نور مصطفی صلی اللہ علیہ والہ وسلم'تخلیق سے حضرت عبد اللہ میں جلوہ گری تک

نور مصطفی صلی اللہ علیہ والہ وسلم'تخلیق سے حضرت عبد اللہ میں جلوہ گری تک فصل: تمام کائنات کی تخلیق سے پہلے نور محمدی صلی اللہ علیہ وسلم پیداہونے کے بیا ن میں   وَهُوَ الَّذِي أَنْشَأَكُمْ مِنْ نَفْسٍ وَاحِدَةٍ فَمُسْتَقَرٌّ وَمُسْتَوْدَعٌ-           اس سے پہلے اس آیت کے جو معنی بیان ہوئے اس سے صاف اور صریح معنی جو بے دقت جمتے ہوں اور بے تاویل بنتے ہوں وہ اور ہی ہیں ، اگر سچ پوچھئے تواس آیت کے اصلی معنیٰ وہی ہیں،  وہ یہ ہیں کہ : وہ قدرت والا  خدا جس نے تمام عالم کو ، خاص کر انسان کو ایک نور محمدی صلی اللہ علیہ وسلم  سے بنایا۔(سورۂ انعام:98)           اسی لئے حضور اکرم صلی اللہ علیہ وسلم ارشاد فرماتے ہیں ’’ اول ماخلق الله نوری‘‘ (سب سے پہلے جو چیزاللہ تعالیٰ نے بنائی وہ میرا نور ہے)          جب اللہ تعالی نے نور محمدی صلی اللہ علیہ وسلم کوپیدا کیا تواس وقت سوائے اللہ تعالی کے کچھ نہ تھا ، نہ عرش تھا نہ فرش، نہ آسمان نہ زمین ۔ سب سے پہلے اللہ تعالی نے حضرت صلی اللہ علیہ وسلم کے نور مبارک کو پیدا کیا ، پھر اس نور مبارک سے پوچھا کہ تم کون ہو ؟ نور مبارک نے کہا: الہیٰ ! میں بندہ ہوں اور آپ ’’وهاب‘‘ ہیں ۔           اللہ تعالی نے فرمایا بندہ کی تعریف کیا ہے اور" وهاب" کی تعریف کیا  ہے ؟ نورمبارک نے کہا : "بندہ" وہ مملوک ہے جس پر اپنے مولی کی اطاعت واجب ہے ،وہ میں ہوں اور" وهاب " وہ ہے جو اپنے بندہ کو جو چاہے عنایت کرے وہ آپ ہیں ۔  اللہ تعالی نے فرمایا:جو کچھ تم چاہو مانگو! نورمبارک نے عرض کیا: میرا یہ مطالبہ ہے کہ آپ مجھ کویہ بتلائیے کہ میں آپ کو کس نام سے یاد کروں اور کس طرح آپ کی عبادت کروں ؟ خدئےتعالی نے جس طرح چاہا بلاواسطہ اس نور کو تعلیم فرمایا، اسلئے فرماتاہے ’’ وعلمک مالم تکن تعلم ‘‘ (سورۂ نساء، پ۵ رکوع ۱۷) اللہ نے آپ کووہ وہ سکھایا جو آپ نہیں جانتے تھے۔          اس خلوت میں جس قدر عرصہ تک خدا کو منظور تھا نور محمد ی صلی اللہ علیہ وسلم رہا،ایک زمانہ دراز کے بعد پھر وہ نور عرض کیا : الہی!عبادت کی کیفیت بتائیے ،اورایک مکان میرے واسطے بنائیے تاکہ میں اس مکان میں آپ کا نام لیتا رہوں ،اورآپ کی عبادت کرتا رہوں ۔             خدائے تعالی نے ایک آئینہ خانہ بنایااور’’مصباح العزۃ‘‘ اس کانام رکھا ۔             نور محمد ی صلی اللہ علیہ وسلم  اس میں رہنے لگا ، اس کے بعد اس آئینہ خانہ کے اوپر عرش کو پیدا کیا ، اور اس آئینہ خانہ کومثل قندیل کے عرش پر لٹکا دیا۔                     عرش بننے سے پہلے ہی نور مبارک اس قندیل میں داخل ہوچکا تھا اور حضور کا نورمبارک اس آئینہ خانہ میں رہنے لگا ۔ دوہزار(2000) برس تک "اللہ اللہ" کہتا رہا، پھر دوہزار(2000) برس تک "رحمن رحمن" اور اسی قدرمدت تک" رحیم  رحیم" کہتا رہا ۔ اللہ تعالی کے نام جو ہزارسے زائد ہیں ، ہرنام کودو دو ہزار برس ذکر کرتا رہا۔             اس اثناء میں جب اسم " قَھَّار "  پر پہونچا اوراس میں فکرکیا تو کہنے لگا کہ اس اسم کے معنی تمام اشیاء کی ہلاکت کو چاہتے ہیں ، نورمبارک پراس اسم "قَھَّار" کی ایسی ہیبت طاری ہوئی کہ پسینہ پسینہ ہوگیا۔ قطراتِ نور ٹپکنے لگے ، ان قطروں سے اللہ تعالی نے پیغمبروں کے ارواح پیداکیا ۔ ہر ایک پیغمبر کی روح کو ایک قندیل میں رکھ کر تمام پیغمبروں کے قندیلوں کو نور محمدی صلی اللہ علیہ وسلم کے اطراف لٹکادیا۔    یہ سب پیغمبروں کے ارواح حضرت کے نور سے تسبیح وتہلیل سن کر شاگردوں کی طرح تسبیح کرنے لگے۔             جب نور مبارک اسم "عدل" پر پہنچا اس کے معنی پر غور کیا تو کہا کہ یہ اسم فضل عظیم اور کثرت نعمت کو چاہتاہے، اس وقت نورمبارک پر شرم غالب ہوئی، پسینہ کے قطرات ٹپکنے لگے ، ان قطروں سے خدائے تعالی نے مسلمانوں کے ارواح کو پیداکیا۔             مسلمانو!تم کس پاک روح کے قطرات ہو؟ گناہوں سے پاک ہی رہو ! مسلمانو! تمہارا اصل مادّہ حضرت کے ہی نور مبارک سے ہے، کچھ غیر نہیں ، تم ڈالیاں ہوحضرت صلی اللہ علیہ وسلم  پیڑہیں ، وہ تم سے ہیں اور تم ان سے ہو، اگر ڈالیاں پیڑ کا خلاف کریں تو پیڑ کا کیا بگڑتا ہے؟ خود سوکھ جائیں گے ، ایسا ہی حضرت کا خلاف کرکے تم خود پچھتاؤگے، حضرت کیا نقصان ہے؟۔             پیڑ کا یہ خاصہ ہے کہ جہاں تک ہوسکے ڈالیوں کونفع پہنچاتے رہتا ہے ، خود کیڑے کا صدمہ سہتی ہے ، مگر ڈالیوں کو بچاتے رہتی ہے، اس لئے حدیث شریف میں ہے، حضرت صلی اللہ علیہ وسلم فرماتے ہیں کہ میری اورتم لوگوں کی مثال ایسی ہے کہ کسی شخص نے چراغ جلایا، روشنی پھیلنے لگی ، پروانے آکر گرنے لگے ، وہ شخص ان پروانوں کو کھینچتا ہے ، مگر وہ پروانے چراغ پر گرتے ہی جاتے ہیں۔             ایسا ہی دوزخ کی آگ میں تم گرتے ہی جاتے ہو، اور میں تمہاری کمریں پکڑ پکڑ کر آگ سے نکالتاہوں ، اور تم گرنے ہی کی فکر کرتے ہو۔             صاحبو! اگر حضورصلی اللہ علیہ وسلم کی اطاعت کروگے تو خدائے تعالی سے امید ہے کہ جس طرح ہم پیدائش سے پہلے قندیل میں حضرت کے ساتھ تھے اسی طرح مرنے کے بعد بھی آپ کے ساتھ رہیں گے۔           اس مذکورہ مضمون سے پہلے نور محمدی صلی اللہ علیہ وسلم  کا جو سلسلہ آرہا تھا اب وہ سلسلہ پھر شروع ہورہا ہے:             بیان ہورہا تھا کہ سب سے پہلے نورمحمدی صلی اللہ علیہ وسلم پیدا ہوا، اگر کسی کو یہ شبہ ہوکہ آپ تو سب سے آخر پیدا ہوئے ، آپ سے سب چیزیں کیسی بنیں؟ اس کو سمجھنے کے لئے ایک مثال پر غور کیجئے، جس سے معلوم ہوگا کہ سب چیزیں آپ ہی سے بنیں گوکہ آپ سب سے آخر میں پیداہوئے : غور کیجئے کہ پہلے گٹھلی زمین میں بوتے ہیں، اس سے جھاڑنکلتا ہے پھر پیڑہوتا ہے ، ڈالیا ں بنتی ہیں ، پتے نکلتے ہیں ، پھر پھول آتاہے ، پھر پھل لگتا ہے، اس کے بعد سب سے آخرمیں گٹھلی بنتی ہے، شروع میں گٹھلی ہی تھی اور آخر میں بھی گٹھلی ، حقیقتاً جو کچھ بنا سب کچھ گٹھلی سے بنا ، ظاہراً سب سےآخر گٹھلی بنی جو تمام جھاڑ کا خلاصہ ہے ،ایسا ہی شروع میں حضور صلی اللہ علیہ وسلم کا نور تھا ، آپ ہی کے نور سے سب عالم بنا، سب عالم کے آخر میں خلاصۂموجودات ہوکر آپ ہی بنے   ؂    پیش ازہمہ شاہانہ غیور آمدئہ            سب پیغمبروں سے پہلے آپ ہی کا نور پیداہوا ہر چند کہ آخر بہ ظہور آمدئہ            اگر چہ بظاہر سب سے آخر میں تشریف لائے ہوں اے ختم رسل قرب تو معلومم شد    یارسول اللہ صلی اللہ علیہ وسلم سب رسولوں سے آخرمیں آپ آئے ہیں۔   دیر آمدئہ ازرہِ دورآمدئہ                 آپ کوجوقرب الہی حاصل ہے وہ اس سے معلوم ہوا کہ آپ کادیر سے آنا دورراستہ سے ہوا ہے ۔             یعنی اس قدر آپ کو قربِ الہی حاصل ہے کہ دوسرے کسی پیغمبر کویہ قرب حاصل نہیں ہے ،اس لئے سب پیغمبر جلدی جلدی آگئے آپ دیرمیں تشریف لا ئے ۔             فصل           نورِ محمدی صلی اللہ علیہ وسلم سے ساری کائنات اور عشق ومحبت پیدا ہونے کے بیان میں   ہردوجہاں پر تو نورِ ویست      دونوں جہاں آپ ہی کے نور سے ظاہر ہوئے ہیں   کون ومکان بہر ظہور ویست یہ سارے جہاں اسی واسطے ظاہر کے گئے ہیں کہ ان پر آپ کا مرتبہ ظاہر کیا جائے۔             نہ یہ عرش تھا ، نہ یہ کرسی تھی ، نہ زمین نہ آسمان ، نہ شجر نہ حجر، نہ عشق تھا نہ محبت ، نہ دل تھانہ دل جلے ، ایک فقط تن تنہا خداوند قدوس کی ذات، تھی اور کوئی نہ تھا۔   جب نہ تھا کونین کا بالکل پتا                       محواور تنہا تھی ذاتِ کبریا                        محو اور بیخود تھا جسم عالم میں رب      گنج مخفی بولتے ہیں اس کو سب               سچ پوچھئے تو اگر بے عشق ومحبت کے سارا عالم بھی بنتا تو فضول تھا خدائے تعالی کو منظور ہوا کہ کچھ حسن و عشق کی بہار دکھائے ،اسلئے پہلے نورِ محمدی صلی اللہ علیہ وسلم کوپیدا کرکے اس سے تمام عالم کاٹھاٹھ جمایا  ؂             نکور وتاب مستوری ندارد= حسین چھپ نہیں سکتا اپنے حسن کا بہاردکھائے بغیر نہیں رہ سکتا             چوں دربندی سرازروزن برآرد= اگر دروازہ بندکردیا جائے تو کھڑکی سے ہی منہ  نکالے گا۔             اب وقت آگیاتھا کہ کسی نہ کسی طرح حسن دکھائے ، اس لئے اللہ تعالی نے نورِ محمدی صلی اللہ علیہ وسلم کو پیدا کیا ،پھراس نورسے تمام عالم بناکر اپنی قدرت دکھایا۔             صاحبو! کیا بتاؤں وہ نورِ محمدی صلی اللہ علیہ وسلم آفتاب وماہ تاب کے نور سے لاکھوں درجے زیادہ تھا، ماہتاب ایک حدکے بعد گھٹنے لگتا ہے ، مگریہ نورِ محمدی صلی اللہ علیہ وسلم ہرآن' دن دگنا رات چوگنا ہوتا ہے ۔   وللاٰخرة خيرلک من الاولی    (سورہ والضحی پ30ع1)(اور آپ کی بعد کی زندگی ، پہلی زندگی سے بہتر ہوتی جاتی ہے )             اللہ تعالی مخفی تھا اپنے آپ کو آشکارا کرنے کے لئے  نورِ محمدی صلی اللہ علیہ وسلم  سے انسان بنایا اور انسان میں عشق ومحبت کاچرچہ پھیلایا   ؂         درد دل کے واسطے پیدا کیا انسان کو   ورنہ طاعت کے لئے کچھ کم نہ تھے کَرُّوْبیاں   خلاصہ یہ کہ :۔             انسان بناکر آشکارا ہوا ، عالم بناکر اپنی قدرت دکھایا ، نورِ محمدی صلی اللہ علیہ وسلم بناکر حسن وعشق کو ظاہر کیا۔ اسی واسطے آپ کی امت میں ایسے ایسے عاشقانِ الہی پیدا ہوئے کہ دوسری امتوں میں ان کی نظیر نہیں ملتی ۔   فصل   یہ فصل ذیل کے امور پر مشتمل ہے ۔             1)     اللہ تعالی کا 'نور مبارک پر طرح طرح کی سرفرازیاں فرمانا۔             2)     نورمبارک کاسرفرازیوں کے شکرانہ میں دوگانہ اداکرنا۔             3)     نور مبارک کا امت محمدیہ کی مغفرت چاہنا۔             جب حضرت صلی اللہ علیہ وسلم کا نور مبارک پیدا ہوا تو وہ نورِمبارک ۔   بارہ ہزارسال مقام قرب میں رہا۔   پھر بارہ ہزار سال      مقام محبت میں رہا۔   پھر بارہ ہزار سال      مقام خوف میں رہا ۔   پھر بارہ ہزار سال      مقام رجاء میں رہا۔   پھر بارہ ہزار سال      مقام حیا ء میں رہا۔             غرض اس نورِ مبارک پر طرح طرح کی سرفرازیاں ہوتی رہیں ، ان سرفرازیوں کے شکرانے میں وہ نورِمبارک ایک دوگانہ اس طرح پڑھا کہ ۔   ہزار سال                 قیام میں رہا۔   ہزار سال                 رکوع میں رہا۔   ہزار سال                 قومہ میں رہا۔   ہزار سال                 سجدہ میں رہا۔   ہزار سال                 جلسہ میں رہا۔   ہزار سال                دوسرے سجد ہ میں رہا۔             الغرض دونوں رکعتوں کا ہررکن ہزار ہزار سال اداکیا ، اور دوسری رکعت کے سجدۂ ثانی کے بعد قاعدہ بھی ہزار سال میں اداکیا   ؂   پہلے وہ نورِمبارک سروسا ٭ پردۂ عظمت تک اونچا ہوا   پھر جھکا واں سے توحمدِرب کیا ٭ اور لاکھوں سال سجدہ میں رہا             الغرض جب اس طرح نمازختم کرچکا ۔باری تعالیٰ کا حکم ہوا ، اے میرے حبیب کے نور! تیر ی اس خدمت کو ہم نے بہت پسند کیا ، مانگ کیا مانگتا ہے !             وہ نورِمبارک عرض کیا، الہی !مجھے قرائن سے معلوم ہوتا ہے کہ آپ مجھ کوایک امت کا مقتدا بنائیں گے اور اس امت سے تقصیر ات ہوں گے ، اس نماز کے عوض ان کی مغفرت مانگتاہوں ۔             باری تعالیٰ کا حکم ہوا: اے میرے حبیب کے نور !مجھ کو تجھ سے ایسی ہی امید ہے ۔   ولسوف يعطيک ربک فترضی (سورۂ والضحی پ30ع1)             تمہارا پروردگار آگے چل کر تم کو تمہاری امت کے لئے اتنا کچھ دے گا کہ تم بھی خوش ہوجاؤگے۔         فصل   اس فصل کے مشمولہ مضامین:   نورِمبارک سے تخلیق عرش ا ور تخلیق قلم اورتخلیق جنت ۔   اوران حالات کی صراحت جو قلم بننے کے بعد ہوئے۔   اور ان اعمال کی صراحت جو جنت میں جانے کے لئے ضروری ہیں۔             محمد صلی اللہ علیہ وسلم کے نورِمبارک سے عرش بنا، کرسی بنی، لوح‘ قلم ، جنت ، دوزخ، ملک ، فلک ، انسان وجنات ، آسمان وزمین ، دریا ،جھاڑ، پہاڑ غرض تمام مخلوق اسی نورسے بنی۔             عرش کا نور بھی حضرت ہی کے نور سے ہے ، دل کا نور بھی حضرت ہی کے نور سے ہے ، لوح کانوربھی حضرت ہی کے نور سے ہے ، عقل کا نور بھی حضرت ہی کے نور سے ہے ، معرفت کانور بھی حضرت ہی کے نور سے ہے ، دن کا نور بھی حضرت ہی کے نور سے ہے ، آنکھ کا نور بھی حضرت ہی کے نور سے ہے ۔             اس نورِ مبارک سے ان سب میں پہلے عرش بناپھر قلم   ؂   حق نے فرمایا قلم کو اے قلم ٭ پہلے توحید الہی کر رقم   مرسلوں کے لکھ پھر امت کابیان ٭ خیر وشرکا نتیجہ کرعیاں   حضرت آدم سے تاعیسیٰ نبی ٭ یہ حقیقت کلک قدرت نے لکھی             اللہ تعالی کا حکم ہوا، اے قلم لکھ !           قلم نے عرض کیا :کیا لکھوں؟             اللہ تعالی کا حکم ہوا: قیامت تک جو کچھ ہونے والا میرے علم میں ہے وہ سب لکھ ڈال، قلم نے عرض کیا :ابتداء کس کلام سے کروں ؟           اللہ تعالیٰ کا حکم ہوا: پہلے لکھ ’’بسم اللہ الرحمن الرحیم ‘‘             قلم جب" بسم اللہ" لکھنا چاہا تو لفظ" اللہ" پر' اللہ تعالیٰ کے نام مبارک کی کچھ ایسی ہیبت طاری ہوئی کہ سات سوسال تک وہ قلم چراہوا رہا،پھر جب" رحمن ورحیم" لکھا وہ شگاف اور شق مل گئے ۔             اس پر اللہ تعالیٰ کا حکم ہوا: اے قلم گواہ رہ کہ محمد صلی اللہ علیہ وسلم کاجوامتی بھی ’’بسم اللہ الرحمن الرحیم ‘‘پڑھے گااس کو سات سوسال کی عباد ت کا ثواب ملے گا ۔             اس کے بعد قلم نے پہلا فقرہ یہ لکھا:          انی انا الله لا اله الا انا ومحمد رسولی من استسلم بقضائی وصبرعلی بلائی وشکرعلی نعمائی ورضی کتبته صديقا وبعثته يوم القيامة مع الصديقين فليخترربا سوائی-         بے شک میں اللہ ہوں ،کوئی معبود نہیں میں ہی معبود ہوں ،محمد صلی اللہ علیہ وسلم میرے رسول ہیں۔جومیری قضاپر راضی رہا اور میری بلاؤں پر بغیر شکایت کئے صبر کیا ۔                    اور میرے نعمتوں کا شکریہ ادا کیا، اور راضی بہ رضائے الہی رہا ۔ تومیں اس کو صدیقوں میں لکھدیتا ہوں اور قیامت میں صدیقوں کے ساتھ اس کو اٹھاؤں گااور جو ایسا نہ کیا۔   جو ایسا نہ کیا اس کو چاہئے کہ اور رب ڈھونڈلے ‘کوئی اور'رب توہے ہی نہیں اسکومیرے ہی سے سابقہ پڑے گا،اس لئے اسکوچاہئے کہ مذکورہ صفات اپنے میں پیدا کرے۔             اس کے بعد قلم نے قیامت تک جوکچھ ہونے والا ہے سب لکھ ڈالا۔             اس نورِمبارک سے جب جنت بنی اس وقت"احکم الحاکمین " نے ارشاد فرمایا: اے جنت !میں تجھ کو چندچیزوں سے آراستہ کیا ہوں ، اس لئے قاعدہ مقرر کرتاہوں کہ تجھ میں ان چند چیزوں پر عمل کرنے والے ہی آئیں گے۔           وہ چندچیزیں یہ ہیں۔             1)     اچھی بات بتانا، بری بات سے روکنا۔             2)     خدائے تعالی کی مخلوق کے کام آنا۔             3)     اللہ تعالیٰ کے احکام کے پابندرہنا ۔             4)     کبیرہ گناہوں سے بچاکرنا۔                      فصل           یہ فصل حسب ذیل مضامین پر مشتمل ہے:   1)     نورِ مبارک حضرت محمد صلی اللہ علیہ وسلم کا پیدائش کے ساتھ ہی نبی ہونا ۔   2)     تمام انبیاء کا نورِمبارک پر ایمان لانا۔   3)روزمیثاق" أَلَسْتُ بِرَبِّكُمْ " کے جواب کے وقت تمام انبیاء کا نورِ محمدی صلی اللہ علیہ وسلم کے جواب کا منتظر رہنا۔   4)حضور صلی اللہ علیہ وسلم کی دیگر انبیاء پر فوقیت وبرتری۔             اللہ تعالی کا حکم ہوا :اے جبرئیل !تھوڑی خاک لاؤ!  اب جہاں قبر مبارک ہے وہاں کی مٹی لینے حضرت جبرئیل علیہ السلام آئے ، وہ زمین کا حصہ مارے شوق کے جھومنے لگا، سفید نورانی مٹی ظاہر ہوئی ، جبرائیل علیہ السلام اس مٹی کو لے کرچشمۂ تسنیم میں مشک وزعفران سے خوشبودار کئے ، پھر اس نورِمبارک کو اس خاک سے تعلق کراکے پیش کئے ۔   حکم حق جبرائیل پر صادر ہوا    ٭      جا  مدینے کی زمیں کی خاک لا   اس نے لائی واں سے وہ خاک لطیف ٭ اب جہاں حضرت کی ہے قبر شریف   خاک میں تسنیم کا پانی ملا      ٭     کر خمیر اس نور سے کی ایک جا   وہ موتی کی طرح روشن بنا     ٭     سب بہشتی نہروں میں غوطہ دیا   بحر و بر کو ہ وفلک سے یوں کہا ٭     یاد رکھو ہے یہ جسم مصطفی    اللہ تعالی کا حکم ہوا: تمام آسمانوں اور تمام زمین میں اور چوطرف اطراف عالم میں اس کو سیر کراؤ! ساتھ ہی ساتھ یہ ندابھی کردو۔          هذه طينة حبيب رب العالمين  شفيع المذنبين مشهور فی الاولين مذکور فی الآخرين           یہ رب العالمین کے حبیب کی خمیر کی ہوئی مٹی ہے ,یہ وہ حبیب ہیں کہ گنہگاروں کی شفاعت کرنے والے,تمام عالم میں جن کی شہرت ہے ,آخر میں آنے والے لوگوں میں انہیں کا چرچہ ہے ،پھر اس کونور کی قندیل میں رکھ کر عرش کے نیچے لگادو۔             ایسا ہی کیا گیا ،وہ نورمبارک اس طرح بناکر سیر کراکر عرش کے نیچے رکھاگیا، یہی نہیں کہ سب سے اول یہ نور مبارک بنا اور عرش کے نیچے رکھ دیا گیا ، بلکہ وہ نورمبارک سب سے اول پیدا ہوا، اور پیدا ہوتے ہی نبی بنادیاگیا۔             اسی واسطے حضور صلی اللہ علیہ وسلم فرماتے ہیں:           کنت نبيا واٰدم بين الماء والطين .        (میں اس وقت نبی ہوچکاہوں کہ ابھی حضرت آدم پانی اور مٹی میں خمیر کئے جارہے تھے)             اب بحث یہ ہے کہ اس حدیث شریف میں آپ کا جونبی ہونا مذکور ہے اگر اس سے مراد یہ ہے کہ آپ علم الہی میں نبی تھے تو سب انبیاء بھی علم الہی میں نبی تھے ، پھر حضور صلی اللہ علیہ وسلم کی کیا تخصیص ہے ؟   اس کا جواب یہ ہے کہ :           نورِ محمدی صلی اللہ علیہ وسلم کے نبی ہونے سے مرادیہ نہیں ہے کہ آپ صرف علم الہی میں ہی نبی تھے بلکہ آپ ظاہراً تمام فرشتوں اور تمام روحوں کے اور تمام نبیوں کے نبی تھے ، ان سب کو علوم الہٰیہ کا برابر فیض پہونچارہے تھے۔             روزمیثاق جب تمام ارواح سے سوال ہوا: " أَلَسْتُ بِرَبِّكُمْ "(کیوںمیں تمہارا رب نہیں ہوں؟) سب کے سب آپ کے نور مبارک کی طرف تکتے تھے کہ دیکھیں آپ کیا جواب دیتے ہیں ، سب سے اول حضور صلی اللہ علیہ وسلم کے نور مبارک نے فرمایا: ’’بلی انت ربنا‘‘ (کیوں نہیں بے شک آپ ہمارے رب ہیں )اس کے بعد اوروں نے بھی کہا’’ بلی ‘‘ (کہ بے شک آپ ہمارے رب ہیں)اسی کی طرف حضور کا اشارہ ہے ’’نحن السابقون الاخرون‘‘ (ہم سب سے سابق ہیں مگر دنیا میں آنے میں سب سے آخر ہیں)             جب اس نورمبارک سے اور نبیوں کے نورپیدا ہوئے تو خدائے تعالی نے فرمایا: اے میرے حبیب کے نور! ان تمام پیغمبروں کی طرف نظرڈال ! نظر ڈالتے ہی تمام پیغمبروں کے نورایسے ماند پڑھ گئے جیسے آفتاب کے سامنے تارے‘ تو سب پیغمبروں نے عرض کیا:الہی! یہ کون ہے کہ ان کے نورنے ہم سب کے نور کو چھپادیا ؟ اللہ تعالی نے فرمایا: یہ نور محمد بن عبداللہ صلی اللہ علیہ وسلم ہے، اگر تم سب ا ن پر ایمان لائیں تو میں تم سب کو پیغمبر بناتا ہوں، سب پیغمبر کہنے لگے : الہیٰ!ہم سب ان پر بھی ایمان لائے اوران کی نبوت پر بھی، اللہ تعالی نے فرمایا: اچھا میں اس پر گواہ ہوں ۔             (ان الله تعالی لما خلق نور نبينا محمد صلی الله عليه واله وسلم امره ان ينظر الی انوار الانبياء عليهم الصلاة والسلام ، فغشيهم من نوره ما انطقهم الله به وقالوا: يا ربنا ! من غشينا نوره؟ فقال الله تعالی:هذا نور محمد بن عبد الله ، ان آمنتم به جعلتکم انبياء ، قالوا:آمنا به وبنبوته،فقال الله تعالی:اشهد عليکم ، قالوا :نعم .) (المواہب اللدنیۃ مع الزرقانی،ج1ص78)           (مضمون بالا کی دلیل قرآن سے )          وَإِذْ أَخَذَ اللَّهُ مِيثَاقَ النَّبِيِّينَ لَمَا آتَيْتُكُمْ مِنْ كِتَابٍ وَحِكْمَةٍ ثُمَّ جَاءَكُمْ رَسُولٌ مُصَدِّقٌ لِمَا مَعَكُمْ لَتُؤْمِنُنَّ بِهِ وَلَتَنْصُرُنَّهُ قَالَ أَأَقْرَرْتُمْ وَأَخَذْتُمْ عَلَى ذَلِكُمْ إِصْرِي قَالُوا أَقْرَرْنَا قَالَ فَاشْهَدُوا وَأَنَا مَعَكُمْ مِنَ الشَّاهِدِينَ ۔ (ترجمہ:جب کہ اللہ نے پیغمبروں سے عہد لیا کہ ہم جو تم کو اپنی کتاب اور عقل سلیم دیں ، اور پھر کوئی پیغمبر تمہارے پاس آئے اور جوکتاب تمہارے پاس ہے اس کی تصدیق بھی کرے تو دیکھوضرور اس پر ایمان لانا اور ضرور اس کی مددکرنا اور فرمایاکہ کیا تم نے اقرارکرلیا ۔اور ان باتوں پر جو ہم نے تم سے عہد وپیمان لیا ہے اس کو تسلیم کیا۔پیغمبروں نے عرض کیا کہ ہاں ہم اقرار کرتے ہیں،خدانےفرمایا: اچھا تو آج کے قول وقرار کے گواہ رہو،اورتمہارے ساتھ گواہوں میں سے ایک گواہ ہم بھی ہیں۔)   (سورہ اٰل عمران پ3ع9)             اسی واسطے آپ نبی الانبیاء ہیں ، اسی واسطے آپ شب معراج میں تمام انبیاء کے امام ہوئے، اسی واسطے قیامت میں تمام انبیاء آپ کے جھنڈے کے نیچے ہوں گے ،اسی واسطے ایک مرتبہ حضرت جبرئیل علیہ السلام حاضر ہوکر عرض کئے: یارسول اللہ صلی اللہ علیہ وسلم !پروردگاعالم فرماتا ہے :           اگر میں ابراہیم علیہ السلام کو خلیل بنایا تو کیا ہوا، آپ کو میں اپنا حبیب بنایاہوں - خلیل اگر عاشق الہی ہیں تو آپ محبوب الہی ہیں-کوئی مخلوق میرے پاس آپ سے زیادہ عزت دار نہیں ، میں ساراعالم اسی لئے پیدا کیا ہوں کہ آپ کی جو قدر ومنزلت میرے پاس ہے وہ ان سب کو دکھاؤں اورآپ کے مراتب سے واقف کراؤں ، اگر آپ نہ ہوتے تو کسی کو پیدا ہی نہ کرتا۔           (عن سلمان  رضي الله تعالى عنه قال: " هبط جبريل على النبي صلى الله عليه وسلم فقال: إن ربك يقول لك: " إن كنت اتخذت إبراهيم خليلا فقد اتخذتك حبيبا، وما خلقت خلقا أكرم علي منك، ولقد خلقت الدنيا وأهلها لأعرفهم كرامتك ومنزلتك، ولولاك ما خلقت الدنيا ".) (ابن عساکر، سبل الهدى والرشاد،ج1ص75) درآں روزے کہ خوباں آفریدند               :        روزمیثاق میں جب پیغمبر وں کی روحوں کو پیداکئے   ترابرجملہ سلطاں آفریدند               :                  آپ کو سب کابادشاہ بنائے   ملاحت برتو یک سرختم کردند            :        حسن وخوبی آپ پرختم کردئیے   پس انگاہ ماہ کنعاں آفریدند              :        اس کے بعد ماہ کنعان یعنی حضرت یوسف کو پیداکئے   ترادارند توقیع سعادت                   :                  آپ کوسعادت کا فرمان دئیے   وزاں پس نوع انسا آفریدند              :        اس کے بعد انسان کو پیدا کئے   سوار ے چوں تو درمیدان خوبی                 :        آپ کے جیسا ہر قسم کی خوبی رکھنے والا کوئی سوار دنیا میں نہیں آیا   نیامدتاکہ میدان آفریدند               :                  جب سے کہ میدان دنیا پیدا کئے ہیں۔   الغرض یہ نورمبارک ہزار ہاسال ، برس ہابرس ذکر وحمد کرتارہا۔   (جاری ہے)   (ماخوذ از:میلاد نامہ،مؤلفہ زبدۃ المحدثین حضرت ابو الحسنات سید عبد اللہ شاہ نقشبندی مجددی قادری محدث دکن رحمۃ اللہ تعالی علیہ ) <a href="../../../../">www.ziaislamic.com</a>

Mufti Maulana Syed Zia Uddin Naqshbandi Quadri

Shaik-ul-Fiqh - Jamia Nizamia

Mufti Maulana Syed Zia Uddin Naqshbandi Quadri

Shaik-ul-Fiqh - Jamia Nizamia

News

نور مصطفی صلی اللہ علیہ والہ وسلم'تخلیق سے حضرت عبد اللہ میں جلوہ گری تک