ سے صرف اسی قدر معلوم ہوا کہ مسلمان بیعت کیا کرتے تھے، یعنی کسی چیز کو بیچتے اور ہاتھ میں ہاتھ ملاکر اس کو موکد کرتے تھے، مگر یہ نہیں معلوم ہوا کہ بائع کون ہے اور مشتری کون اور کس چیز کو بیچے تھے، سو اس کا ذکر دوسری آیت میں ہے جو ارشاد ہے    إِنَّ اللَّهَ اشْتَرَى مِنَ الْمُؤْمِنِينَ أَنْفُسَهُمْ وَأَمْوَالَهُمْ بِأَنَّ لَهُمُ الْجَنَّةَ     (سورۃ التوبۃ:111) یعنی خدا نے مسلمانوں کی جان و مال کو جنت کے بدلے خریدلیا۔انتہی      اس سے ظاہر ہے کہ مسلمان بائع ہیں اور خدائے تعالیٰ مشتری اور ان کی جان و مال مبیع(بیچے جانی والی چیز) اور جنت قیمت ہے۔ اس کی تفصیل یہ ہے کہ جب نبی کریم صلی اللہ علیہ و سلم نے تمام احکامِ الٰہی مسلمانوں کو پہونچادیئے اور یہ بھی معلوم کرادیا گیا کہ اگر تم یہ سب کام کرو گے تو خدائے تعالیٰ تمہیں جنت دے گا تو مسلمانوں نے بصدق دل اس کو قبول کرلیا، جس کا مطلب یہ ہوا کہ ہماری ذاتوں میں اور مالوں میں جو تصرف خدائے تعالیٰ نے کیا ہے کہ فلاں کام اپنے اعضاء سے کرو اور فلاں مت کرو،اور مال فلاں اُمور میں خرچ کرو اور فلاں میں مت خرچ کرو سب ہمیں قبول ہے، ہم یہ نہ کہیں گے کہ ہمارے مال میں یہ تصرف کیوں کیا جاتا ہے کہ اس میں سے ایک حصہ خدا کی راہ میں دیں یا اسراف نہ کریں۔ اور ہمارے نفوس میں یہ تصرف کیوں کیا جاتا ہے کہ اپنی خواہشوں کو روکیں اور مثلاً حسد و بغض وغیرہ سے احتراز کریں۔ غرضکہ حق تعالیٰ نے جتنے خواہشات و صفات آدمی میں پیدا کئے سب میں اپنا تصرف جاری فرمایا، مثلاً فلاں قسم کی بات کرو فلاں قسم کی بات نہ کرو۔ اسی طرح دیکھنے سننے کھانے پینے وغیرہ اُمور طبعیہ میں ایک ایک حد مقرر کردی اور حکم دیا کہ انہی اُمور میں ان کو استعمال کریں جن کی اجازت ہے۔ اسی طرح کل خواہشوں سے متعلق احکام شرعیہ مقرر کئے اور نیز جتنے صفات پیدا کئے مثلاً سخاوت ، شجاعت ، دوستی ، دشمنی وغیرہ سب میں ایک ایک حد مقرر کردی،مثلاً دوستی رکھو تو خدا کے واسطے اور دشمنی رکھو تو خدا کے واسطے۔ علی ہذا القیاس کل اُمور طبعیہ کا حال یہی ہے کہ مطلق العنانی کے ساتھ مسلمان کوئی کام نہیں کرسکتا۔ ہر کام میں جو طریقہ بتایا گیا اسی طریقہ پر وہ کام کرنا چاہئے، جس کا مطلب یہ ہوا کہ اب نہ ان کے نفوس ان کے ہیں نہ ان کے اموال بلکہ وہ سب ان کے پاس امانت ہیں، جس طرح امانتی چیزوں کو آدمی خود مختاری سے اپنی خواہشوں میں استعمال نہیں کرسکتا بلکہ انہی کاموں میں استعمال کرسکتا ہے جن کی اجازت مالک نے دی ہو اسی طرح مسلمان ہاتھوں سے مثلاً کام لیں تو وہی جن کی اجازت  ہے، پاؤں سے کام لے کر کہیں جائیں تو وہیں جہاں جانے کی اجازت ہے، آنکھوں سے کام لینا چاہیں تو وہی چیزیں دیکھیں جن کے دیکھنے کی اجازت ہے، کانوں سے سننا چاہیں تو وہی باتیں سنیں جن کے سننے کی اجازت ہے، خیال سے کام لینا چاہیں تو وہی خیال کریں جو منع نہیں، جان دینا چاہیں تو اسی موقع میں جہاں جان دینے کی اجازت ہے۔      الحاصل ان احکامات کے مقرر کرنے سے ثابت ہوگیا کہ جان و مال سب خدا کی ملک ہیں، ہمارے اختیارمیں صرف بطور امانت دیئے گئے ہیں، نہ جان پر ہمارا خود مختارانہ تصرف رہا نہ اعضاء پر نہ مال پر۔       جب ان باتوں کو مسلمانوں نے قبول کرلیا تو گویا یہ کہہ دیا کہ ہم نے اپنی جان و مال جنت کے معاوضہ میں خدا کے ہاتھ بیچ دیا ہے۔ اس کے جواب میں خدائے تعالیٰ فرماتا ہے:    إِنَّ اللَّهَ اشْتَرَى مِنَ الْمُؤْمِنِينَ أَنْفُسَهُمْ وَأَمْوَالَهُمْ بِأَنَّ لَهُمُ الْجَنَّةَ     (سورۃ التوبۃ:111) یعنی  تم نے اگر جان و مال کو بیچ دیا تو ہم نے بھی بمعاوضہ جنت خرید لیا۔ اس سے ظاہر ہے کہ مسلمان بائع (بیچنے والا)ہیں اور خدائے تعالیٰ مشتری (خریدنے والا) اور جان و مال مبیع ہیں اور جنت ان کی قیمت ۔      جب یہ قرار طرفین سے ہوچکا تو حسب عادت صفقہ اور بیعت یعنی ہاتھ میں ہاتھ ملانے کی ضرورت ہوئی تاکہ بیع و شراء پوری اور حتمی وعدہ ہوجائے۔       اب مسلمان تو صفقہ کے لئے ہاتھ بڑھا سکتے ہیں مگر خدائے تعالیٰ کی شان نہیں کہ اپنا ہاتھ ان کے ہاتھ پر رکھے، اس لئے ارشاد ہوا کہ نبی صلی اللہ علیہ والہ وصحبہ وسلم! کے ہاتھ کو ہمارا ہاتھ سمجھ لو۔ اور ان کی بیعت کو ہماری بیعت۔ چنانچہ ارشاد ہے :    إِنَّ الَّذِينَ يُبَايِعُونَكَ إِنَّمَا يُبَايِعُونَ اللَّهَ - یعنی اے نبی ا جو لوگ ظاہراً  آپ کے ہاتھ میں ہاتھ ملاتے ہیں وہ آپ کا ہاتھ نہیں ہمارا ہاتھ ہے۔ يَدُ اللَّهِ فَوْقَ أَيْدِيهِمْ  (سورۃ  الفتح:10) کیونکہ پیشتر ہی سے مبیع اور اس کی قیمت کا تصفیہ ہوچکا ہے۔ اب اگر کوئی اس بیعت کو توڑ دے اور اپنی جان و مال میں اپنی ذاتی خواہش اور خود مختارانہ تصرف کرنے لگے اور یہ بھول جائے کہ وہ بطور امانت ہمارے پاس ہیں تو اس کا نقصان اسی کو ہوگا کہ ہم بھی قیمت یعنی جنت نہ دیں گے۔    کما قال، فَمَنْ نَكَثَ فَإِنَّمَا يَنْكُثُ عَلَى نَفْسِهِ –   اور جو شخص اس وعدہ کو جو ہاتھ میں ہاتھ دے کر کیا تھا جس سے تکمیل بیع ہوچکی تھی پورا کرے تو ہم اس کو اجر عظیم دیں گے:    کما قال الله تعالیٰ،  وَمَنْ أَوْفَى بِمَا عَاهَدَ عَلَيْهُ اللَّهَ فَسَيُؤْتِيهِ أَجْرًا عَظِيمًا(سورۃ الفتح:10)     آیت موصوفہ سے معلوم ہوا کہ آنحضرت صلی اللہ علیہ والہ وصحبہ وسلم  خدائے تعالی کی طرف سے بیعت کرنے والوں کے ہاتھ میں ہاتھ ملاتے تھے اور آپ کا ہاتھ خدائے تعالیٰ کا ہاتھ سمجھا جاتا تھا اور یہ مقصود تھا کہ خدائے تعالیٰ وعدہ کرتا ہے کہ تم نے اپنے جان و مال کو خدا کے ہاتھ بیچ دیا تو خدائے تعالیٰ بھی ان کی قیمت ادا کرے گا یعنی جنت دے گا۔ ظاہراً اس سے یہ معلوم ہوتا ہے کہ آنحضرت  صلی اللہ علیہ والہ وصحبہ وسلم کے ساتھ بیعت خاص ہوگی کیونکہ     يُبَايِعُونَكَ      کا خطاب خاص حضرت سے ہے اور یہ تشریف کہ آپ  کا ہاتھ خدائے تعالیٰ کا ہاتھ ہے حضرت ہی کے لئے زیبا ہے مگر جب خلفائے راشدین نے بھی بیعت لی اور اس سے بھی یہی مقصود تھا کہ اہل اسلام معاہدہ پر قائم رہیں، اور خدائے تعالیٰ کی طرف سے خلفائے کرام وعدہ کرکے اس بیع و شراء کو مستحکم کریں تو اس سے معلوم ہوا کہيَدُ اللَّهِ فَوْقَ أَيْدِيهِمْ  بھی وہاں صادق ہے اس لئے کہ یہ بیع و شراء کوئی نئی نہیں، بیع وہی جان و مال ہیں اور قیمت وہی جنت کیونکہ ان حضرات کا مقصود اس بیعت سے یہی تھا کہ مسلمان خدا اور رسول کی اطاعت کریں۔ پھر جب دنیادار بادشاہ بھی بیعت لینے لگے اور اس سے ان کا مقصود اسی قدر تھا کہ ہم کو مستقل بادشاہ مانو اور ہماری اطاعت کرو خواہ موافق شریعت حکم دیں یا مخالف، ورنہ ہم تمہیں قتل کرڈالیں گے تو یہ بیعت وہ نہ رہی جس میں جان و مال کے معاوضہ میں جنت تھی۔ اس وجہ سے یہاںيَدُ اللَّهِ فَوْقَ أَيْدِيهِمْ صادق نہیں آسکتا چونکہ وہ بیعت جو سنت نبوی تھی اس زمانہ میں فوت ہونے لگی تو بزرگان دین نے اس بیعت کا طریقہ جاری کردیا اور اپنے مریدوں کو تلقین کی کہ اپنی جان و مال خدا کے ہاتھ بیچ دو، یعنی احکام الہٰی کی تعمیل کرو تو تمہیں خدائے تعالیٰ جنت دے گا، جب انہوں نے قبول کرکے بیعت کی یعنی ہاتھ میں ہاتھ ملایا اور ان حضرات نے بھی خدا کی طرف سے ہاتھ میں ہاتھ ملایا تو وہ اصلی بیعت پوری ہوگئی۔  اب اگر کوئی بیعت کے وقت ان اُمور کا لحاظ نہ رکھے اور وہ غرض جس کے لئے بیعت موضوع تھی فوت ہوجائے تو وہ بیعت بھی مثل بیعت سلاطین ہوجائے گی جس کو دین سے کوئی تعلق نہیں  اس سے ظاہر ہے کہ اگر کوئی پیر جی اپنے مریدوں کو احکام شرع شریف ادا کرنے سے روکیں یا توجہ نہ دلائیں اور یہ تلقین کریں کہ نماز، روزہ، حج و زکوٰۃ جو قرآن و حدیث و فقہ میں مذکور ہیں کوئی چیز نہیں بلکہ ان کا مطلب ہی کچھ اور ہے اور ظاہر شریعت بیکار چیز ہے تو اس بیعت کو ہمارے نبی کریم سیدنا محمد رسول اللہ  صلی اللہ علیہ والہ وصحبہ وسلم کے دین سے کوئی علاقہ نہیں، اس لئے مسلمانوں کو مشائخین کے ہاتھ پر بیعت کرنے کے وقت یہ خیال کرنا ضرور ہے کہ ہم نے اپنی جان و مال کو خدائے تعالیٰ کے ہاتھ بیچ دیا ہے اور پیر صاحب بھی یہی تعلیم و تلقین کریں کہ اب تمہیں ضرور ہے کہ ہر کام میں اپنی خواہشوں کو چھوڑ کر خدا اور رسول کی مرضی کے مطابق کام کیا کرو۔ ’’روض الریاحین‘‘ میں امام یافعی رحمۃ اللہ تعالی علیہ  نے لکھا ہے کہ عبدالواحد بن زید رحمۃ اللہ تعالی علیہ  کہتے ہیں کہ ہم ایک روز اپنی مجلس میں بیٹھے ہوئے تیاری جہاد میں مشغول تھے، ایک شخص نے یہ آیت پڑھی   إِنَّ اللَّهَ اشْتَرَى مِنَ الْمُؤْمِنِينَ أَنْفُسَهُمْ وَأَمْوَالَهُمْ بِأَنَّ لَهُمُ الْجَنَّةَ(سورۃ التوبۃ:111)      ایک جوان لڑکا جس کی عمر15 سال کی ہوگی اُٹھا اور کہا کہ اے عبدالواحد !کیا اللہ تعالیٰ نے ہماری جان و مال کو جنت کے عوض میں خرید لیا؟ میں نے کہا: ہاں،کہا: میں آپ کو گواہ رکھتا ہوں کہ میں نے اپنی جان و مال کو جنت کے بدلہ میں اللہ تعالیٰ کے ہاتھ بیچ دیا۔ میں نے کہا :تلوار کی دھار بہت سخت ہوتی ہے اور تم لڑکے ہو شاید صبر نہ کرسکو گے، کہا: کیا اب میں اس بیع کو چھوڑ سکتا ہوں؟ یہ ہرگز نہ ہوگا۔ غرض اس لڑکے نے تمام مال جو اس کی میراث میں ملا تھا خیرات کرکے آمادۂ سفر ہوگیا۔ جس روز ہم لوگ جہاد کے لئے نکلے وہ بھی گھوڑے پر سوار اور مسلح ہوکر ہمارے ساتھ ہو لیا، راستہ میں اس کی یہ حالت تھی کہ دن کو روزہ رکھتا اور رات کو نماز پڑھتا اور ہماری حفاظت بھی کرتا، جب ہم دارالروم میں پہونچے اور دشمن کا لشکر نمودار ہوا ، اس لڑکے نے لشکر کفار پر حملہ کرکے نو(9) آدمیوں کو قتل کیا اور خود بھی شہید ہوگیا، حالتِ نزع میں جب ہم اس کے نزدیک پہونچے تو دیکھا کہ مارے خوشی کے اس کی ہنسی تھم نہیں سکتی تھی، چنانچہ اسی حالت میں اس کا انتقال ہوگیا   إِنَّا لِلَّهِ وَإِنَّا إِلَيْهِ رَاجِعُونَ(سورۃ البقرۃ:156)     سچی بیعت یہ تھی جس طرح صحابہ اپنی جان و مال سے اپنا تصرف اٹھا لیتے تھے ان بزرگوار نے بھی ایسا ہی کیا ،بیعت یعنی بک جانا اور اس کے لوازم پورے کرنا ایک سخت کام ہے اور اگر لوازم پورے نہ کئے جائیں یعنی اپنی خواہشوں کے مطابق کام کرنے لگیں تو بیعت ٹوٹ جائے گی ،اولیاء اللہ کو درجہ ولایت و تقرب الہٰی اس وجہ سے حاصل ہوا اور ہوتا ہے کہ بیعت کو انہوں نے پوری کی اور کرتے رہتے ہیں۔  الحاصل خالد رضی اللہ عنہ نے جب دیکھا کہ پیر کامل یعنی خلیفہ و جانشین رسول اللہ صلی اللہ علیہ والہ وصحبہ وسلم کے ہاتھ جب بیعت کی وہ خدا کے ہاتھ پر بیعت ہوچکی، اس کے بعد اگر حمیت اور غیرت شجاعت وغیرہ سے اپنے نفسانی خواہش کے مطابق کام لیا جائے تو وہ بیعت ٹوٹ جاتی ہے اور جب بیعت ٹوٹ گئی تو قیمت یعنی جنت کا استحقاق باقی نہیں رہتا اور عمر بھر کی جانفشانیاں اکارت ہوتی ہیں۔ اس لئے اس ذلت پر صبر کرنا ان پر آسان ہوگیا ورنہ ممکن نہیں کہ فاتحِ عراق و شام ہزاروں ہم چشموں کے مجمع میں کھڑے رہ کر اظہار دیں اور ایک ضعیف آدمی ان کے گلے میں رسی ڈالکر کھینچے اور ٹوپی سر سے اتارلے اور وہ دم نہ ماریں۔ یہ صرف اسلام کی برکات ہیں جو نفسانی خواہشوں کو پامال کرکے مہذب بنادیتا ہے۔ یہاں ایک بات اور معلوم ہوئی کہ حق تعالیٰ نے جو صحابہ رضي اللہ تعالی عنہم کے حالات کی خبر دی ہے    وَالَّذِينَ مَعَهُ أَشِدَّاءُ عَلَى الْكُفَّارِ رُحَمَاءُ بَيْنَهُمْ (سورۃ الفتح:29)    یعنی صحابہ کافروں پر سخت ہیں اور آپس میں رحم دل۔ اس سے اس کیفیت کا مشاہدہ بھی ہوگیا۔  حضرت عمر رضی اللہ عنہ نے جو اسراف کی سزا دی وہ بھی بجا تھی کیونکہ ان کو یہ کہنے کی مجال ہی نہ تھی کہ ہم اپنے مال کے مختار ہیں اس لئے کہ وہ جانتے تھے کہ وہ اب اپنا مال رہا ہی نہیں وہ تو جنت کے معاوضہ میں بک گیا، جس کو خدا کی جانب سے خلیفۂ برحق نے مول لیا اسی وجہ سے انہوں نے قبول بھی کرلیا۔ اس سے ظاہر ہے کہ پیرِ کامل کو اپنے مرید کے مال میں تصرف کرنے کا حق ہے جیسا کہ بعضے اولیاء اللہ سے مروی ہے مگر یہ نہیں کہ خود غرضی سے تصرف کرے، اسی وجہ سے حضرت عمر رضي اللہ تعالی عنہ  نے ان کا مال بیت المال میں داخل کردیا، جس سے حضرت عمر رضي اللہ تعالی عنہ کو کوئی ذاتی فائدہ مقصود نہ تھا۔ حضرت خالد بن ولید رضي اللہ تعالی عنہ  نے جو اس ذلت کی حالت میں کہا کہ حضرت عمر رضي اللہ تعالی عنہ کے ہوتے فتنہ کا کیا احتمال ہے، اس سے عقلاً اندازہ کرسکتے ہیں کہ حضرت عمر رضي اللہ عنہ کا انتظام پوری سلطنت میں کس قدر ہوگا، کیونکہ یہ اس وقت کہہ رہے ہیں کہ فتنہ پیدا ہونے کا ظن غالب ہوگیا تھا کیونکہ ایسے شخص کو ذلیل کرنا جس کو موافق و مخالف نے بڑی بڑی سلطنت کا فاتح تسلیم کرلیا تھا اور اس مقام میں کہہ رہے ہیں جو مدینہ منورہ سے صدہا کوس پر واقع ہے۔  یہاں یہ امر غور طلب ہے کہ حضرت خالد رضي اللہ تعالی عنہ کو کیونکر معلوم ہوا کہ حضرت عمرؓ کی خلافت میں فتنہ کا احتمال نہیں، حالانکہ ناسخ التواریخ سے معلوم ہوتا ہے کہ حضرت عمر رضي اللہ تعالی عنہ  کو لوگ فظا غلیظ القلب کہتے تھے اور وہ عام ناراضی کا سبب ہوتا ہے ،جس کا ثبوت خود قرآن شریف سے ملتا ہے کہ حق تعالیٰ نے نبی صلی اللہ علیہ والہ وصحبہ وسلم  کی شان میں فرمایا   وَلَوْ كُنْتَ فَظًّا غَلِيظَ الْقَلْبِ لَانْفَضُّوا مِنْ حَوْلِكَ (سورۃ آل عمران:159)      یعنی اگر آپ سخت گو اور سخت دل ہوتے تو لوگ آپ کے پاس سے بھاگ جاتے۔ پھر آپ کے کام بھی ایسے ہوتے تھے جو دل شکنی کے اسباب ہیں، چنانچہ واقعات مذکورہ سے ظاہر ہے پھر حضرت خالد رضي اللہ تعالی عنہ  نے جو کہا اسی کے موافق ظہور میں بھی آیا، اس لئے کہ آپ کے پورے زمانہ خلافت میں کوئی فتنہ پیدا نہیں ہوا، حالانکہ آپ کے زمانہ میں کُل وہ بہادران اسلام موجود تھے جنہوں نے عرب ، عراق، شام ، مصر وغیرہ کو فتح کیا اور بعد کی خلافتوں میں ان میں کے اکثر حضرات معرکوں میں شہید ہوگئے اور بعضے انتقال کرگئے،باوجود اس کے ان خلافتوں میں بہت سے فتنے پیدا ہوئے، ان تمام اُمور پر نظر ڈالنے سے معلوم ہوتا ہے کہ حضرت خالد رضي اللہ تعالی عنہ نے یہ خیال کیا کہ اپنا دل جس میں خوف و ہراس کا گزر ہی نہیں، حضرت عمر رضي اللہ تعالی عنہ  کے نام سے گھبراتا ہے اور ہیبت و رعب اس قدر طاری ہوتا ہے کہ بات کرنی مشکل ہوجاتی ہے تو اس سے وہ سمجھ گئے کہ اس میں حضرت عمر رضي اللہ تعالی عنہ کے فعل کو کوئی دخل نہیں یہ صرف ہیبت حق ہے۔ ہیبت حق است ایں از خلق نیست ہیبت ایں مرد صاحب دلق نیست اس پر انہوں نے قیاس کیا کہ آپ کی خلافت میں ممکن نہیں کہ کوئی فتنہ پرداز سر اٹھا سکے، یہ بات تو قرآن شریف سے بھی ثابت ہے جو حق تعالیٰ فرماتا ہے:    وَمَا رَمَيْتَ إِذْ رَمَيْتَ وَلَكِنَّ اللَّهَ رَمَى (سورۃ الانفال:17)      یعنی جب اے نبی !آپ نے بدرکی لڑائی میں ایک مٹھی کنکریاں کفار پر پھینک ماریں وہ آپ نے نہیں پھینکا ، اللہ نے پھینکا۔ یقینا ہر چند کنکریوں کو پھینکنا آنحضرت صلی اللہ علیہ والہ وصحبہ وسلم  کا فعل تھا مگر حق تعالیٰ وہ فعل اپنی طرف منسوب فرماتا ہے اور اس کی تصدیق بھی اس طرح ہوگئی کہ ایک مٹھی کنکریاں تمام لشکر کفار کی آنکھوں میں لگیں، اس سے صاف ظاہر ہے کہ آنحضرت  صلی اللہ علیہ والہ وصحبہ وسلم  کا فعل برائے نام تھا ، دراصل وہ فعل الہٰی تھا۔ اسی طرح حضرت عمر رضي اللہ عنہ کے افعال ہی سمجھے جاتے تھے،کیونکہ باوجود اس تذلیل و توہین کے شجاعان عرب میں سے کسی نے آنکھ اُٹھا کر نہیں دیکھا، کیا وہ تاثیر بندوں کے فعل میں ہوسکتی ہے؟ یہ اللہ کے ہی فعل کی شان ہے کہ سب کو مقہور اور مسخر بنادے کیوں نہ ہو حضرت عمر رضي اللہ تعالی عنہ  نبی کریم  صلی اللہ علیہ والہ وصحبہ وسلم کے خلیفہ جانشین اور ظل اللہ تھے۔ اسی وجہ سے ان کو اس قسم کے حکم کرنے میں تامل نہیں ہوتا تھا۔      (اقتباس از:مقاصد الاسلام حصۂ دہم ص:50/61 ، مؤلفہ حضرت شیخ الاسلام بانی جامعہ نظامیہ رحمۃ اللہ تعالی علیہ ،مطبوعہ مجلس اشاعت العلوم جامعہ نظامیہ حیدرآباد)۔ <a href="../../../../">www.ziaislamic.com</a>

Mufti Maulana Syed Zia Uddin Naqshbandi Quadri

Shaik-ul-Fiqh - Jamia Nizamia

Mufti Maulana Syed Zia Uddin Naqshbandi Quadri

Shaik-ul-Fiqh - Jamia Nizamia

News

بیعت اہمیت و ضرورت

Mufti Maulana Syed Zia Uddin Naqshbandi Quadri

Shaik-ul-Fiqh - Jamia Nizamia

Mufti Maulana Syed Zia Uddin Naqshbandi Quadri

Shaik-ul-Fiqh - Jamia Nizamia

News

&#1576;&#1740;&#1593;&#1578; &#1575;&#1729;&#1605;&#1740;&#1578; &#1608; &#1590;&#1585;&#1608;&#1585;&#1578;

بیعت اہمیت و ضرورت