سال نو کے آغازپر ماضی کا محاسبہ کرکے مستقبل کو تابناک بنائيں

اللہ تعالی نے حضور اکرم صلی اللہ علیہ والہ وسلم  کی نسبت گرامی کے سبب اس امت کو افضلیت و خیریت کی خلعت فاخرہ مرحمت فرمائی،آپ کے ذریعہ امت مسلمہ کو جامع وکامل شریعت عطا فرمائی،زندگی کے کسی بھی پہلو پر  اسے تشنہ نہیں رکھا ہے،قوم مسلم ایک عالی وقار،مقصد کے تحت زندگی گزارنے والی اور مقتدا قوم ہے،باطل رواج ،فرسودہ رسوم اور غیر شائستہ تہذیب وتمدن کو اپنانا اس کا شعار نہیں،سال نو کے  استقبال کےعنوان سے مرد وزن کا بے محابہ اختلاط،مئے نوشی،فلم بینی اور رقص وسرود کی محفلیں سجانا،پارکوں اور کلبوں میں ناچنا غیر اسلامی اور غیر اخلاقی عمل ہے- "سال نو اور ہماری ذمہ داریاں"اس عنوان پر خطاب کرتے ہوئے ان حقا&rlm;ئق کا اظہار  حضرت ضياء ملت مولانا مفتی حافظ سید ضیاء الدین نقشبندی دامت برکاتہم العالیہ نائب شیخ الفقہ جامعہ نظامیہ بانی ابو الحسنات اسلامک ریسرچ سنٹر نے ابو الحسنات اسلامک ریسرچ سنٹر کے زیر اہتمام مسجد ابو الحسنات پھول باغ جہاں نما، حیدرآباد میں منعقدہ ہفتہ واری توسیعی لکچر میں فرمایا- سلسلۂ خطاب جاری رکھتے ہوئے  حضرت ضياء ملت دامت برکاتہم العالیہ فرمایا کہ زندگی کے لمحات بیش بہا ،نہایت قیمتی اور قابل قدر ہیں،اپنی عمر رواں کے بقیہ لمحات کو غنیمت جانیں،انہیں لایعنی افعال،بے فائدہ اعمال میں ہرگز صرف نہ کریں،بلکہ انہیں اللہ تعالی کی فرمابرداری اور اس کے رسول صلی اللہ علیہ والہ وسلم  کی تابعداری میں گزاریں،انسان کو اپنی حیات مستعار کے لمحات وساعات کی اس وقت قدر ہوگی جب وہ اس عالم سے کوچ کررہا ہوتاہے،لیکن اس وقت کا افسوس کرنا بے فائدہ ثابت ہوگا،ارشاد الہی ہے: حَتَّى إِذَا جَاءَ أَحَدَهُمُ الْمَوْتُ قَالَ رَبِّ ارْجِعُونِ  لَعَلِّي أَعْمَلُ صَالِحًا فِيمَا تَرَكْتُ كَلَّا إِنَّهَا كَلِمَةٌ هُوَ قَائِلُهَا- ترجمہ:اور یہاں تک کہ جب ان میں سے کسی کے پاس موت آتی ہے تو وہ اس وقت کہتا ہے:اے میرے رب!مجھے دنیا میں واپس بھیج دے،تاکہ میں جس (دنیا) کو چھوڑکرآیا ہوں اس میں پھر جاکر نیک کا م کروں،ہرگز ایسا نہيں ہوگا،یہ تو اس کی ایک بات ہے جسے وہ کہتا جارہا ہے-(سورۃ المؤمنون"99/100) دوران خطاب حضرت ضياء ملت دامت برکاتہم العالیہ نے فرمایا کہ طاعت الہی سے غافل رہکر جن اوقات کو لایعنی امور میں ضائع کیا جاتا ہے،جہنم میں جانے کے بعد بھی بندہ اس پر افسوس کرتاہے،سورۃ المؤمنون میں ہے: رَبَّنَا أَخْرِجْنَا مِنْهَا فَإِنْ عُدْنَا فَإِنَّا ظَالِمُونَ  قَالَ اخْسَئُوا فِيهَا وَلَا تُكَلِّمُونِ - ترجمہ:وہ لوگ کہینگے:اے ہمارے رب!ہم کو اس جہنم سے نکال دے،اگر ہم دوبارہ (ایسا عمل)کریں تو بیشک ہم ظالم ہیں،ارشاد ہوگا:ذلت ورسوائی کے ساتھ اسی جہنم میں پڑے رہواور مجھ سے بات مت کرو-(سورۃ المؤمنون:108) سال نو کے آغاز کے وقت بالخصوص ہم اپنی زندگيوں کا محاسبہ کریں،یہ وقت لہو لعب میں گزارنے کا نہیں بلکہ اپنے ماضی اور حال کا جائزہ لینے اور مستقبل کو تابناک کرنے کے لئے منصوبہ کرنے کا ہے ،ہم غور کریں کہ ہم نے حقوق اللہ اور حقوق العباد کی ادئی کا کس درجہ اہتمام کیا،ہم زندگی کے ان لمحات کے قدرشناس بنیں، عالم شباب کواطاعت الہی میں صرف کریں ،حضور اکرم صلی اللہ علیہ والہ وسلم نے ارشاد فرمایا: انسان کے قدم اس وقت تک نہیں ہٹیں گے جب تک کہ چار چیزوں کے بارے میں سوال نہ کیا جائے:اس کی عمر کے بارے میں کہ اسے کہاں لگایا ہے،اس کے علم کے بارے میں کہ اس پر کہاں تک عمل کیا،اس کے مال کے بارے میں کہ اسے کہاں سے کمایا ہے اور کہاں خرچ کیا ہے،اس کے جسم کے بارے میں کہ اس کی توانائیوں کو کہاں خرچ کیا ہے۔ (کنز العمال،حدیث نمبر:38983)

Mufti Maulana Syed Zia Uddin Naqshbandi Quadri

Shaik-ul-Fiqh - Jamia Nizamia

Mufti Maulana Syed Zia Uddin Naqshbandi Quadri

Shaik-ul-Fiqh - Jamia Nizamia

News

سال نو کے آغازپر ماضی کا محاسبہ کرکے مستقبل کو تابناک بنائيں